ວັນທີ 13 ກໍລະກົດ ເປັນວັນເກີດປະທານ ສຸພານຸວົງ ຜູ້ນໍາທີ່ດີເດັ່ນ ແລະ ເຄົາລົບຮັກຂອງປະຊາຊົນລາວບັນດາເຜົ່າ ( 13 ກໍລະກົດ 1909), ເປັນວັນສໍາຄັນທີ່ພວກເຮົາຕ້ອງຮັບຮູ້ ແລະ ເຂົ້າໃຈໃຫ້ເລິກເຊິ່ງ ເພື່ອຮໍ່າຮຽນເອົາມູນເຊື້ອ-ຜົນງານ ຄວາມດີອັນຍິ່ງໃຫຍ່ ເພື່ອປະກອບສ່ວນ ສໍາຄັນໃນບັນດາຜົນສໍາເລັດ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ເວົ້າເຖິງປະທານ ສຸພານຸວົງ, ພວກເຮົາຄົນຮຸ່ນໃໝ່ ຕ້ອງໄດ້ສືບຕໍ່ຢ່າງແຂງແຮງ ເພື່ອຮໍ່າຮຽນເອົາຄວາມເປັນແບບຢ່າງອັນດີງາມ ຂອງເພິ່ນຕະຫລອດເວລາ. ຄຸນລັກສະນະທີ່ພົ້ນເດັ່ນຂອງປະທານ ສຸພານຸວົງ ແມ່ນເປັນຜູ້ນໍາທີ່ມີຄວາມຈົ່ງຮັກພັກດີ ຕໍ່ອຸດົມການຂອງການປະຕິວັດຢ່າງ ເດັດຂາດ, ສະຕິລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະ, ມີຄວາມສາມັກຄີເອື້ອເຟື້ອຮັກແພງ ມິດສະຫາຍຢ່າງຈິງໃຈ, ດໍາລົງຊີວິດສຸຈະລິດ ແລະ ງ່າຍດາຍ. ເພິ່ນເປັນປັນຍາຊົນ ເຊື້ອເຈົ້າຜູ້ໜຶ່ງທີ່ມີນໍ້າໃຈຮັກຊາດ ອັນດູດດື່ມ, ມີຈິດໃຈຕໍ່ສູ້ທີ່ອາດຫານກ້າແກ່ນ, ມີທັດສະນະຫລັກໝັ້ນ ອັນໜັກແໜ້ນ ແລະ ນໍ້າໃຈເສຍສະລະອັນສູງສົ່ງເພື່ອຊາດ ແລະ ປະຊາຊົນ. ໂດຍເລີ່ມຈາກນັກຮັກຊາດທີ່ແທ້ຈິງ ໄດ້ກາຍເປັນນັກປະຕິວັດທີ່ກ້າແກ່ນ, ເປັນໜຶ່ງໃນບັນດາຜູ້ນໍາທີ່ດີເດັ່ນ ແລະ ເຄົາລົບຮັກຂອງປະຊາຊົນລາວບັນດາເຜົ່າ. ຕະຫລອດຊີວິດຂອງປະທານ ສຸພານຸວົງ, ບໍ່ວ່າຢູ່ໃນຕໍາ ແໜ່ງໃດ, ຄວາມຮັບຜິດຊອບອັນໃດ ເພິ່ນໄດ້ອຸທິດໝົດຈິດໝົດໃຈ, ໝົດຄວາມສາມາດ ແລະ ຫົວຄິດປະດິດສ້າງ ເຂົ້າໃນພາລະກິດນັ້ນ. ເພິ່ນໄດ້ເດີນຕາມເສັ້ນທາງຂອງພັກ, ຄວາມສາມາດ, ຄຸນນະທໍາ ແລະ ອິດທິພົນຂອງເພິ່ນ ໄດ້ກາຍເປັນສິ່ງກະຕຸກຊຸກຍູ້ປຸກລະດົມ ດຶງດູດປະຊາຊົນເຜົ່າ ຕ່າງໆ, ຊັ້ນຄົນຕ່າງໆຢູ່ພາຍໃນ ແລະ ຕ່າງປະເທດ ປະກອບສ່ວນສ້າງກ້ອນກໍາລັງສາມັກຄີ ເປັນອັນໜຶ່ງ ອັນດຽວກັນ ໃນການເຕົ້າໂຮມເອກະພາບແຫ່ງຊາດ ຊຶ່ງໄດ້ກາຍເປັນໜຶ່ງໃນບັນດາປັດໄຈສໍາຄັນ ທີ່ຮັບປະກັນໄຊຊະນະ ຂອງການປະຕິວັດເຮົາໃນແຕ່ລະໄລຍະ. ປະທານ ສຸພານຸວົງ ຍັງເປັນ ນັກການເມືອງທີ່ເກັ່ງກ້າ, ສະຫລາດມີໄຫວພິບ ໃນການວາງຍຸດ ໂທບາຍດ້ານການຕໍ່ສູ້ການເມືອງ ແລະ ການຕ່າງປະເທດ ໃນແຕ່ລະໄລຍະ. ຄຸນສົມບັດສິນທໍາປະຕິວັດອັນຜ່ອງໃສ ສະແດງເຖິງຄວາມມານະອົດທົນ, ເດັດດ່ຽວ, ເຂັ້ມແຂງ, ມີເຫດມີຜົນ, ກ້າຫານ, ເສຍສະລະ ນັ້ນກໍ່ແມ່ນອີກຄຸນ ລັກສະນະອັນພົ້ນເດັ່ນ ຂອງປະທານ ສຸພານຸວົງ, ຍາມໃດກໍ່ຍົກຜົນປະໂຫຍດຂອງຊາດ ແລະ ປະຊາຊົນສູງກວ່າຜົນປະໂຫຍດສ່ວນຕົວ ແລະ ຄອບຄົວ; ດໍາລົງຊີວິດແບບງ່າຍດາຍ, ປະຢັດມັດທະຍັດ, ດຸໝັ່ນ, ບໍ່ຖືຕົວ, ນິ້່ມນວນ, ການດໍາລົງຊີວິດ-ເຄື່ອນໄຫວ ມີແບບມີແຜນເປັນຢ່າງດີ. ປະ ທານ ສຸພານຸວົງ ເປັນຄົນອອກແຮງງານເກັ່ງ ທາງດ້ານມັນສະໝອງ ແລະ ຮ່າງກາຍ, ເປັນກໍາມະກອນ-ວິສະວະກອນຂົວທາງ ທີ່ເກັ່ງທີ່ສຸດຂອງລາວ. ເພິ່ນບໍ່ພຽງແຕ່ເປັນຜູ້ນໍາທີ່ດີເດັ່ນ ຂອງປະເທດຊາດ, ແຕ່ຍັງເປັນລູກຫລານທີ່ກະຕັນຍູ, ເປັນປູ່, ເປັນພໍ່, ພໍ່ເຖົ້າ ທີ່ແສນເຄົາລົບຮັກຂອງຄອບຄົວ, ເປັນແວ່ນແຍງອັນເຫລື້ອມໃສໃຫ້ແກ່ທຸກຄົນ.
ພວກເຮົາຄວນຈະສືບຕໍ່ເສີມຂະຫຍາຍແບບຢ່າງຄຸນງາມຄວາມດີຂອງປະທານ ສຸພານຸວົງ ຄືແນວໃດ? ໃນສະພາບການພັດທະນາທີ່ມີທັງກາລະໂອກາດ ເອື້ອອໍານວຍ ແລະ ສິ່ງທ້າທາຍທົດສອບນາໆປະການ, ພວກເຮົາຮຸ່ນສືບທອດ ຍິ່ງຕ້ອງຮໍ່າ ຮຽນໃຫ້ເລິກເຊິ່ງ ແລະ ຕະຫລອດເວລາ, ຮຽນເອົາທັດສະນະຫລັກໝັ້ນ ການເມືອງໜັກແໜ້ນ, ຄວາມເຊື່ອໝັ້ນຕໍ່ການນໍາພາຂອງພັກ ກໍ່ຄືການປ່ຽນແປງໃໝ່, ເອົາໃຈໃສ່ຝຶກຝົນຫລໍ່ຫລອມຕົນເອງ ໃຫ້ກາຍເປັນຮຸ່ນສືບທອດ ທີ່ຈົ່ງຮັກພັກດີຕໍ່ພັກ ແລະ ຕໍ່ປະເທດຊາດ. ອອກແຮງສຶກສາຮໍ່າຮຽນທິດສະດີມາກ-ເລນິນ, ເຕັກນິກວິທະ ຍາສາດ, ພາສາຕ່າງປະເທດ ແລະ ວິຊາຊີບຕ່າງໆ ເພື່ອໃຫ້ຕົນເອງມີຄວາມຮູ້ ຄວາມສາມາດສູງ ປະກອບສ່ວນເຂົ້າ ໃນການພັດທະນາປະເທດຊາດ. ສ້າງຕົນເອງ ໃຫ້ເປັນຄົນ ກ້າຫານ, ກ້າຄິດ, ກ້າສະແດງອອກ ເພື່ອປະກອບສ່ວນອັນປະໂຫຍດ ໃນການປະຕິບັດແນວທາງ ແຜນນະໂຍບາຍ, ນະ ໂຍບາຍຂອງພັກ ແລະ ກົດໝາຍຂອງລັດ. ຕ້ອງດໍາລົງຊີວິດດ້ວຍຄວາມສັດຊື່ ປອດໃສຂາວສະອາດ, ດຸໝັ່ນອອກແຮງງານ, ປະຢັດ ແລະ ຕ້ານການຟຸມເຟືອຍ, ຕ້ານ-ສະກັດກັ້ນ ທຸກປະກົດການຫຍໍ້ທໍ້ໃນສັງຄົມ, ເດັດດ່ຽວໜຽວແໜ້ນ ປົກປັກຮັກສາປະເທດຊາດໃຫ້ໝັ້ນຄົງ, ຕໍ່ສູ້ທັບມ້າງກົນອຸ ບາຍຫັນປ່ຽນ ໂດຍສັນຕິຂອງສັດຕູ. ສຸມໃສ່ການຜະລິດຕາມທ່າແຮງ ເພື່ອເຮັດໃຫ້ຊີວິດຂອງ ຄອບຄົວນັບມື້ດີຂຶ້ນ ປະກອບສ່ວນສໍາຄັນກ້າວສູ່ການຫລຸດພົ້ນ ຂອງອອກປະເທດດ້ອຍພັດທະນາ.
ການຮໍ່າຮຽນຢ່າງເລິກເຊິ່ງບັນດາມູນເຊື້ອຜົນງານຂອງປະທານ ສຸພານຸວົງ ຕະຫລອດເວລາ ເພື່ອສືບທອດມູນເຊື້ອປະຕິວັດ ໃນໝູ່ພວກເຮົາຮຸ່ນໃໝ່ແມ່ນຄວາມຈໍາເປັນພາວະວິໄສ, ໃນສະພາບແວດລ້ອມ ແຫ່ງການພັດທະນາໃນໄລຍະໃໝ່ ຍິ່ງ ຕ້ອງຄົ້ນຄວ້າຮໍ່າຮຽນໃຫ້ເລິກ ເພື່ອປົກປັກ ຮັກສາປະເທດຊາດ ກໍ່ຄືໝາກຜົນຂອງການປະຕິວັດເຮົາ.
* ຄ້ອງໃໝ່
