“ກອງປະຊຸມປະຊາສໍາພັນການລົງທຶນ ແລະ ພິທີເຊັນສັນຍາລົງທຶນ ຢູ່ນິຄົມອຸດສາຫະກໍາອັດສະລິຍະ ອາຊີ-ໂປຕາສ ສາກົນ ແຂວງຄໍາມ່ວນ ສປປ ລາວ” ໄດ້ຈັດຂຶ້ນເມື່ອບໍ່ດົນມານີ້ ທີ່ນະຄອນກວາງໂຈວ ສປ ຈີນ, ໂດຍການເປັນເຈົ້າພາບຂອງ ກະຊວງ ອຸດສາຫະກໍາ ແລະ ການຄ້າ ແລະ ອໍານາດການປົກຄອງແຂວງຄໍາມ່ວນ ແຫ່ງ ສປປ ລາວ. ກອງປະຊຸມປະຊາສໍາພັນການລົງທຶນຄັ້ງນີ້ ແມ່ນກອງປະຊຸມປະຊາສໍາພັນດຶງດູດການລົງທຶນອຸດສາຫະກຳຂະໜາດໃຫຍ່ຄັ້ງທໍາອິດ ທີ່ລັດຖະບານລາວຈັດຂຶ້ນຢູ່ຕ່າງປະເທດ ເຊິ່ງແຕກຕ່າງຈາກກອງປະຊຸມປະຊາສໍາພັນການລົງທຶນກໍ່ສ້າງພື້ນຖານໂຄງລ່າງທີ່ລັດຖະບານລາວຈັດຂຶ້ນໃນຄັ້ງກ່ອນ.
ກອງປະຊຸມ ໄດ້ແບ່ງອອກເປັນ 3 ວາລະ ຄື: ວາລະປະຊຸມເຈລະຈາລະດັບສູງລະຫວ່າງ ລັດຖະບານ ແລະ ນັກທຸລະກິດ, ວາລະປຶກສາຫາລືປະຊາສຳພັນການລົງທຶນຂອງບໍລິສັດ ແລະ ພິທີເຊັນສັນຍາ ໂດຍລັດຖະບານໄດ້ຖືເອົານິຄົມອຸດສາຫະກໍາອັດສະລິຍະ ອາຊີ-ໂປຕາສ ສາກົນ ເປັນເຂດພັດທະນາລະດັບສູງໃໝ່. ກອງປະຊຸມຄັ້ງນີ້ ມີບັນດາບໍລິສັດຫຼາຍກວ່າ 100 ແຫ່ງ, ນັກລົງທຶນ ແລະ ອົງການການເງິນຕ່າງໆທີ່ມີຊື່ສຽງໃນ ສປ ຈີນ ເຂົ້າຮ່ວມ ເຊິ່ງໄດ້ສະແດງໃຫ້ທົ່ວໂລກ ເຫັນເຖິງທ່າແຮງການພັດທະນາຂອງ ສປປ ລາວ.
ການຈັດກອງປະຊຸມໃນຄັ້ງນີ້ ໄດ້ຮັບຜົນສຳເລັດຢ່າງມີປະສິດທິພາບ ແລະ ມີປະສິດທິຜົນສູງ, ໄດ້ສໍາເລັດການລົງນາມ ຈໍານວນ 10 ໂຄງການ, ລວມຍອດມູນຄ່າການລົງທຶນ 835 ລ້ານ ໂດລາ ຫຼື ປະມານ 15.100 ຕື້ກີບ, ໃນນັ້ນ ລວມມີບັນດາໂຄງການທີ່ກ່ຽວຂ້ອງກັບຕ່ອງໂສ້ອຸດສາຫະກຳເຊັ່ນ: ໂຄງການ ຄລໍ-ອັນຄາໄລ (chlor-alkali), ໂຄງການປຸງແຕ່ງໂບຣມິນ; ໂຄງການແບດເຕີຣີກະແສວາເນດຽມ/ສັງກະສີ-ໂບຣມິນ (Vanadium/zinc-bromine) ແລະ ໂຄງການອຸດສາຫະກໍາທີ່ພົ້ນເດັ່ນເຊັ່ນ: ວິທະຍາສາດຊີວະພາບວິທະຍາ ແລະ ການຜະລິດອັດສະລິຍະ ເຊິ່ງຄາດວ່າ ເມື່ອບັນດາໂຄງການທັງໝົດສຳເລັດ ລວມຍອດມູນຄ່າຜົນຜະລິດຂອງໂຄງການ ຈະສູງເກີນ 2 ຕື້ໂດລາ ຫຼື ປະມານ 36.200 ຕື້ ກີບ. ໂດຍອີງຕາມທິດຊີ້ນໍາຂອງພັກ, ລັດຖະບານ ແລະ ສະພາແຫ່ງຊາດ ກ່ຽວກັບ ການຮັກສາສະຖຽນລະພາບຂອງເສດຖະກິດ, ດຶງດູດການລົງທຶນຈາກຕ່າງປະເທດ, ສ້າງລາຍຮັບເງິນຕາຕ່າງປະເທດ, ທົດແທນການນຳເຂົ້າ, ນີ້ເປັນການຈັດຕັ້ງປະຕິບັດ ແລະ ເປັນອີກບາດກ້າວໜຶ່ງແຫ່ງການພັດທະນາເສດຖະກິດຂອງປະເທດລາວ.
+ ການແກ້ໄຂຄວາມຫຍຸ້ງຍາກດ້ານເສດຖະກິດ, ເປີດປະຕູສູ່ພາຍນອກ ແລະ ການພັດທະນາ ແມ່ນເປົ້າໝາຍສຳຄັນ.
ເພື່ອແນໃສ່ແກ້ໄຂບັນຫາການພັດທະນາເສດຖະກິດຂອງປະເທດລາວໃນປັດຈຸບັນຢ່າງມີປະສິດທິຜົນ ເຊັ່ນ: ໄພເງິນເຟີ້, ເງິນກີບອ່ອນຄ່າ ແລະ ຄັງສຳຮອງເງິນຕາຕ່າງປະເທດມີຈໍາກັດ. ໃນກອງປະຊຸມ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ວັນໄຊ ພອງສະຫວັນ ເຈົ້າແຂວງ ແຂວງຄໍາມ່ວນ, ທ່ານ Guo Baichun ປະທານ ບໍລິສັດ ອາຊີ-ໂປຕາສ ສາກົນ ຈໍາກັດ, ພ້ອມດ້ວຍ ກຸ່ມຜູ້ບໍລິຫານລະດັບສູງ ໄດ້ລົງເລິກປຶກສາຫາລືກ່ຽວກັບການລົງທຶນ ແລະ ການພັດທະນາຢູ່ ສປປ ລາວ.
ທ່ານ Guo Baichun ກ່າວວ່າ: ຄວາມຫຍຸ້ງຍາກດ້ານເສດຖະກິດ ທີ່ ສປປ ລາວ ກຳລັງປະເຊີນໜ້າໃນປັດຈຸບັນເປັນພຽງຊົ່ວຂະນະເທົ່ານັ້ນ, ການພັດທະນາເປັນວິທີທາງແກ້ໄຂທີ່ດີທີ່ສຸດ, ພຽງແຕ່ຕ້ອງຮັກສານະໂຍບາຍເປີດປະຕູສູ່ພາຍນອກຢ່າງມີສະຖຽນລະພາບ, ຂໍ້ໄດ້ປຽບຂອງປະເທດລາວ ຈະດຶງດູດການລົງທຶນນັບມື້ນັບຫຼາຍຂຶ້ນ, ທຸກບັນຫາສາມາດແກ້ໄຂໄດ້ ແລະ ບໍລິສັດ ອາຊີ-ໂປຕາສ ສາກົນ ມີຄວາມຍິນດີເປັນຢ່າງສູງໃນການຮ່ວມມືຊ່ວຍເຫຼືອ. ປະເທດລາວມີທ່າໄດ້ປຽບດ້ານຊັບພະຍາກອນທຳມະຊາດ, ພະລັງງານໄຟຟ້າ, ແຮງງານ ແລະ ຕະຫຼາດ ໂດຍລັດຖະບານລາວ ຖືເອົານິຄົມອຸດສາຫະກໍາອັດສະລິຍະ ອາຊີ-ໂປຕາສ ສາກົນ ເປັນເວທີ “ໃນການປະຊາສໍາພັນດຶງດູດການລົງທຶນຕ່າງປະເທດ” ເຊິ່ງໄດ້ຮັບຄວາມສົນໃຈຢ່າງຫຼວງຫຼາຍ ຈາກບັນດານັກທຸລະກິດຈີນ, ນັກລົງທຶນຈີນ ແລະ ອົງການການເງິນ. ຂ້າພະເຈົ້າ ສະເໜີໃຫ້ລັດຖະບານລາວ ຖືເອົາກາລະໂອກາດນີ້ເພື່ອຊຸກຍູ້ໃຫ້ນັກລົງທຶນຈີນ ໄປລົງທຶນຢູ່ປະເທດລາວ, ນຳໃຊ້ທ່າໄດ້ປຽບຂອງລາວເພື່ອເຊື່ອມໂຍງກັບຕະຫຼາດໂລກ ແລະ ຊຸກຍູ້ການພັດທະນາເສດຖະກິດຂອງລາວໃຫ້ມີຄວາມເຂັ້ມແຂງ ແລະ ໝັ້ນຄົງ. ປັດຈຸບັນ, ບັນດາວິສາຫະກິດຈີນຫຼາຍແຫ່ງມີຄວາມເຕັມໃຈຮ່ວມມືລົງທຶນ ໃນຂົງເຂດອຸດສາຫະກຳອະໂປຕາສ ຂອງ ນິຄົມອຸດສາຫະກໍາອັດສະລິຍະ ອາຊີ-ໂປຕາສ ສາກົນ, ເຊິ່ງເປັນການທົດແທນການນໍາເຂົ້າ ແລະ ສ້າງລາຍຮັບເງິນຕາຕ່າງປະເທດໂດຍການສົ່ງອອກ, ເປັນການເພີ່ມຄັງສຳຮອງເງິນຕາຕ່າງປະເທດ ສ້າງລາຍຮັບໃຫ້ປະຊາຊົນ, ແກ້ໄຂບັນຫາທີ່ປະເຊີນໃນປັດຈຸບັນ ເພື່ອການພັດທະນາໃນອະນາຄົດຂອງ ສປປ ລາວ.
ທ່ານ ມະໄລທອງ ກົມມະສິດ ກ່າວວ່າ: ເພື່ອແກ້ໄຂຄວາມຫຍຸ້ງຍາກດ້ານເສດຖະກິດໃນປັດຈຸບັນຢູ່ປະເທດລາວ, ຕ້ອງພັດທະນາເສດຖະກິດ ແລະ ເຮັດໃຫ້ພາກທຸລະກິດສາມາດແຂ່ງຂັນໄດ້. ຂ້າພະເຈົ້າ ສະໜັບສະໜູນແນວຄວາມຄິດທີ່ວ່າ: “ບໍ່ມີກະສິກຳ ບໍ່ມີສະຖຽນລະພາບ, ບໍ່ມີອຸດສາຫະກຳ ບໍ່ມີຄວາມເຂັ້ມແຂງ, ບໍ່ມີການຄ້າ ບໍ່ມີຄວາມຮັ່ງມີ”, ຈຶ່ງຈຳເປັນຕ້ອງຊຸກຍູ້ອຸດສາຫະກຳໃຫ້ເປັນເສົາຫຼັກສຳຄັນໃນການພັດທະນາ, ທົດແທນການນໍາເຂົ້າ ແລະ ສ້າງລາຍຮັບເງິນຕາຕ່າງປະເທດໂດຍການສົ່ງອອກ. ລັດຖະບານລາວ ຈະສ້າງສະພາບແວດລ້ອມການລົງທຶນໃຫ້ຢ່າງເປີດກ້ວາງ ແລະ ຮອບດ້ານ ເພື່ອດຶງດູດວິສາຫະກິດຈາກຕ່າງປະເທດເຂົ້າມາລົງທຶນຢູ່ລາວໃຫ້ຫຼາຍຂຶ້ນ ແລະ ສະໜັບສະໜູນໃຫ້ການພັດທະນາວິສາຫະກິດຂອງພວກເຂົາມີຄວາມເຂັ້ມແຂງ.
+ ຕີລາຄາຕໍ່ກັບນະໂຍບາຍສົ່ງເສີມການລົງທຶນເພື່ອເພີ່ມທະວີຄວາມໄວ້ເນື້ອເຊື່ອໃຈຂອງການລົງທຶນຕ່າງປະເທດ.
ເພື່ອໃຫ້ນັກລົງທຶນມີຄວາມເຂົ້າໃຈປະເທດລາວຫຼາຍຂຶ້ນ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ວັນໄຊ ພອງສະຫວັນ ເຈົ້າແຂວງ ແຂວງຄໍາມ່ວນ ແລະ ບໍລິສັດ ອາຊີ-ໂປຕາສ ສາກົນ ໄດ້ເຊື້ອເຊີນບັນດາບໍລິສັດລົງທຶນຂອງຈີນ ແລະ ອົງການການເງິນສາກົນ ເຂົ້າຮ່ວມກອງປະຊຸມພົບປະສົນທະນາໃນຄັ້ງນີ້, ໂດຍປິ່ນອ້ອມການເລັ່ງຊຸກຍູ້ການກໍ່ສ້າງຂອງໂຄງການ, ເລັ່ງປັບຕົວເຂົ້າກັບການພັດທະນາຂອງລາວ, ສະໜອງນະໂຍບາຍສະໜັບສະໜູນ ແລະ ແນວທາງຕ່າງໆ, ສຶກສາຄົ້ນຄ້ວາຄວາມຕ້ອງການຂອງວິສາຫະກິດທີ່ຈະເຂົ້າປະຈໍານິຄົມອຸດສາຫະກໍາ, ໃຫ້ຄໍາຕອບລະອຽດກ່ຽວກັບບັນຫາສໍາຄັນຕ່າງໆດ້ານແນວທາງນະໂຍບາຍ, ທ່າໄດ້ປຽບຂອງຊັບພະຍາກອນທຳມະຊາດ, ການພັດທະນາອຸດສາຫະກໍາ ແລະ ບັນຫາທີ່ສົນໃຈຕ່າງໆ. ກອງປະຊຸມ ໄດ້ຮັບການຕີລາຄາສູງຈາກບັນດາແຂກເຂົ້າຮ່ວມ ແລະ ໄດ້ເພີ່ມທະວີຄວາມໄວ້ເນື້ອເຊື່ອໃຈໃຫ້ແກ່ບັນດາວິສາຫະກິດຈີນ ເພື່ອເຂົ້າມາລົງທຶນຢູ່ ສປປ ລາວ.
ທ່ານ ມະໄລທອງ ກົມມະສິດ ກ່າວວ່າ: ເຖິງວ່າປັດຈຸບັນເສດຖະກິດໂລກຈະຕົກຢູ່ໃນສະພາບຖົດຖອຍກໍຕາມ, ແຕ່ອັດຕາການເຕີບໂຕເສດຖະກິດຂອງ ສປປ ລາວ ຍັງຢູ່ທີ່ 4,8%. ພາຍໃຕ້ ຂໍ້ລິເລີ່ມ “ໜຶ່ງແລວທາງ ໜຶ່ງເສັ້ນທາງ” ແລະ ຂອບການຮ່ວມມື “ແມ່ນ້ຳລ້ານຊ້າງ-ແມ່ນ້ຳຂອງ”, ການນໍາຂອງສອງປະເທດ ເອົາໃຈໃສ່ຢ່າງຕັ້ງໜ້າ ຮ່ວມກັນປັບປຸງກົນໄກການຮ່ວມມືຢ່າງຮອບດ້ານ, ສະໜັບສະໜູນນັກລົງທຶນຈີນເຂົ້າມາລົງທຶນໃນຂົງເຂດຕ່າງໆ ເປັນຕົ້ນ: ບໍ່ແຮ່, ອຸດສາຫະກໍາ, ກະສິກໍາ, ການທ່ອງທ່ຽວ, ການຂົນສົ່ງ ແລະ ອື່ນໆ; ຫວັງວ່າ ໂດຍຜ່ານເວທີ ນິຄົມອຸດສາຫະກໍາອັດສະລິຍະ ອາຊີ-ໂປຕາສ ສາກົນ ນີ້, ຈະສາມາດດຶງດູດນັກລົງທຶນໄດ້ຫຼາຍຂຶ້ນ.
ທ່ານ ວັນໄຊ ພອງສະຫວັນ ໄດ້ແນະນໍາ ກ່ຽວກັບ ທ່າແຮງຂອງແຂວງຄໍາມ່ວນ ໂດຍມີ 3 ທ່າແຮງຫຼັກ ຄື: ພະລັງງານ-ບໍ່ແຮ່, ກະສິກໍາ-ປ່າໄມ້ ແລະ ການບໍລິການ-ທ່ອງທ່ຽວ. ທ່ານກ່າວວ່າ: ບໍລິສັດ ອາຊີ-ໂປຕາສ ສາກົນ ເປັນບໍລິສັດ ທີ່ມີການພັດທະນາຢ່າງວ່ອງໄວ ແລະ ມີຄຸນນະພາບ ເຊິ່ງກວມເອົາອັດຕາສ່ວນການລົງທຶນຕ່າງປະເທດຫຼາຍທີ່ສຸດຢູ່ແຂວງຄຳມ່ວນ, ເຂດນິຄົມອຸດສາຫະກຳອາຊີ-ໂປຕາສ ສາກົນ ມີທ່າອ່ຽງວ່າ ຈະພັດທະນາຢ່າງກ້ວາງໄກ, ແຂວງຄຳມ່ວນ ຍິນດີຕ້ອນຮັບບັນດາວິສາຫະກິດຈີນ ເຂົ້າມາລົງທຶນ ແລະ ຍິນດີໃຫ້ການສະໜັບສະໜູນອຳນວຍຄວາມສະດວກຢ່າງເຕັມສວ່ນ.
+ ຮູບແບບຂອງນິຄົມອຸດສາຫະກຳ ຊ່ວຍດຶງດູດການລົງທຶນໄດ້ຢ່າງຊັດເຈນ ແລະ ເຊື່ອມໂຍງລະບົບຕ່ອງໂສ້ອຸດສາຫະກຳໂລກ
ໃນໂອກາດດຽວກັນນັ້ນ, ກອງປະຊຸມປະຊາສໍາພັນການລົງທຶນ ແລະ ພິທີເຊັນສັນຍາລົງທຶນ ຢູ່ນິຄົມອຸດສາຫະກໍາອັດສະລິຍະ ອາຊີ-ໂປຕາສ ສາກົນ ໄດ້ໄຂຂຶ້ນຢ່າງເປັນທາງການ. ເຂົ້າຮ່ວມເປັນສັກຂີພະຍານໃນການເຊັນສັນຍາຄັ້ງນີ້ ໂດຍມີ ທ່ານ ມະໄລທອງ ກົມມະສິດ, ທ່ານ ວັນໄຊ ພອງສະຫວັນ, ທ່ານໄຊຊະນະ ສິດທິພອນ ຮອງປະທານ ຄະນະກໍາມະການຮ່ວມມືລາວ-ຈີນ, ທ່ານ ສົມຈິດ ອິນທະມິດ ທີ່ປຶກສາສະພາການຄ້າ ແລະ ອຸດສາຫະກໍາແຫ່ງຊາດລາວ, ທ່ານ Guo Baichun ປະທານ ບໍລິສັດ ອາຊີ-ໂປຕາສ ສາກົນ ຈໍາກັດ, ທ່ານ Chen Jing ຮອງເຈົ້ານະຄອນ ນະຄອນ ຮ່ວຍຮວາ ສປ ຈີນ, ທ່ານ Wang Xiaokang ປະທານ ສະມາຄົມອຸດສາຫະກໍາປະຢັດພະລັງງານ ແລະ ການຜະລິດສະອາດ ສປ ຈີນ ແລະ ທ່ານ Wang Xiaofeng ປະທານ ສະມາຄົມເກືອອະນົງຄະທາດ ສປ ຈີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທິ, ອາຊີ-ໂປຕາສ ສາກົນ ໄດ້ຈັດສະແດງໃຫ້ເຫັນ ກ່ຽວກັບ ການວາງແຜນນິຄົມອຸດສາຫະກໍາອັດສະລິຍະ, ສະພາບການກໍ່ສ້າງ ແລະ ດໍາເນີນກິດຈະການ. ຮູບພາບການວາງແຜນນິຄົມອຸດສາຫະກໍາທີ່ສວຍງາມ ແລະ ທັນສະໄໝ, ການກໍ່ສ້າງໂຄງການທີ່ກໍາລັງຄຶກຄື້ນ, ສະພາບການຜະລິດທີ່ບໍ່ມີເວລາຫວ່າງ ແຕ່ເປັນລະບຽບ, ສາຍການຜະລິດທີ່ມີມາດຕະຖານວິຊາສະເພາະ, ຊຸດປະກອບນິຄົມອຸດສາຫະກໍາທີ່ສົມບູນແບບ ແລະ ຮູບພາບອື່ນໆ ໄດ້ສະແດງໃຫ້ເຫັນເຖິງທ່າອ່ຽງການພັດທະນາອັນເຂັ້ມແຂງຂອງນິຄົມອຸດສາຫະກໍາທີ່ເລີ່ມຈາກສູນ, ຈາກນ້ອຍຫາໃຫຍ່ ແລະ ຈາກໃຫຍ່ຫາເຂັ້ມແຂງ.
ໃນພິທິລົງນາມ, ທ່ານ ມະໄລທອງ ກົມມະສິດ ໄດ້ເຊື້ອເຊີນບັນດານັກທຸລະກິດ ແລະ ນັກລົງທຶນ ສປ ຈີນ. ທ່ານກ່າວວ່າ: ປະເທດລາວ ແລະ ປະເທດຈີນເປັນປະເທດເພື່ອນບ້ານທີ່ມີສາຍພູ ແລະ ສາຍນໍ້າຕິດຈອດກັນ, ປັດຈຸບັນ ສປ ຈີນ ໄດ້ກາຍເປັນປະເທດທີ່ລົງທຶນລາຍໃຫຍ່ທີ່ສຸດຂອງລາວ, ທັງສອງຝ່າຍມີທ່າແຮງພັດທະນາອຸດສາຫະກໍາ ແລະ ກະສິກໍາທັນສະໄໝ ບົນພື້ນຖານຫຼັກການ ຮ່ວມປະດິດສ້າງ, ຮ່ວມແບ່ງປັນ ແລະ ຮ່ວມຜົນປະໂຫຍດ. ອຸດສາຫະກໍາແຮ່ທາດ ແລະ ເຄມີ ຖືກກໍານົດເປັນ 1 ໃນ 8 ອຸດສາຫະກໍາບູລິມະສິດ ໃນແຜນພັດທະນາອຸດສາຫະກໍາປຸງແຕ່ງປີ 2021-2025 ຂອງ ສປປ ລາວ, ແຂວງຄໍາມ່ວນ ຖືກກໍານົດເປັນ 1 ໃນ 5 ຈຸດສູນກາງພັດທະນາເສດຖະກິດຂອງປະເທດ, ເຊິ່ງທັງໝົດນີ້ລ້ວນແຕ່ເປັນການສະໜັບສະໜູນທີ່ແຂງແກ່ນ ໃນການກໍ່ສ້າງນິຄົມອຸດສາຫະກໍາໝູນວຽນອັດສະລິຍະ ອາຊີ-ໂປຕາສ ສາກົນ. ລັດຖະບານລາວ ຈະໃຫ້ການສະໜັບສະໜູນຢ່າງເຕັມສ່ວນຕໍ່ການພັດທະນານິຄົມອຸດສາຫະກໍາ, ຫວັງຢ່າງຍິ່ງວ່າ ພາຍໃຕ້ການເຂົ້າຮ່ວມກໍ່ສ້າງຂອງທຸກຝ່າຍ, ນິຄົມອຸດສາຫະກໍາ ຈະກາຍເປັນໜຶ່ງໃນຕົວແບບທີ່ດີໃນການພັດທະນາອຸດສາຫະກໍາປຸງແຕ່ງແຮ່ທາດແບບຄົບວົງຈອນ, ປະກອບສ່ວນເຂົ້າສ້າງລາຍຮັບແກ່ງົບປະມານແຫ່ງຊາດ, ພັດທະນາທ້ອງຖິ່ນ ແລະ ສ້າງຊື່ສຽງໃຫ້ແກ່ອຸດສາຫະກໍາບໍ່ແຮ່ລາວ.
ທ່ານ ວັນໄຊ ພອງສະຫວັນ ເຈົ້າແຂວງ ແຂວງຄໍາມ່ວນ ໄດ້ຢືນຢັນຕໍ່ຄວາມສໍາຄັນຍິ່ງຂອງນິຄົມອຸດສາຫະກໍາໝູນວຽນອັດສະລິຍະ ອາຊີ-ໂປຕາສ ສາກົນ. ທ່ານກ່າວວ່າ: ນິຄົມອຸດສາຫະກໍາດັ່ງກ່າວ ເປັນການພັດທະນາຊັບພະຍາກອນແບບນະວັດຕະກໍາໃໝ່, ຈະຊ່ວຍທ້ອງຖິ່ນສ້າງລະບົບອຸດສາຫະກໍາທີ່ສົມບູນ, ເຊິ່ງມີບົດບາດສໍາຄັນທີ່ສຸດຕໍ່ການພັດທະນາເສດຖະກິດຂອງແຂວງຄໍາມ່ວນ ກໍຄືຂອງ ສປປ ລາວ. ແຂວງຄໍາມ່ວນຈະອີງໃສ່ 3 ທ່າແຮງ, ໂດຍຖືເອົານິຄົມອຸດສາຫະກໍາໝູນວຽນອັດສະລິຍະ ອາຊີ-ໂປຕາສ ສາກົນ ເປັນໃຈກາງພັດທະນາ, ປັບປຸງການເຊື່ອມໂຍງບັນດາວິສາຫະກິດຈີນ ທີ່ມີຄຸນນະພາບ, ບົນພື້ນຖານການເຄົາລົບຂໍ້ກໍານົດກົດໝາຍ ແລະ ລະບຽບການຂອງລາວ, ຊຸກຍູ້ການລົງທຶນທີ່ອໍານວຍຄວາມສະດວກ, ວ່ອງໄວ, ໂປ່ງໃສ ແລະ ຍຸດຕິທໍາ, ສ້າງສະພາບແວດລ້ອມການລົງທຶນທີ່ປອດໄພ ແລະ ເຊື່ອຖືໄດ້, ຍິນດີຕ້ອນຮັບບັນດາວິສາຫະກິດລົງທຶນເຂົ້າມາຮ່ວມກັນພັດທະນາ ແລະ ເສີມຂະຫຍາຍຕະຫຼາດຢູ່ແຂວງຄໍາມ່ວນ, ສືບຕໍ່ສ້າງຕ່ອງໂສ້ອຸດສາຫະກໍາຂະໜາດໃຫຍ່ ແລະ ເຂັ້ມແຂງ, ສ້າງຕົວແບບການຮ່ວມມືເສດຖະກິດລາວ-ຈີນ, ບັນລຸຮູບແບບໃໝ່ຂອງການພັດທະນາແບບຫຼາຍຝ່າຍ ແລະ ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ.
ທ່ານ Ma Yingjun ອໍານວຍການ ບໍລິສັດ ອາຊີ-ໂປຕາສ ສາກົນ ຈໍາກັດ ໄດ້ສະແດງຄວາມຂອບອົກຂອບໃຈຕໍ່ລັດຖະບານລາວ, ທ່ານກ່າວວ່າ: ອາຊີ-ໂປຕາສ ສາກົນ ໄດ້ກາຍເປັນວິສາຫະກິດຝຸ່ນໂປຕາສ ລະດັບສາກົນ ທີ່ມີຊັບພະຍາກອນເກືອໂປຕາສຫຼາຍທີ່ສຸດໃນອາຊີ, ມີຂະໜາດໃຫຍ່ທີ່ສຸດໃນອາຊີອາຄະເນ ແລະ ມີການຜະລິດທີ່ໄວທີ່ສຸດໃນໂລກ, ເຊິ່ງເບື້ອງຫຼັງຂອງຄວາມສໍາເລັດ “ຄວາມໄວຂອງອາຊີ-ໂປຕາສ” ແລະ “ຕໍານານຂອງລາວ” ແມ່ນມາຈາກການສະໜັບສະໜູນອັນແຮງກ້າ ແລະ ການຊີ້ນໍາຢ່າງໄກ້ຊິດຂອງລັດຖະບານລາວ. ໃນນາມເປັນໂຄງການສັນຍາລັກຂອງການຮ່ວມມືລະຫວ່າງ ພາກ-ລັດ ແລະ ວິສາຫະກິດຈີນ, ນິຄົມອຸດສາຫະກໍາ ໄດ້ລວມເອົາການກໍ່ສ້າງຫັນເປັນອຸດສາຫະກໍາ, ຫັນເປັນຕົວເມືອງ ແລະ ຫັນກະສິກໍາເປັນທັນສະໄໝ, ພ້ອມທັງຊຸກຍູ້ຂະແໜງການບໍລິການ ເລັ່ງການພັດທະນາ, ຄຽງຄູ່ກັບການເພີ່ມທະວີຢ່າງຄວາມອາດສາມາດພັດທະນາຕົນເອງແບບຍືນຍົງຂອງບັນດາວິສາຫະກິດ, ຊຸກຍູ້ ສປປ ລາວ ໃນການປະກອບສ້າງອຸດສາຫະກໍາທົດແທນການນໍາເຂົ້າ ແລະ ການສົ່ງອອກເພື່ອສ້າງລາຍຮັບເງິນຕາຕ່າງປະເທດ. ຢູ່ໃນດິນແດນທີ່ອຸດົມສົມບູນ ສໍາລັບການລົງທຶນທີ່ມີການພັດທະນາຢ່າງວ່ອງໄວຂອງປະເທດລາວ, ພວກຂ້າພະເຈົ້າ ມີຄວາມໝັ້ນໃຈໃນການເຕີມກໍາລັງວັງຊາ ໃໝ່ຢ່າງບໍ່ຂາດເຂົ້າໃນການຮ່ວມມືລາວ-ຈີນ.
ທ່ານ Tong Yongheng ຮອງອໍານວຍການບໍລິສັດ ອາຊີ-ໂປຕາສ ສາກົນ ກ່າວວ່າ: ນິຄົມອຸດສາຫະກໍາໝູນວຽນອັດສະລິຍະອາຊີ-ໂປຕາສ ສາກົນ ແບ່ງເປັນ 3 ພາກສ່ວນໃຫຍ່ຄື: ເຂດອຸດສາຫະກໍາຝຸ່ນໂປຕາສ, ເຂດອຸດສາຫະກໍາອະໂປຕາສ ແລະ ເຂດຕົວເມືອງອາຊີ-ໂປຕາສ, ເຊິ່ງກວມເນື້ອທີ່ດິນທັງໝົດ 2.000 ເຮັກຕາ, ຄາດຄະເນການລົງທຶນທັງໝົດຈະບັນລຸເຖິງ 4,31 ຕື້ ໂດລາ. ປັດຈຸບັນຍັງຢູ່ໃນໄລຍະສົ່ງເສີມ ແລະ ດຶງດູດການລົງທຶນ, ຄາດຄະເນໃນທ້າຍປີ 2026 ຈະສໍາເລັດວຽກງານກໍ່ສ້າງໂຄງການໄລຍະກາງ, ເຊິ່ງລວມມີການກໍ່ສ້າງເຂດອຸດສາຫະກໍາເຄມີເກືອທີ່ຕິດພັນກັບຂະໜາດໂຄງການຝຸ່ນໂປຕາສ 5 ລ້ານໂຕນ; ທ້າຍປີ 2028 ຈະສໍາເລັດວຽກງານກໍ່ສ້າງໂຄງການທັງໝົດ. ໃນອະນາຄົດ, ຈະສືບຕໍ່ດຶງດູດນັກລົງທຶນ, ເພີ່ມທະວີການໝູນໃຊ້ຊັບພະຍາກອນແບບໝູນວຽນຂອງອຸດສາຫະກໍາຕົ້ນນໍ້າ ແລະ ປາຍນໍ້າ, ສ້າງລະບົບນິເວດຕ່ອງໂສ້ອຸດສາຫະກໍາຢ່າງຮອບດ້ານ, ຮ່ວມກັນກັບລັດຖະບານລາວ ເພື່ອຊຸກຍູ້ການພັດທະນາການຫັນອຸດສາຫະກໍາທັນສະໄໝ, ການຫັນກະສິກໍາທັນສະໄໝ ແລະ ການຫັນເປັນຕົວເມືອງ.
ທ່ານ Cao Lixiang ປະທານ ບໍລິສັດ ເຫິງກວງ ຮຸ້ນສ່ວນ ຈໍາກັດ ຕາງໜ້າບັນດາວິສາຫະກິດທີ່ເຊັນສັນຍາຄັ້ງນີ້ກ່າວວ່າ: ໂຄງການ ຄລໍ-ອັນຄາໄລ (chlor-alkali) ໃນນິຄົມອຸດສາຫະກໍາໝູນວຽນອັດສະລິຍະອາຊີ-ໂປຕາສສາກົນ ເປັນໂຄງການລົງທຶນຕ່າງປະເທດແຫ່ງທໍາອິດຂອງບໍລິສັດ, ປັດຈຸບັນ ການກໍ່ສ້າງໂຄງການ ຄລໍ-ອັນຄາໄລ ເນື້ອເຫຍື່ອໄອອອນ (ion membrane chlor-alkali) ຂະໜາດ 30.000 ໂຕນ/ປີ ໄລຍະທີ 1 ກໍາລັງດໍາເນີນຢ່າງເຄັ່ງຮ້ອນ ແລະ ຈະສໍາເລັດໃນທ້າຍເດືອນກັນຍາປີນີ້. ໃນອະນາຄົດ, ບໍລິສັດ ຈະຕັ້ງຖານການຜະລິດຢູ່ລາວ, ໃນດ້ານໜຶ່ງ ແມ່ນຖືເອົາຕ່ອງໂສ້ອຸດສາຫະກໍາໃນນິຄົມເປັນພື້ນຖານ, ກໍ່ສ້າງໂຄງການທີ່ມີທ່າແຮງ ເຊັ່ນ: ໂຊດຽມ, ແມກນີຊຽມ, ຊູນຟູຣິກ, ຄລໍຣິນ ແລະ ອຸດສາຫະກໍາເຄມີອື່ນໆ. ອີກດ້ານໜຶ່ງ ແມ່ນກໍາແໜ້ນກາລະໂອກາດແຫ່ງປະຫວັດສາດ, ກໍ່ສ້າງໂຄງການປຸ໋ຍເຄມີ ແລະ ຢາປາບສັດຕູພືດ ຈໍານວນໜຶ່ງ, ຊຸກຍູ້ການພັດທະນາກະສິກໍາໄປສູ່ອຸດສາຫະກໍາ ຂອງລາວ, ຮັບພາລະໜ້າທີ່ຄວາມຮັບຜິດຊອບດ້ານສັງຄົມ. ພາຍໃຕ້ຂໍ້ລິເລີີ່ມ “ໜຶ່ງແລວ ໜຶ່ງເສັ້ນທາງ”, ອີງໃສ່ຂໍ້ໄດ້ປຽບດ້ານຊັບພະຍາກອນທໍາມະຊາດທີ່ອຸດົມສົມບູນ ແລະ ສະພາບແວດລ້ອມການລົງທຶນທີ່ດີຂອງປະເທດລາວ, ໂດຍອາໄສນິຄົມອຸດສາຫະກໍາໝູນວຽນອັດສະລິຍະອາຊີ-ໂປຕາສ ສາກົນ, ເພື່ອບັນລຸເປົ້າໝາຍ ຕ່າງຝ່າຍຕ່າງໄດ້ຮັບຜົນປະໂຫຍດ ໃນຍຸດທະສາດການພັດທະນາຢູ່ຕ່າງປະເທດຂອງບໍລິສັດ ແລະ ການພັດທະນາເສດຖະກິດ ແລະ ສັງຄົມຂອງ ສປປ ລາວ.
ໂຄງການທີ່ເຊັນສັນຍາຄັ້ງນີ້ ມີ: ໂຄງການ ໂບຣມິນ (Bromine), ໂຊດຽມ ຄລໍເຣດ, ຄລໍ-ອັນຄາໄລ, ອາຊິດ ນິຕຣິກ, ເກືອອຸດສາຫະກໍາ, ແຄນຊຽມ ຄາໄບ/PVC ແລະ ອື່ນໆ, ພ້ອມທັງ ມີໂຄງການກະສິກໍາທັນສະໄໝ ເປັນຕົ້ນ ໂຄງການປູກເຂົ້າ ແລະ ອື່ນໆ, ໂຄງການທີ່ກ່ຽວຂ້ອງກັບການພັດທະນາໝູນໃຊ້ຊັບພະຍາກອນ ແລະ ການຜະລິດອັດສະລິຍະ. ການເຊັນສັນຍາຢ່າງເປັນທາງການທີ່ຕິດພັນຂອງວິສາຫະກິດ ເປັນຄວາມສໍາເລັດບາດກ້າວໜຶ່ງຂອງຕ່ອງໂສ້ອຸດສາຫະກໍາ ແລະ ເປັນກໍາລັງວັງຊາໃໝ່ໃຫ້ແກ່ການສ້າງ ສປປ ລາວ ເປັນບ່ອນຮອງຮັບການຍົກຍ້າຍຕ່ອງໂສ້ອຸດສາຫະກໍາຈາກທົ່ວໂລກ.
ພາຍໃຕ້ການເອົາໃຈໃສ່ຊີ້ນຳນຳພາຢ່າງຕັ້ງໜ້າຂອງພັກ ແລະ ລັດຖະບານລາວ ໃນການສ້າງສະພາບແວດລ້ອມການລົງທຶນທີ່ປອດໄພ ແລະ ເຊື່ອຖືໄດ້, ໂດຍຖືຮູບແບບນິຄົມອຸດສາຫະກໍາທີ່ຕາງໜ້າໂດຍ ນິຄົມອຸດສາຫະກໍາໝູນວຽນອັດສະລິຍະ ອາຊີ-ໂປຕາສ ສາກົນ ຈະກາຍເປັນເຂດພັດທະນາລະດັບສູງໃໝ່ ທີ່ຊຸກຍູ້ການພັດທະນາອຸດສາຫະກໍາຂອງລາວ.
ຂ່າວ: ອາຊີ-ໂປຕາສ ສາກົນ
