ສະຫາຍ ບຸນປອນ ວັນນະຈິດ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງການເງິນ ໄດ້ໃຫ້ຮູ້ໃນກອງປະຊຸມ ຄົບຄະນະກາງສະໄໝ ຂອງຄະນະບໍລິຫານງານພັກກະຊວງການເງິນ ສະໄໝທີ III ທີ່ຈັດຂຶ້ນເມື່ອບໍ່ດົນນີ້ວ່າ: ໄລຍະແຕ່ປີ (2021-2023), ອົງຄະນະພັກກະຊວງການເງິນ ໄດ້ເອົາໃຈໃສ່ນໍາພາ-ຊີ້ນໍາດ້ານວຽກງານວິຊາສະເພາະ ຕາມພາລະບົດ ບາດ, ຂອບເຂດສິດ ເປັນຕົ້ນ ການຈັດຕັ້ງປະຕິບັດແຜນງົບປະມານແຫ່ງລັດ; ສືບຕໍ່ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນທີ່ສະສົມມາຍາວນານ, ບັນຫາໜີ້ສິນສາທາລະນະທີ່ມີຄວາມກົດດັນສູງສົມຄວນ, ລາຄາພະລັງງານ, ລາຄາສິນຄ້າ-ບໍລິການ ແລະ ໄພເງິນເຟີ້ຂອງບັນດາປະເທດທີ່ມີເສດຖະກິດຂະຫຍາຍຕົວເພີ່ມຂຶ້ນສູງໃນຮອບຫລາຍສິບປີ ຊຶ່ງມີຜົນກະທົບທາງກົງ ແລະ ທາງອ້ອມຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດມີຄວາມຫຍຸ້ງຍາກສົມຄວນ.
ຕໍ່ບັນຫາດັ່ງກ່າວ, ອົງຄະນະພັກກະຊວງການເງິນ ໄດ້ນໍາພາ-ຊີ້ນໍາການຈັດຕັ້ງປະຕິບັດກົນໄກ, ລະບຽບການ ເພື່ອແກ້ໄຂການຮົ່ວໄຫລຂອງລາຍຮັບ ຈາກການນໍາເຂົ້ານໍ້າມັນເຊື້ອໄຟ, ເຄື່ອງກໍ່ສ້າງ, ເຄື່ອງໄຟຟ້າ, ເຄື່ອງອຸປະໂພກ-ບໍລິໂພກໃນໄລຍະຜ່ານມາ ໂດຍນໍາໃຊ້ລະບົບທີ່ທັນສະໄໝໃນການແຈ້ງພາສີແບບເອເລັກໂຕຣນິກ, ການຄຸ້ມຄອງສາງສິນຄ້າ, ການເຊື່ອມໂຍງຂໍ້ມູນການບັນທຶກການຊື້-ຂາຍ ເພື່ອດັດສົມບໍລິສັດຂາເຂົ້າ-ຂາອອກ ທີ່ເຄື່ອນໄຫວບໍ່ຖືກຕາມກົດໝາຍ ແລະ ລະບຽບການ ໃຫ້ເຂົ້າສູ່ການປະຕິບັດກົດໝາຍຢ່າງເຂັ້ມງວດ.
ປັດຈຸບັນ, ກະຊວງການເງິນ ໄດ້ປັບປຸງຍົກລະດັບລະບົບອາຊີກູດາ (ASYCUDA) ມາເປັນລະບົບດຽວກັບ NSWA+ (ລະບົບແຈ້ງພາສີປະຕູດຽວແຫ່ງຊາດ ອາຊີກູດາພລາສ) ຊຶ່ງເປັນລະບົບຕິດຕາມ, ກວດກາ ແລະ ຄຸ້ມຄອງການນໍາເຂົ້າ-ສົ່ງອອກສິນຄ້າແຈ້ງພາສີ ເປັນລາຍລະອຽດແບບເອເລັກໂຕຣນິກ ຕາມມາດຕະຖານສາກົນ; ໄດ້ທົດລອງການແຈ້ງພາສີຢູ່ດ່ານທ່າບົກທ່ານາແລ້ງແລະ ຂົວມິດຕະພາບ I. ພ້ອມທັງສໍາເລັດການຝຶກອົບຮົມການນໍາໃຊ້ລະບົບດັ່ງກ່າວ ຢູ່ບັນດາແຂວງໃນຂອບເຂດທົ່ວປະເທດ; ປັບປຸງ ແລະ ພັດທະນາຖານໂມດຸນຂອງລະບົບຄຸ້ມຄອງອາກອນທັນສະໄໝ (TaxRIS) ທີ່ສາມາດເຊື່ອມໂຍງກັບລະບົບອາຊີກູດາ, ເຊື່ອມລະບົບຂອງກະຊວງແຮງງານແລະ ສະຫວັດດີການສັງຄົມ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ລະບົບຖານຂໍ້ມູນທີ່ດິນ LaoLandReg7.0, ພ້ອມທັງດໍາເນີນການປັບປຸງລະບົບຄຸ້ມຄອງເກັບຄ່າທໍານຽມທາງ ແລະ ພາສີທີ່ດິນ, ຄ່າທໍານຽມລາຍຮັບບໍລິຫານວິຊາການຢູ່ກົມກົງສູນ, ກອງຄຸ້ມຄອງພາຫະນະ ແລະ ການຂັບຂີ່ນະຄອນຫລວງວຽງຈັນ ແລະ ບັນດາໂຮງໝໍໃຫຍ່.
ພ້ອມນີ້, ຍັງໄດ້ເປີດນໍາໃຊ້ລະບົບສ່ວຍສາອາກອນທັນສະໄໝ (TaxRIS Dashboard Monitoring) ເຊື່ອມຕໍ່ໄປຫາ 18 ແຂວງ, 148 ເມືອງ ແລະ 6 ເຂດເສດຖະກິດພິເສດໃນຂອບເຂດທົ່ວປະເທດ, ປັບປຸງລະບົບການເສຍຄ່າທໍານຽມທາງ ໂດຍເປີດທົດລອງໃຫ້ບໍລິການຢູ່ກົມຄຸ້ມຄອງພາຫະນະ ແລະ ການຂົນສົ່ງ ແລະ ບັນດາເມືອງຂອງນະຄອນຫລວງວຽງຈັນ; ເປີດນໍາໃຊ້ການບໍລິການຊໍາລະຄ່າພາສີທີ່ດິນ ຜ່ານລະບົບທະນາຄານການຄ້າຕ່າງປະເທດລາວມະຫາຊົນ ແລະ ປັບ ປຸງລະບົບການເຊື່ອມຕໍ່ໂດຍກົງຫາຖານຂໍ້ມູນທີ່ດິນແຫ່ງຊາດ ຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ປັດຈຸບັນ ສໍາເລັດທົດລອງຢູ່ 3 ທະນາຄານ (ພັດທະນາລາວ, ຮ່ວມພັດທະນາ, ສົ່ງເສີມກະສິກໍາ) ແລະ ເປີດຊ່ອງທາງການຊໍາລະຢູ່ຂັ້ນບ້ານ.
ຂ່າວ-ພາບ: ກະຊວງການເງິນ
