ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດກອງປະຊຸມ ລະດົມຄວາມຄິດເຫັນຈາກພາກທຸລະກິດ ເພື່ອຄົ້ນຄວ້າບັນດາມາດຕະການແກ້ໄຂ ຕໍ່ກັບບັນຫາອັດຕາເງິນເຟີ້ ແລະ ລາຄາສິນຄ້າທີ່ເພີ່ມສູງຂຶ້ນ ໃນວັນທີ 16 ມິຖຸນາ ນີ້ ທີ່ຫ້ອງປະຊຸມ ສວສສຊ, ໂດຍການເປັນປະທານຂອງ ທ່ານ ກິແກ້ວ ຈັນທະບູລີ ຮອງເລຂາຄະນະພັກ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ຮອງຫົວໜ້າ ທັງເປັນຜູ້ປະຈຳການ ຄະນະສະເພາະກິດ 44/ນຍ. ເຂົ້າຮ່ວມມີບັນດາຜູ້ຕາງໜ້າຈາກ ສະພາການຄ້າ ແລະ ອຸດສາຫະກຳແຫ່ງຊາດລາວ, ບັນດາສະມາຄົມທຸລະກິດ, ທະນາຄານທຸລະກິດ, ຕາງໜ້າຫົວໜ່ວຍທຸລະກິດ ຮ່ວມກັບຂະແໜງການ ພາກລັດ ທີ່ກ່ຽວຂ້ອງ, ນັບທັງນັກເສດຖະສາດ, ນັກຄົ້ນຄວ້າ ຂອງບັນດາສະຖາບັນຄົ້ນຄວ້າເສດຖະກິດ ຂອງ ສວສສຊ ເຂົ້າຮ່ວມ.
ຈຸດປະສົງກອງປະຊຸມສຳມະນາໃນຄັ້ງນີ້ ແມ່ນເພື່ອລະດົມຄວາມຄິດເຫັນຈາກພາກທຸລະກິດກ່ຽວກັບປັດໄຈໃດ ທີ່ເປັນສາເຫດຕົ້ນຕໍ ກໍ່ໃຫ້ເກີດສະພາບບັນຫາອັດຕາເງິນເຟີ້ ແລະ ລາຄາສິນຄ້າສູງຂຶ້ນຢ່າງຕໍ່ເນື່ອງ, ວິທີການໃນການຮັບມື ຂອງພາກທຸລະກິດ ຕໍ່ກັບບັນຫາດັ່ງກ່າວ ລວມເຖິງຂໍ້ສະເໜີແນະຈາກພາກທຸລະກິດ ເພື່ອໃຫ້ຄະນະສະເພາະກິດ ນຳໄປຄົ້ນຄວ້າລົງເລິກ ເພື່ອຊອກຫາແນວທາງ ແລະ ມາດຕະການໃນການແກ້ໄຂໃນຕໍ່ໜ້າ.
ໃນຕອນທ້າຍກອງປະຊຸມ, ທ່ານ ກິແກ້ວ ຈັນທະບູລີ ຍັງໄດ້ເນັ້ນໜັກ ເພື່ອຂໍຄວາມຮ່ວມມື ຈາກພາກທຸລະກິດ ໃນການປະສານສົບທົບ ກັບກອງເລຂາຊ່ວຍວຽກຄະນະສະເພາະກິດ 44/ນຍ ເພື່ອສະ ໜອງຂໍ້ມູນອັນເປັນປະໂຫຍດ ເພື່ອໃຫ້ທີມງານສາມາດນຳມາຄົ້ນຄວ້າ, ວິເຄາະວິໄຈ ໃຫ້ຖືກຕາມສະພາບການຕົວຈິງ ຢ່າງພາວະວິໄສ ເພື່ອຊອກຫາແນວທາງ ແລະ ມາດຕະການແກ້ໄຂໃຫ້ສອດຄ່ອງ ເພື່ອຊ່ວຍຊຸກຍູ້ພາກທຸລະກິດ ໃຫ້ສາມາດຂ້າມຜ່ານວິກິດການໃນຄັ້ງນີ້ໃຫ້ໄດ້ໂດຍໄວ.
(ຂ່າວ-ພາບ: ແສງຈັນ)
