ຂ່າວຕ່າງປະເທດລາຍງານ ໃນວັນທີ 14 ມິຖຸນາ ຜ່ານມາ, ສຳນັກງານສິ່ງແວດລ້ອມເອີຣົບ (EEA) ໄດ້ເປີດເຜີຍບົດລາຍງານໂດຍລະບຸວ່າ: ສະຖານທີ່ການສຶກສາ ແລະ ໂຮງໝໍເກືອບເຄິ່ງໜຶ່ງໃນເມືອງຕ່າງໆຂອງເອີຣົບຕັ້ງຢູ່ພາຍໃນຂອບເຂດຂອງປະກົດການ ເກາະຄວາມຮ້ອນ (Urban heat island) ເຮັດໃຫ້ປະຊາກອນກຸ່ມທີ່ອ່ອນແອຕ້ອງປະເຊີນກັບອຸນຫະພູມສູງ ຊຶ່ງເປັນອັນຕະລາຍຕໍ່ສຸຂະພາບ.
EEA ລະບຸໃນບົດລາຍງານການວິເຄາະກ່ຽວກັບການປັບຕົວເພື່ອຮັບມືກັບການປ່ຽນແປງສະພາບພູມອາກາດຂອງເອີຣົບວ່າ: ໂຮງໝໍປະມານ 46% ແລະ ສະຖານທີ່ສຶກສາປະມານ 43% ຢູ່ໃນພື້ນທີ່ໆອຸ່ນກວ່າຄ່າສະເລ່ຍຂອງພາກພື້ນຢ່າງໜ້ອຍ 2 ອົງສາ ຊຶ່ງເຮັດໃຫ້ຜົນກະທົບຈາກຄື່ນຄວາມຮ້ອນທີ່ຮຸນແຮງກວ່າໃນພື້ນທີ່ຊົນນະບົດ. ທັງນີ້, ຄວາມຮ້ອນເກີດຈາກປະກົດການເກາະຄວາມຮ້ອນ ຊຶ່ງມີທີ່ມາຈາກສິ່ງປຸກສ້າງ ແລະ ໂຄງສ້າງພື້ນຖານເຊັ່ນ: ຫົນທາງທີ່ເພີ່ມຂຶ້ນຢ່າງແໜ້ນໜາຈະດູດຊຶມ ແລະ ກັກເກັບຄວາມຮ້ອນໄວ້ຫຼາຍກວ່າພື້ນທີ່ສີຂຽວ. ທ່ານ ບຣາດ ຄູນິກ ຫົວໜ້າແຜນການປັບຕົວຕໍ່ສະພາບອາກາດຂອງ EEA ກ່າວວ່າ: ສິ່ງນີ້ຈະສົ່ງຜົນກະທົບຢ່າງຮ້າຍແຮງຕໍ່ສຸຂະພາບຂອງມະນຸດ. ການປ່ຽນແປງສະພາບພູມອາກາດອັນມີສາເຫດມາຈາກການເຜົາໄໝ້ເຊື້ອໄຟຟອສຊິວຢ່າງຕໍ່ເນື່ອງຂອງອຸດສາຫະກຳ ກຳລັງເຮັດໃຫ້ຄື່ນຄວາມຮ້ອນເພີ່ມຄວາມຮຸນແຮງຂຶ້ນ ແລະ ເກີດຖີ່ຂຶ້ນເລື້ອຍໆ ເມື່ອບວກເຂົ້າກັບປະກົດການເກາະຄວາມຮ້ອນ ຈຶ່ງກໍ່ໃຫ້ເກີດຄວາມສ່ຽງຢ່າງຫຼວງຫຼາຍ ຊຶ່ງລວມເຖິງການເສຍຊີວິດ ເນື່ອງຈາກພາວະວິຕົກກົງວົນຈາກຄວາມຮ້ອນ (Heat stress) ຂອງປະຊາກອນກຸ່ມທີ່ອ່ອນແອເຊັ່ນ ຜູ້້ສູງອາຍຸ. ທ່ານ ບຣາດ ຄູນິກ ກ່າວວ່າ: ປະຊາກອນກຸ່ມທີ່ອ່ອນແອໃນເອີຣົບຍັງຄົງເພີ່ມຂຶ້ນ ເນື່ອງຈາກບັນຫາປະຊາກອນຜູ້ສູງອາຍຸ ແລະ ເມືອງທີ່ມີຄວາມໜາແໜ້ນຫຼາຍຂຶ້ນ ແລະ ເມື່ອລວມກັບຄື່ນຄວາມຮ້ອນ ສິ່ງນີ້ກໍຈະກາຍເປັນຄວາມສ່ຽງທີ່ສັງຄົມໃນອະນາຄົດຕ້ອງປະເຊີນ.
ຍ້ອນເຫດຜົນນີ້ EEA ຈຶ່ງໄດ້ຮຽກຮ້ອງໃຫ້ລັດຖະບານອອກມາດຕະການເພື່ອຫຼຸດຜ່ອນຜົນກະທົບຈາກປະກົດການເກາະຄວາມຮ້ອນໃນເມືອງຕ່າງໆເຊັ່ນ: ການເພີ່ມພື້ນທີ່ສີຂຽວ ແລະ ພື້ນທີ່ປຽກຊຸ່ມ ໂດຍພື້ນທີ່ບາງສ່ວນໄດ້ດຳເນີນການໄປແລ້ວເຊັ່ນ: ໂຄງການຂອງນະຄອນຫຼວງປາຣີທີ່ຕ້ອງການປ່ຽນພື້ນທີ່ຂອງໂຮງຮຽນ 10 ແຫ່ງໃຫ້ເປັນພື້ນທີ່ສີຂຽວທີ່ເຢັນຂຶ້ນ ໂດຍມີນ້ຳພຸ ແລະ ພືດທີ່ທົນຕໍ່ຄວາມແຫ້ງແລ້ງ.
