ໃນວັນທີ 13 ມິຖຸນາ 2023 ນີ້, ໜ່ວຍພັກກອງຮ້ອຍ 26 ກອງພົນທີ 2 ໄດ້ເປິດກອງປະຊຸມໃຫຍ່ສະມາຊິກພັກ ຄັ້ງທີ V ຂື້ນ ແລະ ອັດລົງດ້ວຍຜົນສຳເລັດອັນຈົບງາມ ໂດຍການເຂົ້າຮ່ວມເປັນປະທານຂອງສະຫາຍ ພັນເອກ ທອງນູ ເຊັງຫວ່າງ ຄະນະພັກກອງພົນ ຫົວໜ້າຫ້ອງເຕັກນິກ ກອງພົນທີ 2, ມີແຂກຖືກເຊີນຈາກພະແນກການຂອງກອງພົນ, ຕະຫລອດຮອດສະມາຊິກພັກສົມບູນ ແລະ ສຳຮອງເຂົ້າຮ່ວມ.
ໃນກອງປະຊຸມ ໄດ້ຮັບຟັງບົດລາຍງານການເມືອງທັງ 2 ພາກ ເຊິ່ງນໍາສະເໜີໂດຍ ສະຫາຍ ພັນໂທ ສົມຊາຍ ໄຊຍະວົງ ເລຂາຄະນະໜ່ວຍພັກ ກອງຮ້ອຍ 26 ເຊິ່ງໄດ້ຍົກໃຫ້ເຫັນໝາກຜົນການນໍາພາທີ່ຖືກຕ້ອງຂອງຄະນະພັກ ໃນໄລຍະ 5 ປີຜ່ານມາ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານຂອງຄະນະພັກ ກະຊວງປ້ອງກັນປະເທດ ວາງອອກ, ກອງປະຊຸມໄດ້ເປັນເອກະສັນຢ່າງສົມບູນຮັບຮອງເອົາທິດທາງແຜນການ 5 ປີ ຕໍ່ໜ້າ ( 2023-2028) ແລະ ໄດ້ຮັບຟັງການປະກອບຄໍາຄິດຄໍາເຫັນຢ່າງກົງໄປກົງມາ ຈາກບັນດາສະຫາຍສະມາຊິກພັກທີ່ເຂົ້າຮ່ວມກອງປະຊຸມ ເຮັດໃຫ້ບັນຍາກາດກອງປະຊຸມມີເນື້ອໃນສົມບູນຄົບຖ້ວນ; ກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ຢ່າງເປັນທາງການ
ກອງປະຊຸມປະຖົມມະລຶກ ໄດ້ເປັນເອກະສັນຮັບຮອງເອົາ ສະຫາຍ ພັນໂທ ສົມຊາຍ ໄຊຍະວົງ ເປັນເລຂາໜ່ວຍພັກ, ສະຫາຍ ຮ້ອຍເອກ ແສງອາທິດ ໄຊຍະວົງ ເປັນຮອງເລຂາໜ່ວຍພັກ, ສະຫາຍ ຮ້ອຍໂທ ສົມສະນິດ ມີວົງສັກ ເປັນກໍາມະການໜ່ວຍພັກ.
ໂອກາດນີ້ ສະຫາຍ ພັນເອກ ທອງນູ ເຊັງຫວາ່ງ ຄະນະພັກກອງພົນ ຫົວໜ້າຫ້ອງເຕັກນິກ ກອງພົນທີ 2 ໄດ້ມີຄຳເຫັນໂອ້ລົມ ແລະ ເນັ້ນໜັກໃຫ້ຄະນະໜ່ວຍພັກຊຸດໃໝ່ ຈົ່ງຖືເອົາວຽກງານການເມືອງແນວຄິດເປັນວຽກງານແຖວໜ້າເກາະຫ້ອຍເຂົ້າທຸກໜ້າທີ່ວຽກງານ ເຮັດໃຫ້ພະນັກງານ, ສະມາຊິກພັກມີສະຕິຕື່ນຕົວຕໍ່ໜ້າທີ່ການເມືອງ, ມີແນວຄິດຫລັກໝັ້ນ, ມີຈຸດຢືນທີ່ແນ່ນອນ, ສ້າງຄວາມເຊື່ອໝັ້ນອັນໜັກແໜ້ນຕໍ່ການນໍາພາຂອງພັກ, ເສີມຂະຫຍາຍແບບແຜນວິທີນໍາພາ, ແບບແຜນວິທີເຮັດວຽກ, ປະຕິບັດຕາມຫລັກການລວມສູນປະຊາທິປະໄຕ ພາຍໃນພັກຢ່າງເຂັ້ມງວດ, ຕັ້ງໜ້າປັບປຸງກໍ່ສ້າງພັກ-ພະນັກງານ ໂດຍຖືເອົາຄຸນນະພາບເປັນກົກ, ສືບຕໍ່ປະຕິບັດທິດນໍາຢຢຢຢເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ໂດຍເລັ່ງໃສ່ການປູກຝັງ-ລ້ຽງສັດ ແລະ ການບໍລິການຕ່າງໆ ເພື່ອສ້າງໃຫ້ກົມກອງມີຄວາມເຂັ້ມແຂງ ແລະ ໝັ້ນຄົງໃນທຸກດ້ານ.
ໂດຍ: ສຸວັນໂນ ທະລັງສີ
