ຫ້ອງການຄຸ້ມຄອງເຂດເສດຖະກິດພິເສດ ( ຫຂພສ ) ຮ່ວມກັບ ບໍລິສັດ ການນຳໃຊ້ຊັບພະຍາກອນໃໝ່ ຈຳກັດ ແລະ ບໍລິສັດ ລາວທາດຫຼວງລົງທຶນ ພັດທະນາ ຈຳກັດ ໄດ້ຈັດພິທີເຊັນບົດບັນທຶກຮ່ວມມື ເພື່ອດຶງດູດການລົງທຶນຂຶ້ນຢູ່ ຫຂພສ ໃນວັນທີ 8 ມິຖຸນາ 2023 ໂດຍການເຂົ້າຮ່ວມເປັນສັກຂີພິຍານຂອງ ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ. ມີບັນດາຮອງລັດຖະມົນຕີ, ທ່ານ ສອນປະເສີດ ດາລາວົງ ຫົວໜ້າ ຫຂພສ, ທ່ານ ເສິນ ກວ່າງປ່ຽວ ປະທານສະພາບໍລິຫານ ບໍລິສັດ ການນຳໃຊ້ຊັບພະຍາກອນໃໝ່ ຈຳກັດ, ຫົວໜ້າພະແນກຈາກນະຄອນຫຼວງ ແລະ ແຂກທັງ 2 ຝ່າຍເຂົ້າຮ່ວມ.
ໃນພິທີ ທ່ານ ສອນປະເສີດ ດາລາວົງ ຫົວໜ້າ ຫຂພສ ກ່າວບາງຕອນວ່າ: ທົ່ວປະເທດມີ ຂພສ 21 ເຂດ ທີ່ຕັ້ງຢູ່ 7 ແຂວງ, ປະກອບມີເຂດອຸດສາຫະກຳ, ເຂດທ່ອງທ່ຽວເຂດການຄ້າ – ການບໍລິການ, ເຂດຂົນສົ່ງ ( Logistic ) ເຊິ່ງສາມາດດຶງດູດການລົງທຶນໄດ້ 1.235 ວິສາຫະກິດ ( ເປັນບໍລິສັດພາຍໃນ 148 ບໍລິສັດ, ຕ່າງປະເທດ 1.033 ບໍລິສັດ ແລະ ພາຍໃນຮ່ວມກັບຕ່າງປະເທດ 54 ບໍລິສັດ ). ສໍາລັບນັກລົງທຶນຈາກ ສປ ຈີນ ທີ່ລົງທຶນໃນເຂດເສດຖະກິດພິເສດທີ່ແມ່ນຜູ້ພັດທະນາ ຈາກ ສປ ຈີນ ລົງທຶນນັ້ນມີ 6 ເຂດ ຄື: 1). ເຂດເສດຖະກິດພິເສດບໍ່ເຕັນແດນງາມ; 2). ເຂດເສດຖະກິດພິເສດ ສາມຫຼ່ຽມຄຳ; 3). ເຂດພັດທະນາກວມລວມໄຊເສດຖາ; 4). ເຂດເສດຖະກິດພິເສດ ບຶງທາດຫຼວງ; 5). ເຂດພັດທະນາເສດຖະກິດໃໝ່ ສີທັນດອນ ແລະ 6). ເຂດວີຕ້າປາກ.
ນອກຈາກນີ້, ກໍຍັງມີບັນດາວິສາຫະກິດທີ່ເປັນນັກລົງທຶນຈາກ ສປ ຈີນ ດໍາເນີນກິດຈະການຢູ່ບັນດາ ຂພສ ອື່ນອີກ ລວມຈຳນວນ 855 ບໍລິສັດ ກວມເອົາ 69,23% ຂອງບັນດາວິສາຫະກິດທີ່ດຳເນີນທຸລະກິດໃນເຂດເສດຖະກິດທົ່ວປະເທດ, ນັກລົງທຶນທີ່ມາຈາກ ສປ ຈີນ ລົງທຶນໃນເຂດເສດຖະກິດພິເສດແມ່ນມີຈຳນວນຫຼາຍພໍສົມຄວນ ຖ້າທຽບໃສ່ບັນດານັກລົງທຶນປະເທດອື່ນໆ.
ສະນັ້ນ, ການລົງນາມບົດບັນທຶກຮ່ວມມື ລະຫວ່າງ ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ກະຊວງແຜນການ ແລະ ການລົງທຶນ ກັບ ທ່ານ ເສີນກວ່າງປ່ຽວ ປະທານສະພາບໍລິຫານ ບໍລິສັດ ການນຳໃຊ້ຊັບພະຍາກອນຄືນໃໝ່ ຈຳກັດ ແລະ ບໍລິສັດ ລາວທາດຫຼວງລົງທຶນ ພັດທະນາ ຈຳກັດ ໃນມື້ນີ້ຈະເປັນອີກບາດກ້າວໜຶ່ງທີ່ຈະຊ່ວຍລະດົມທຸລະກິດການລົງທຶນທີ່ມີທ່າແຮງເຂົ້າມາລົງທຶນພັດທະນາຢູ່ເຂດເສດຖະກິດພິເສດໃຫ້ຫຼາຍຂຶ້ນ ໂດຍສະເພາະແມ່ນຢູ່ເຂດເສດຖະກິດພິເສດບຶງທາດຫຼວງ ແລະ ເຂດພັດທະນາເຕັກໂນໂລຊີລະດັບສູງຢູ່ເມືອງປາກງື່ມ ນະຄອນຫຼວງວຽງຈັນ.
ທ່ານ ເສິນກວ່າງປ່ຽວ ປະທານສະພາບໍລິຫານ ບໍລິສັດ ການນຳໃຊ້ຊັບພະຍາກອນໃໝ່ ຈຳກັດ ກ່າວບາງຕອນວ່າ: ບໍລິສັດ ພວກເຮົາ ແມ່ນສ້າງຕັ້ງມາໄດ້ 20 ປີ ຜ່ານການດຳເນີນທຸລະກິດຜ່ານມາກຳໄລ 10% ຂອງບໍລິສັດແມ່ນຫັກໄປຊ່ວຍເຫຼືອດ້ານການສຶກສາ ແລະ ຕ້ານໄພພິບັດຂອງປະເທດຈີນ. ບໍລິສັດເຮົາແມ່ນໄດ້ນຳໃຊ້ເຕັກໂນໂລຊີ ແລະ ອຸປະກອນທັນສະໄໝເຂົ້າຊ່ວຍໃນການດຳເນີນທຸລະກິດ ແລະ ສປປ ລາວ ເປັນປະເທດທີ່ມີທ່າແຮງຫຼາຍດ້ານ ເປັນຕົ້ນແມ່ນບັນດາເຂດເສດຖະກິດຕ່າງໆທີ່ເອື້ອອຳນວຍໃຫ້ແກ່ການລົງທຶນ, ດັ່ງນັ້ນພວກເຮົາຈຶ່ງເຫັນໄດ້ເຖິງຄວາມສຳຄັນດັ່ງກ່າວ ຈຶ່ງເກີດມີການເຊັນສັນຍານີ້ຂຶ້ນ ແລະ ພວກເຮົາສັນຍາວ່າຈະຊ່ວຍດຶງດູງເອົານັກທຸລະກິດມາລົງທຶນໃນຂະແໜງການຕ່າງໆຢູ່ເຂດເສດຖະກິດໃຫ້ນັບມື້ເພີ່ມຂຶ້ນ.
ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ກ່າວບາງຕອນວ່າ: ການເຊັນສັນຍາຮ່ວມມືກັນມື້ນີ້ ຂອງ 3 ພາກສ່ວນໃນການຮ່ວມມືພັດທະນາເຂດເສດຖະກິດພິເສດ, ກະຊວງແຜນການ ແລະ ການລົງທຶນ ພ້ອມກັບພາກສ່ວນກ່ຽວຂ້ອງໃນນະຄອນຫຼວງວຽງຈັນ ພ້ອມທີ່ຈະໃຫ້ການຮ່ວມມື ແລະ ອຳນວຍ ຄວາມສະດວກ ພ້ອມສ້າງເງື່ອນໄຂຄວາມເປັນໄປໄດ້ໃນການຮ່ວມມືກັບເຂດເສດຖະກິດອື່ນໆຢູ່ໃນ ສປປ ລາວ.
ການລົງນາມບົດບັນທຶກການຮ່ວມມືຄັ້ງນີ້ ຕາງໜ້າລົງນາມໂດຍ ທ່ານ ສອນປະເສີດ ດາລາວົງ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ ຮ່ວມກັບ ທ່ານ ເສີນກວ່າງປ່ຽວ ປະທານສະພາບໍລິຫານ ບໍລິສັດ ການນຳໃຊ້ຊັບພະຍາກອນຄືນໃໝ່ ຈຳກັດ ແລະ ທ່ານ ຫວງຊີວເວີນ ປະທານບໍລິສັດ ລາວທາດຫຼວງ ລົງທຶນ ພັດທະນາ ຈຳກັດ.
