ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ພ້ອມດ້ວຍຄະນະ, ໃນວັນທີ 14 ມິຖຸນາ ທີ່ຫ້ອງວ່າການແຂວງຈຳປາສັກ ໃນໂອກາດມາເຄື່ອນໄຫວວຽກງານ ທີ່ແຂວງຈຳປາສັກ.
ໃນໂອກາດນີ້, ທ່ານເຈົ້າແຂວງຈຳປາສັກ ໄດ້ສະແດງການຕ້ອນຮັບ ແລະ ຊົມເຊີຍ ທ່ານຮອງລັດຖະມົນຕີ ກະຊວງແຜນການ ແລະ ການລົງທຶນ ທີ່ໄດ້ນຳພາກອງປະຊຸມຄົ້ນຄວ້າທາບທາມຄວາມຄິດເຫັນໃສ່ (ຮ່າງ) ການປັບປຸງກົດໝາຍວ່າດ້ວຍການສົ່ງເສີມການລົງທຶນ (ປີ 2016) ຢູ່ 5 ແຂວງພາກໃຕ້ ຈັດຂຶ້ນທີ່ແຂວງຈໍາປາສັກ ຊຶ່ງມັນເປັນການຊຸກຍູ້ເຮັດໃຫ້ວຽກງານການສົ່ງເສີມ ແລະ ຄຸ້ມຄອງວຽກງານການລົງທຶນມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.
ທ່ານຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ສະແດງຄວາມຂອບໃຈ ໃນການຕ້ອນຮັບ ພ້ອມທັງແຈ້ງຈຸດປະສົງ ການເຄື່ອນໄຫວວຽກງານຄັ້ງນີ້ ແມ່ນໄດ້ຈັດກອງປະຊຸມທາບທາມຄວາມຄິດເຫັນໃສ່ (ຮ່າງ) ການປັບປຸງກົດໝາຍວ່າດ້ວຍການສົ່ງເສີມການລົງທຶນ (ປີ 2016) 5 ແຂວງພາກໃຕ້ ທີ່ແຂວງຈໍາປາສັກ ເພື່ອເຮັດໃຫ້ວຽກງານການສົ່ງເສີມ ແລະ ຄຸ້ມຄອງວຽກງານການລົງທຶນມີປະສິດທິພາບ ແລະ ປະສິດທິຜົນ ສູງຂຶ້ນກວ່າເກົ່າ, ການອະນຸມັດການລົງທຶນມີຄວາມສະດວກ, ມີຂັ້ນຕອນ ແລະ ໄລຍະເວລາສັ້ນລົງ, ການຄຸ້ມຄອງຕິດຕາມກວດກາມີຄວາມໂປ່ງໃສ ສາມາດກວດສອບໄດ້ ແລະ ຫັນເປັນທັນສະໄໝເທື່ອລະກ້າວ, ສ້າງຄວາມເຊື່ອໝັ້ນໃຫ້ແກ່ຜູ້ພັດທະນາ ແລະ ຜູ້ລົງທຶນ ສາມາດແຂ່ງຂັນກັບພາກພື້ນ ແລະ ສາກົນ ໃນການດຶງດູດການລົງທຶນ ແລະ ເພື່ອຍົກລະດັບບັນດານິຕິກໍາທີ່ມີແລ້ວ ໃຫ້ເປັນກົດໝາຍທີ່ມີຄວາມໜັກແໜ້ນ, ຮັດກຸມ, ຊັດເຈນ, ຈະແຈ້ງຄົບຖ້ວນ, ສັກສິດຂຶ້ນຕື່ມ.
ຂ່າວ: ທັດຊະນະ, ພາບ: ພູທິບສະຫວັນ
