ຝ່າຍຄວາມປອດໄພ ສຸຂະພາບອະນາໄມ ສິ່ງແວດລ້ອມ ແລະ ຄຸນນະພາບ ຮ່ວມກັບ ຝ່າຍປະຕິບັດການບໍ່ແຮ່ ບໍລິສັດໄຟຟ້າຫົງສາຈໍາກັດ ຈັດກິດຈະກໍາປູກຕົ້ນໄມ້ (HPC’s Planting Day 2023) ທີ່ ບໍລິເວນພື້ນທີ່ຖິ້ມດິນ (Main dump) ໃນວັນທີ 12 ກໍລະກົດ ນີ້ ໂດຍໄດ້ຮັບກຽດຈາກ ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດໄຟຟ້າຫົງສາ ຈໍາກັດ ເຂົ້າຮ່ວມເປັນປະທານໃນການກ່າວເປີດງານ ໂດຍມີຄະນະຜູ້ບໍລິຫານ ແລະ ພະນັກງານບໍລິສັດ, ພະນັກງານ O&M ແລະ ບໍລິສັດຜູ້ຮັບເໝົາພາຍໃນໂຄງການໄຟຟ້າຫົງສາ ເຂົ້າຮ່ວມກິດຈະກໍາ 200 ກວ່າຄົນ.
ຕົ້ນໄມ້ທີ່ນໍາມາປູກໃນປີນີ້ມີ 10 ຊະນິດ ເຊັ່ນ: ຕົ້ນຄູນ, ຈາມຈຸລີ, ກະຖິນເທພາ, ຕະແບກ, ໄມ້ດູ່, ໝາກກອກ, ໄມ້ຄ່າ, ຕົ້ນໝາກຮອກການີ, ຍົມຫີນ ແລະ ຕົ້ນຫວ້າ ລວມທັງໝົດ 1.000 ຕົ້ນ ຊຶ່ງກິດຈະກໍາ HPC’s Planting Day ຈັດຂຶ້ນເປັນປະຈໍາທຸກປີ ໂດຍເລີ່ມແຕ່ປີ 2012 ເປັນຕົ້ນມາ ໂດຍມີພື້ນທີ່ ທີ່ໄດ້ຮັບການຟື້ນຟູຕັ້ງແຕ່ປີ 2012 ຈົນເຖິງປັດຈຸບັນເປັນຈໍານວນ 248 ເຮັກຕາ ປູກຕົ້ນໄມ້ໄປແລ້ວ 660.000 ກວ່າຕົ້ນ ຈຸດປະສົງເພື່ອຟື້ນຟູລະບົບນິເວດ, ສົ່ງເສີມໃຫ້ພະນັກງານທຸກຄົນພາຍໃນໂຄງການ ໃຫ້ມີສ່ວນຮ່ວມໃນການອະນຸລັກສິ່ງແວດລ້ອມ ແລະ ຊັບພະຍາກອນປ່າໄມ້ ຕະຫຼອດເຖິງການພັດທະນາພື້ນທີ່ອ້ອມຂ້າງໂຄງການໂຮງໄຟຟ້າພະລັງງານຄວາມຮ້ອນຫົງສາ ໃຫ້ເປັນພື້ນທີ່ສີຂຽວ, ເປັນໂຮງໄຟຟ້າທີ່ເປັນມິດກັບສິ່ງແວດລ້ອມ ແລະ ຊຸມຊົນ ຕາມມາດຕະຖານການຈັດການສິ່ງແວດລ້ອມລະດັບສາກົນ ISO 14001:2015.
(ຂ່າວ-ພາບ: ໄຟຟ້າ ຫົງສາ)
