ຂ່າວຕ່າງປະເທດລາຍງານ ໃນວັນທີ 11 ມິຖຸນາ ຜ່ານມາ, ອີງຕາມບົດລາຍງານການສຶກສາສະບັບຫຼ້າສຸດຂອງອີຕາລີລະບຸວ່າ: ປະຊາຊົນປະມານ 500.000 ຄົນອາໄສຢູ່ບໍລິເວນພູເຂົາໄຟກຳປິເຟນເກຣ ຊຶ່ງມີຄວາມສ່ຽງຂອງການລະເບີດຢ່າງຮຸນແຮງໃນລະດັບທີ່ບໍ່ເຄີຍເກີດຂຶ້ນມາກ່ອນ.
ທ່ານ ສະເຕຟາໂນ ຄາລິໂນ ໜຶ່ງໃນຜູ້ຂຽນບົດລາຍງານການສຶກສາກ່າວວ່າ: ເຖິງແມ່ນວ່າພູເຂົາໄຟກຳປິເຟນເກຣ ອາດຈະເປັນທີ່ຮູ້ຈັກໜ້ອຍກວ່າພູເຂົາໄຟວິຊູວຽດ ຊຶ່ງເຄີຍທຳລາຍນະຄອນປອມເປອີ ເມື່ອປະມານ 2.000 ປີກ່ອນ. ເຖິງຢ່າງໃດກໍຕາມ, ພູເຂົາໄຟໜ່ວຍນີ້ ຊຶ່ງຕັ້ງຢູ່ໃກ້ກັບເມືອງເນເປິນມີຄວາມອັນຕະລາຍຫຼາຍເຊັ່ນດຽວກັນ ເນື່ອງຈາກມັນເຄີຍພົ່ນລາວາ (Lava spit), ຂີ້ເທົ່າ ແລະ ກ້ອນຫີນໃນປີ 1538 ອີກທັງຍັງມີການລະເບີດເມື່ອປະມານ 30.000 ປີກ່ອນ ມີສ່ວນເຮັດໃຫ້ມະນຸດນີແອນເດິທັນ (Neanderthal) ສູນພັນ. ທັງນີ້, ຄົນສ່ວນຫຼາຍບໍ່ໄດ້ນຶກເຖິງອັນຕະລາຍຂອງພູເຂົາໄຟກຳປິເຟນເກຣ ເພາະລັກສະນະຂອງມັນບໍ່ແມ່ນພູສູງແບບທົ່ວໄປ ແຕ່ເປັນຫຼຸມເລິກພຽງເລັກນ້ອຍທີ່ມີເສັ້ນຜ່າສູນກາງ 12-14 ກິໂລແມັດ. ທ່ານ ຄຣິສໂຕເຟີ ຄິນເບຼິນ ຈາກມະຫາວິທະຍາໄລຄໍເລດ ລອນດອນ (College London) ກ່າວວ່າ: ມັນບໍ່ແມ່ນວ່າພູເຂົາໄຟຈະເກີດການລະເບີດ ແຕ່ພວກເຮົາຕ້ອງການບອກວ່າ ເງື່ອນໄຂສຳລັບການລະເບີດນັ້ນເອື້ອອຳນວຍຫຼາຍກວ່າ. ແຜ່ນດິນໄຫວຂະໜາດນ້ອຍຫຼາຍຄັ້ງ ຊຶ່ງເກີດຂຶ້ນຕັ້ງແຕ່ໄລຍະທົດສະວັດທີ 1950 ເຮັດໃຫ້ປາກປ່ອງຂອງພູເຂົາໄຟກຳປິເຟນເກຣອ່ອນຕົວ ແລະ ບົດລາຍງານທີ່ເຜີຍແຜ່ໃນວາລະສານການສື່ສານຂອງທຳມະຊາດໂລກ ແລະ ສິ່ງແວດລ້ອມ (Nature’s Communications Earth & Environment) ພົບວ່າ: ບາງສ່ວນຂອງພູເຂົາໄຟຢືດອອກຈົນເກືອບເຖິງຈຸດແຕກຫັກ. ນອກຈາກນີ້, ແຜ່ນດິນໄຫວທີ່ເກີດຂຶ້ນຫຼາຍຄັ້ງນັບຕັ້ງແຕ່ປີ 2019 ສົ່ງຜົນໃຫ້ແຮງກົດດັນໃຕ້ພູເຂົາໄຟກໍ່ຕົວ ແລະ ເກີດແຮງສັ່ນສະເທືອນກັບການຍົກຕົວຂອງພື້ນດິນສະສົມເພີ່ມຂຶ້ນເຊັ່ນດຽວກັນ ຊຶ່ງໝາຍຄວາມວ່າ ການລະເບີດບໍ່ຈຳເປັນຕ້ອງເກີດຈາກການລະເບີດໃນພູເຂົາໄຟຢ່າງຮຸນແຮງ.
ທ່ານ ຄາລິໂນ ກ່າວວ່າ: ຄວາມເປັນໄປໄດ້ຂອງການເກີດການລະເບີດຢູ່ໃນລະດັບຕ່ຳຫຼາຍ ແລະ ໜ້າຈະເປັນພຽງແຕ່ການລະເບີດຂະໜາດນ້ອຍ ເນື່ອງຈາກພູເຂົາໄຟທີ່ໃກ້ຈະແຕກນັ້ນບໍ່ໄດ້ໝາຍຄວາມວ່າ ຈະເກີດການລະເບີດສະເໝີໄປ ເພາະຕ້ອງຖືກຈຸດທີ່ດັນຂຶ້ນໃນຕຳແໜ່ງທີ່ເໝາະສົມ ເພື່ອເຮັດໃຫ້ເກີດການລະເບີດ. ທ່ານກ່າວຕື່ມວ່າ: ພວກເຮົາບໍ່ສາມາດເວົ້າໄດ້ຢ່າງແນ່ນອນວ່າ ຈະເກີດຫຍັງຂຶ້ນ ແຕ່ສິ່ງສຳຄັນຄື ການກຽມຄວາມພ້ອມສຳລັບເຫດການໃດໆກໍຕາມທີ່ອາດຈະເກີດຂຶ້ນໄດ້.
