ແຫລ່ງຂ່າວຈາກແຂວງຈຳປາສັກ ໃຫ້ຮູ້ວ່າ: ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະ ການຄ້າແຂວງຈໍາປາສັກ ສົມທົບກັບບໍລິສັດ ບໍລິການ ການຄ້າປາກເຊ ແລະ ໜ່ວຍງານຈັດສັນຕະຫລາດໃໝ່ປາກເຊ ລົງເຄື່ອນໄຫວຕິດຕາມກວດກາ ແລະ ຊຸກຍູ້ການບໍລິການຊື້-ຂາຍ ຕາມຈຸດຊື້-ຂາຍຕ່າງໆ ພາຍໃນຕະຫລາດໃໝ່ປາກເຊ ໃນວັນທີ 6 ມິຖຸນາ 2023 ເພື່ອເຮັດໃຫ້ການຄຸ້ມຄອງການຊື້-ຂາຍ ໃຫ້ຖືກຕ້ອງຕາມລະບຽບການ ແນ່ໃສ່ປົກປ້ອງສິດຜົນປະໂຫຍດອັນຊອບທຳຂອງຜູ້ຊົມໃຊ້ ທັງເຮັດໃຫ້ສັງ ຄົມມີຄວາມຍຸຕິທຳ.
ທ່ານ ສົມພອນ ລາດສິນສະຫງວນ ຮອງອໍານວຍການບໍລິສັດ ບໍລິການ ການຄ້າ ປາກເຊ ໄດ້ລາຍງານສະ ພາບການຄຸ້ມຄອງ, ການເຄື່ອນໄຫວຂອງຄະນະນໍາຕະຫລາດ ຕໍ່ກັບການຊື້, ການຂາຍ ແລະ ການບໍລິການໃນຕະຫລາດໃໝ່ປາກເຊ, ເຊິ່ງການຊື້-ການຂາຍໃນລະດູຝົນ ເຫັນວ່າຫລຸດລົງ ໂດຍສະເພາະແມ່ນການຂາຍສະບຽງອາຫານ, ຜູ້ຄ້າ-ຂາຍຈໍານວນໜຶ່ງ ອອກໄປຂາຍຢູ່ຕາມແຄມທາງ ແລະ ພື້ນທີ່ຂອງຕົນເອງ. ພ້ອມນີ້ ຍັງຍົກໃຫ້ເຫັນການຄຸ້ມຄອງການນໍາໃຊ້ຊິງຊັ່ງ ຂອງພໍ່ຄ້າ-ແມ່ຄ້າຈໍານວນໜຶ່ງ ເປັນຕົ້ນ ການຂາຍປາ ທີ່ນໍາໃຊ້ຊິງຊັ່ງບໍ່ໄດ້ຕາມມາດຕະຖານເຕັກນິກ ການນຳໃຊ້ ໃນການບໍລິການຊື້-ຂາຍ ພາຍໃນຕະຫລາດໃໝ່ປາກເຊ ເຊິ່ງໜ່ວຍງານທີ່ກ່ຽວຂ້ອງຂອງຕະຫລາດ ໄດ້ແນະນໍາຕັກເຕືອນ ແລະ ສຶກສາອົບຮົມ ຕໍ່ຜູ້ລະເມີດ ຖ້າເຮັດອີກ ກໍຈະໄດ້ດໍາເນີນ ຕາມລະບຽບການ.
ໂອກາດນີ້, ທ່ານ ບຸນຍະເດດ ທອງສະຫວັນ ໄດ້ແນະນໍາໃຫ້ການນໍາບໍລິສັດດັ່ງກ່າວ ເອົາໃຈໃສ່ເຂົ້າຮ່ວມລະບອບສ່ອງແສງລາຍງານ ການເຄື່ອນໄຫວຄຸ້ມຄອງຕະຫລາດ ຕໍ່ການນໍາພະແນກອຸດສາຫະກໍາ-ການຄ້າແຂວງ ແລະ ຂະແໜງການກ່ຽວຂ້ອງ ຢ່າງເປັນປົກ ກະຕິ ເພື່ອເຮັດໃຫ້ການຈັດຕັ້ງປະຕິບັດ ໄປໃນທິດທາງດຽວກັນ; ເອົາໃຈໃສ່ປະຕິບັດມາດຕະການໃນການຄຸ້ມຄອງການຊື້-ການຂາຍສິນຄ້າອຸປະໂພກ-ບໍລິໂພກ ຢູ່ໃນຕະຫລາດ ໃຫ້ຖືກຕ້ອງຕາມລະບຽບການ, ການຕິດຕາມຊຸກຍູ້ວຽກງານວິຊາສະເພາະ, ກວດກາຄືນ ການອອກທະບຽນວິສາຫະກິດ ໃຫ້ແກ່ຜູ້ເຄື່ອນໄຫວຊື້-ຂາຍຢູ່ຕະຫລາດ ໂດຍສະເພາະແມ່ນຮ້ານຊື້-ຂາຍວັດຖຸມີຄ່າ ລວມທັງການປະຕິບັດບັນດານິຕິກໍາ ໃນການຄຸ້ມຄອງ ການຊື້-ການຂາຍຢູ່ຕະຫລາດ ກໍໃຫ້ກວດກາຄືນອີກ ເພື່ອເຮັດໃຫ້ຕະຫລາດມີຄວາມເຂັ້ມແຂງ ໃນການປະຕິບັດວຽກງານຕົວຈິງ ດ້ວຍຄວາມຮັບຜິດຊອບ. ພ້ອມນີ້ໃຫ້ເອົາໃຈໃສ່ການຄຸ້ມຄອງຊິງຊັ່ງທີ່ຊົມໃຊ້ໃນການ ຊື້-ຂາຍ; ການແບ່ງຂັ້ນຄຸ້ມຄອງ ລະຫວ່າງ ຂະແໜງການທີ່ກ່ຽວຂ້ອງຂອງລັດ ກັບບໍລິ ສັດ ຕ້ອງໃຫ້ລະອຽດຈະແຈ້ງ; ເອົາໃຈໃສ່ຕິດຕາມກວດກາ ການຂຶ້ນລາຄາສິນຄ້າ ຂອງຜູ້ປະກອບການ ແລະ ຜູ້ຊື້-ຂາຍ ໃນຕະຫລາດ ໃຫ້ຖືກຕ້ອງຕາມລະ ບຽບການ, ບໍ່ໃຫ້ຜູ້ປະກອບການ ແລະ ຜູ້ຄ້າ-ຂາຍ ຂຶ້ນລາຄາສິນຄ້າຕາມລໍາພັງ ທັງຊ່ວຍຕິດຕາມກວດກາສິນຄ້າພາຍໃນທີ່ເປັນເອກະລັກ, ມີຄຸນນະພາບດີ ເພື່ອຊຸກຍູ້ສົ່ງເສີມໃຫ້ເປັນສິນຄ້າ ໂອດັອບ ແລະ ຊົມໃຊ້ແບບຍືນຍົງ.
ຫົວໜ້າພະແນກອຸດສາຫະກໍາ ແລະ ການຄ້າແຂວງ ຍັງເນັ້ນໃຫ້ການນໍາບໍລິສັດ ເອົາໃຈໃສ່ຢ່າງແຂງແຮງ ການຄຸ້ມຄອງ ຮ້ານຊື້-ຂາຍເຄື່ອງ ຂອງຄົນຕ່າງປະ ເທດ ທີ່ຢູ່ໃນຄວາມຮັບຜິດຊອບຂອງຕະຫລາດ ເພື່ອສ້າງຕະຫລາດໃໝ່ປາກເຊ ໃຫ້ເປັນຕະຫລາດທີ່ສະ ອາດ ໃນອະນາຄົດ.
ຂ່າວ-ພາບ: ທູນທອງໃຈ
