ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 12 ກໍລະກົດນີ້ ພາຍໃຕ້ການເປັນປະທານຂອງ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ. ກອງປະຊຸມໄດ້ຮັບຟັງການສະເໜີຮ່າງກົດໝາຍວ່າດ້ວຍ ທະນາຄານທຸລະກິດ ສະບັບປັບປຸງ ຊຶ່ງເປັນການສະເໜີປັບປຸງເປັນຄັ້ງທີ 2 ຫຼັງຈາກທີ່ໄດ້ປັບປຸງມາແລ້ວ 1 ຄັ້ງ ໃນປີ 2006. ຈາກນັ້ນ, ບັນດາທ່ານສະມາຊິກສະພາແຫ່ງຊາດ (ສສຊ) ກໍໄດ້ສຸມໃສ່ປະກອບຄໍາເຫັນໃສ່ຮ່າງກົດໝາຍດັ່ງກ່າວ.
ທ່ານ ຄຳແສນ ສີສຸວົງ ສສຊ ເຂດ 9 ແຂວງຊຽງຂວາງ ໄດ້ປະກອບຄໍາເຫັນວ່າ: ເນື້ອໃນຮ່າງກົດໝາຍສະບັບນີ້, ຍັງບໍ່ທັນເຫັນວ່າ ບັນຫາຄວາມເພິ່ງພໍໃຈຂອງລູກຄ້າ ທີ່ມາໃຊ້ບໍລິການທະນາຄານ ຍັງບໍ່ມີມາດຕາໃດທີ່ເປັນລັກສະນະແກ້ໄຂ ຫຼື ປັດໄຈທີ່ເປັນຕົ້ນຕໍເຮັດໃຫ້ທະນາຄານທຸລະກິດມີຄວາມເຂັ້ມແຂງເຕີບໃຫຍ່ ກໍຍັງບໍ່ທັນເຫັນ ອັນໃດທີ່ເນັ້ນໜັກເປັນຕົ້ນຕໍ. ສະນັ້ນ, ຈຶ່ງສະເໜີຄະນະຮັບຜິດຊອບຮ່າງກົດໝາຍ ຄົ້ນຄວ້າ ແລະ ເພີ່ມອີກ 1 ພາກ ວ່າດ້ວຍລູກຄ້າຂອງທະນາຄານ ວ່າມີພາລະບົດບາດ, ມີສິດໜ້າທີ່ແນວໃດ? ຊຶ່ງທ່ານໄດ້ໃຫ້ເຫດຜົນວ່າ:
ເນື່ອງຈາກທະນາຄານທຸລະກິດ ກໍໝາຍເຖິງການເຮັດທຸລະກິດເປັນຫຼັກການພື້ນຖານ. ການດຳເນີນທຸລະກິດຈະປະສົບຜົນສຳເລັດ ຕົ້ນຕໍກໍແມ່ນລູກຄ້າ ຊຶ່ງລູກຄ້າເປັນສິ່ງສຳຄັນ; ຜ່ານມາມີບາງທຸລະກິດໃນດ້ານນີ້ ຍັງບໍ່ຖືເອົາລູກຄ້າເປັນສິ່ງສຳຄັນ ຊຶ່ງອາດຈະເຮັດໃຫ້ທຸລະກິດ ບໍ່ສາມາດແຂ່ງຂັນໄດ້, ຫຼາຍທະນາຄານທຸລະກິດໃນໂລກ ຖືເອົາລູກຄ້າເປັນບັນຫາທີ່ສໍາຄັນ ແລະ ຕົ້ນຕໍທີ່ພາໃຫ້ທະນາຄານມີຜົນສຳເລັດ. ນອກນີ້, ການໃຫ້ຄວາມສຳຄັນຂອງລູກຄ້າ ນອກຈາກຈະພາໃຫ້ທະນາຄານເຕີບໂຕແລ້ວ ກໍຍັງເປັນການຕິດຕາມກວດກາໃຫ້ຫຸ້ນສ່ວນ ຫຼື ຜູ້ລົງທຶນໃນທະນາຄານ ເພາະລູກຄ້າມີຄວາມສຳຄັນດ້ານການປະເມີນພາຍນອກ ອັນເປັນປະໂຫຍດແກ່ຜູ້ລົງທຶນນັ້ນໆ ເປັນຕົ້ນການຕິດຕາມການເຮັດວຽກຂອງພະນັກງານໃນທະນາຄານ ເຮັດວຽກດີບໍ່?, ມີການນໍາພາດີບໍ່? ແລະ ລູກຄ້າມີຄວາມເພິ່ງພໍໃຈດ້ານໃດແດ່?. ຖ້າເຮົາບໍ່ໃຫ້ກຽດ, ໃຫ້ສິດ ແລະ ບໍ່ໃຫ້ພາລະບົດບາດແກ່ລູກຄ້າຜູ້ໄປໃຊ້ບໍລິການທະນາຄານ ກໍເຮັດໃຫ້ຜູ້ບໍລິການປັບປຸງຍາກ.
ພ້ອມດຽວກັນນີ້, ທ່ານກໍຍັງສະເໜີວ່າ: ຢາກໃຫ້ມີມາດຕາໜຶ່ງ ເພື່ອໃຫ້ສະພາຜູ້ຖືຫຸ້ນ ຫຼື ສະພາບໍລິຫານ ມີສິດໜ້າທີ່ກ່ຽວກັບການພິຈາລະນາເງິນກູ້ນໍາ ເພື່ອຈະເຮັດໃຫ້ບັນຫາໜີ້ບໍ່ເກີດດອກອອກຜົນ ຫຼື ການປ່ອຍກູ້ ເພື່ອຊຸກຍູ້ສົ່ງເສີ່ມພາກທຸລະກິດໃຫ້ດີຂຶ້ນ.
(ຂ່າວ-ພາບ: ສຸກສະຫວັນ)
