ວັນທີ 11 ກໍລະກົດ 2023 ທີ່ ຈາກາກຕາ, ອິນໂດເນເຊຍ, ທ່ານ ສະເຫລີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມ ຄະນະກໍາມາທິການເຂດປອດອາວຸດນິວເຄລຍອາຊີຕາເວັນອອກສ່ຽງໃຕ້ ໂດຍການເປັນປະທານຂອງ ທ່ານ ນາງ ເຣັດໂນ ມາຊູດີ ລັດຖະມົນຕີຕ່າງປະເທດ ອິນໂດເນເຊຍ ແລະ ມີບັນດາລັດຖະມົນຕີຕ່າງປະເທດອາຊຽນເຂົ້າຮ່ວມ. ພ້ອມນີ້, ລັດຖະມົນຕີຕ່າງປະເທດຂອງ ຕີມໍແລັດສະເຕ ກໍໄດ້ເຂົ້າຮ່ວມໃນຖານະປະເທດສັງເກດການ, ກອງປະຊຸມ ໄດ້ທົບທວນຄືນຄວາມຄືບໜ້າຂອງການຈັດ ຕັ້ງປະຕິບັດແຜນງານຂອງສົນທິສັນຍາ ເຂດປອດອາວຸດນິວເຄລຍອາຊີຕາເວັນອອກສ່ຽງໃຕ້ (2023-2027) ແລະ ປຶກສາຫາລືກ່ຽວກັບການລົງນາມອະນຸສັນຍາຂອງສົນທິສັນຍາດັ່ງກ່າວ ໂດຍປະເທດທີ່ມີອາວຸດນິວເຄລຍຄອບຄອງ.
ທ່ານ ສະເຫລີມໄຊ ກົມມະສິດ ໄດ້ເຂົ້າຮ່ວມກອງປະຊຸມພົບປະ ລະຫວ່າງລັດຖະມົນຕີຕ່າງປະ ເທດອາຊຽນ ແລະ ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍສິດທິມະນຸດ(ໄອຈາ) ໃນໂອກາດນີ້, ລັດຖະມົນຕີຕ່າງປະເທດອາຊຽນ ໄດ້ຮັບຟັງການລາຍງານ ຄວາມຄືບໜ້າຂອງ ການຈັດ ຕັ້ງປະຕິບັດແຜນວຽກ 5 ປີ ຂອງໄອຈາ (2021-2025) ໃນວຽກງານການສົ່ງເສີມ ແລະ ປົກປ້ອງສິດ ທິມະນຸດໃນພາກພື້ນ.
ໃນຕອນບ່າຍ, ທ່ານ ສະເຫລີມໄຊ ກົມມະສິດ ໄດ້ສືບຕໍ່ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 56, ເຊິ່ງກອງປະຊຸມໄດ້ປຶກສາຫາລື ກ່ຽວກັບ ການເສີມສ້າງປະຊາຄົມອາຊຽນ ແລະ ການຈັດຕັ້ງປະຕິບັດ ເອກະສານອາຊຽນກ່ຽວກັບອິນໂດ-ປາຊີຟິກ ແລະ ໄດ້ຮັບຊາບຄວາມຄືບໜ້າ ການຈັດຕັ້ງປະຕິບັດບັນດາບູລິມະສິດ ສໍາລັບການເປັນປະທານອາຊຽນຂອງ ອິນໂດເນເຊຍ ໃນປີ 2023. ລັດຖະມົນຕີຕ່າງປະເທດອາຊຽນ ຍັງໄດ້ຮັບຮອງເອົາຖະ ແຫລງການຮ່ວມຂອງກອງປະຊຸມລັດຖະມົນຕີຕ່າງປະເທດ ຄັ້ງທີ 56. ໃນໂອກາດນີ້, ທ່ານ ສະເຫລີມໄຊ ກົມມະສິດ ກໍໄດ້ແຈ້ງໃຫ້ກອງປະຊຸມຊາບ ກ່ຽວກັບການກະກຽມກອງປະຊຸມສໍາຄັນຕ່າງໆ ທີ່ຈະຈັດໃນປີ 2024 ພາຍໃຕ້ການເປັນປະທານອາຊຽນ ຂອງ ສປປ ລາວ.
ໃນມື້ດຽວກັນ, ທ່ານ ສະເຫລີມໄຊ ກົມມະສິດ ຍັງໄດ້ພົບປະສອງຝ່າຍກັບລັດຖະມົນຕີຕ່າງ ປະເທດ ສສ ຫວຽດນາມ ແລະ ບຣູໄນ ດາຣູຊາລາມ ເພື່ອປຶກສາຫາລືກ່ຽວກັບການພົວພັນຮ່ວມມືສອງຝ່າຍ.
