ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ນະຄອນຫຼວງວຽງຈັນ (ປປລ ນວ) ຈັດເວທີສົນທະນາ ເນື່ອງໃນວັນເກີດ ປະທານ ສຸພານຸວົງ ຄົບຮອບ 114 ປີ (13 ກໍລະກົດ 1909 ຫາ 13 ກໍລະກົດ 2023) ຂຶ້ນໃນວັນທີ 18 ກໍລະກົດ 2023 ຢູ່ປົກຄອງ ນວ ມີທ່ານ ຊົງເລົາ ຢົງນູ ຫົວໜ້າຄະນະໂຄສະນາອົບຮົມນະຄອນຫຼວງວຽງຈັນ ມີຄະນະເລຂາຊາວໜຸ່ມ ປປລ ນະຄອນຫຼວງວຽງຈັນ ປະທານ-ຮອງປະທານອົງການຈັດຕັ້ງພາຄີ ຂັ້ນ ນວ ຄະນະຊາວໜຸ່ມບັນດາເມືອງ ພະແນກການ ອົງການທຽບເທົ່າໂຮງຮຽນຕະຫຼອດຮອດສະມາຊິກຊາວໜຸ່ມເຂົ້າຮ່ວມ.
ໂອກາດນີ້ ທ່ານ ຊົງເລົາ ຢົງນູ ໄດ້ຍົກເຫັນເຖິງແບບແຜນການດຳລົງຊີວິດອັນລຽບງ່າຍ ຜົນງານໃນພາລະກິດຕໍ່ສູ້-ປົດປ່ອຍ ປະເທດຊາດ ກໍຄືການປະຕິບັດ 2 ໜ້າທີ່ຍຸດທະສາດ ນອກນັ້ນ ປະທານ ສຸພານຸວົງ ຍັງເປັນຜູ້ນຳທີ່ມີນ້ຳໃຈເສຍສະຫຼະເພື່ອປະເທດຊາດ ເພື່ອປະຊາຊົນ ເຊິ່ງພວກເຮົາຜູ້ທີ່ເປັນພະນັກງານສືບທອດຕ້ອງນຳເອົາໄປໜູນໃຊ້ເຂົ້າໃນວຽກງານ ຂອງຕົນໃຫ້ປະສົບຜົນສຳເລັດ.
ທຸກໄລຍະຂອງການປະຕິວັດ ປະທານ ສຸພານຸວົງ ໄດ້ສຸມສະຕິປັນຍາ ແລະ ເຫື່ອແຮງຂອງຕົນເພື່ອຊີ້ນຳ-ນຳ ພາຂະບວນການປະຕິວັດລາວ ຍາດເອົາໄຊຊະນະອັນຍິ່ງໃຫຍ່ ມາໃຫ້ແກ່ປະເທດຊາດ ປະທານ ໄກສອນ ພົມວິຫານ ໄດ້ເວົ້າເຖິງ ປະທານ ສຸພານຸວົງວ່າ: ຊື່ສຽງຮຽງນາມ ຂອງສະຫາຍໄດ້ພົ້ນເດັ່ນຂຶ້ນໃນຖານະທີ່ເປັນນັກຮົບຮັກຊາດຮຸ່ນທຳອິດ ທີ່ໄດ້ເອົາຊີວິດຂອງຕົນຜູກພັນກັບການປະຕິວັດຕະຫຼອດມາ ໂດຍບໍ່ງໍ້ງ່ຽງຕໍ່ຄວາມລຳບາກ ຄວາມເສຍສະຫຼະໃດໆ ກະທັ້ງເຖິງບໍ່ຫວາດຫວັ່ນຕໍ່ກັບການຈັບກຸມຄຸມຂັງຂອງສັດຕູ ຍາມໃດກໍຕໍ່ສູ້ເພື່ອອຸດົມຄະຕິປະຕິວັດອັນສູງສົ່ງ ເພື່ອຄວາມເປັນເອກະລາດ ແລະ ຄວາມວັດທະນາຖາວອນຂອງປະເທດຊາດ ເພື່ອອິດສະຫຼະພາບ ແລະ ຄວາມຢູ່ດີກິນດີຂອງປະຊາຊົນ ໃນຫຼາຍສິບປີທີ່ຜ່ານມາ ທ່ານ ປະທານ ສຸພານຸວົງ ໄດ້ເຂົ້າຮ່ວມກັບໝູ່ຄະນະນຳພາຂອງພັກເຮົາ ເລີ່ມຕັ້ງແຕ່ຊຸມປີຕົ້ນຂອງການປະຕິວັດ ເຂົ້າຮ່ວມກໍ່ສ້າງຮາກຖານປະຕິວັດ ແລະ ຖານທີ່ໜັ້ນຕໍ່ຕ້ານທີ່ກ້າແກ່ນຕະຫຼອດມາ ໃນສອງສະໄໝຕໍ່ຕ້ານອັນຍາວນານຂອງປະຊາຊົນເຮົາ.
ແນວໃດກໍຕາມ ໃນໂອກາດທີ່ພວກເຮົາລະນຶກເຖິງວັນຄ້າຍວັນເກີດຂອງປະທານ ສຸພານຸວົງ ຄົບຮອບ 114 ປີ ພວກເຮົາຊາວ ນວ ຈົ່ງພ້ອມກັນເສີມສ້າງ ຮັກສາຄວາມສາມັກຄີປອງດອງ ລະຫວ່າງຊົນເຜົ່າ ກໍຄືຊາວ ນວ ທຸກຊັ້ນຄົນ ແລະ ພ້ອມກັນຮ່ຳຮຽນເອົາຄຸນສົມບັດສິນທຳປະຕິວັດ ແບບແຜນການດຳລົງຊີວິດຂອງເພິ່ນ ເພື່ອນຳມາພັດທະນາ ນວ ໃຫ້ມີທ່າອ່ຽງກ້າວຂຶ້ນ ແລະ ບັນລຸໄດ້ບັນດາຄາດໝາຍທີ່ກຳນົດໄວ້ ໃນມະຕິກອງປະຊຸມໃຫຍ່ ຄັ້ງທີ XI ຂອງພັກ ມະຕິ VII ຂອງອົງຄະນະພັກ ນວ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຂອງລັດ ໃນທ້າຍສະໄໝ ໃຫ້ປະກົດຜົນເປັນຈິງ.
