ຕາມຂ່າວຈາກວິທະຍຸສາກົນຫວຽດນາມ ວັນທີ 4 ກໍລະກົດນີ້ ສຳນັກງານລັດຖະສະພາໄທ ຢູ່ນະຄອນຫລວງບາງກອກ, ສະພາຜູ້ແທນລາດຊະດອນ ຊຸດທີ 26 ໄດ້ຈັດກອງປະຊຸມຄັ້ງທຳອິດດ້ວຍການເຂົ້າຮ່ວມຂອງສະມາຊິກສະພາຜູ້ແທນ ລາດຊະດອນ ເກືອບ 500 ຄົນ ເພື່ອເລືອກຕັ້ງປະທານຄົນໃໝ່ ແລະ ຮອງປະທານຕາມລຳດັບ. ພາຍຫລັງບັນລຸໄດ້ຂໍ້ຕົກລົງ ໃນສຳພັນທະມິດໂດຍພັກກ້າວໄກ (MFP) ນຳໜ້າ, ທ່ານ ວັນ ໂມຫະລັດ ນໍ ມາດທາ, ການນຳພັກປະຊາຊາດແມ່ນຜູ້ໜຶ່ງດຽວໄດ້ສະເໜີຕົວຮັບດຳລົງຕຳແໜ່ງ ແລະ ໄດ້ຮັບເລືອກຕັ້ງເປັນປະທານສະພາຜູ້ແທນລັດຊະດອນອາຍຸການໃໝ່. ຕາມຂໍ້ຕົກລົງຂອງລັດຖະສະພາໄທ, ປະທານສະພາຜູ້ແທນລາດຊະດອນ ກໍ່ເປັນປະທານລັດຖະສະພາ. ໃນບົດຄຳເຫັນໃນພິທີ ຮັບດຳລົງຕຳແໜ່ງ, ທ່ານ ນໍ ມາດທາ, ປະທານລັດຖະສະພາຄົນໃໝ່ ໃຫ້ຄຳໝັ້ນສັນຍາຈະເຮັດວຽກດ້ວຍຄວາມຈິງໃຈ, ເຄົາລົບກົດໝາຍ ແລະ ບັນດາຂໍ້ກຳນົດຂອງລັດຖະສະພາຢ່າງເຂັ້ມງວດ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
