ກົມແຜນການ ກະຊວງສຶກສາທິການ ແລະ ກິລາ (ສສກ) ຮ່ວມກັບທີມງານທະນາຄານໂລກ ປຶກສາຫາລືການຈັດຕັ້ງປະຕິບັດ ໂຄງການກອງທຶນຮ່ວມມືສາກົນ ເພື່ອການສຶກສາໄລຍະ III: ໂຄງການຮຽນຮູ້ ແລະ ຄວາມເທົ່າທຽມ (GPEIII:LEAP) ພ້ອມທັງສະເໜີຄວາມຄືບໜ້າໂຄງການ ແນໃສ່ເຮັດໃຫ້ວຽກງານເປັນໄປຕາມແຜນທີ່ວາງໄວ້ ແລະ ໄດ້ຮັບໝາກຜົນຢ່າງສູງສຸດ.
ກອງປະຊຸມປຶກສາຫາລືດັ່ງກ່າວ, ໄດ້ຈັດຂຶ້ນເມື່ອວັນທີ 12 ມິຖຸນາ 2023 ທີ່ກະຊວງສຶກສາທິການ ແລະ ກິລາ (ເຂດສີສະເກດ) ໂດຍພາຍໃຕ້ການເປັນປະທານຂອງທ່ານ ອະນຸແພງ ແກ້ວວົງສາ ຮອງຫົວໜ້າກົມແຜນການ ກະຊວງ ສສກ, ຫົວໜ້າຄະນະຮັບຜິດຊອບໂຄງການກອງທຶນຮ່ວມມືສາກົນ ເພື່ອການສຶກສາ ໄລຍະ III, ທ່ານ ນາງ ທາຣາ ເບັດເທວ ຫົວໜ້າຄະນະຮັບຜິດຊອບແຜນງານຂອງກຸ່ມທະນາຄານໂລກ, ຜູ້ຊີ້ນໍາວຽກການສຶກສາ, ສາທາລະນະສຸກ ແລະ ການປົກປ້ອງສັງຄົມ ຢູ່ປະເທດກໍາປູເຈຍ, ສປປ ລາວ ແລະ ມຽນມາ ແລະ ທ່ານ ໄມເຄິນ ດຣັບໂບ ຜູ້ຊ່ຽວຊານອາວຸໂສດ້ານການສຶກສາ, ມີບັນດາທີມງານຜູ້ຮັບຜິດຊອບໂຄງການ, ຜູ້ຕາງໜ້າຈາກກົມ ຕະຫຼອດຮອດພາກສ່ວນທີ່ກ່ຽວຂ້ອງ ແລະ ພະນັກງານເຂົ້າຮ່ວມ.
ການຈັດກອງປະຊຸມໃນຄັ້ງນີ້, ເພື່ອເປັນການສະເໜີຄວາມຄືບໜ້າຂອງການຈັດຕັ້ງປະຕິບັດບັນດາກິດຈະກໍາຕ່າງໆ ຂອງໂຄງການ ໂດຍສະເພາະໄດ້ສຸມໃສ່ວຽກງານສ້າງຄູ, ວຽກງານຄຸ້ມຄອງບໍລິຫານທີ່ເນັ້ນໂຮງຮຽນເປັນຫຼັກ ແລະ ວຽກງານສົ່ງເສີມອາຫານທ່ຽງໃນໂຮງຮຽນ; ໃຫ້ການສະໜັບສະໜູນທາງດ້ານວິຊາການ ເພື່ອເລັ່ງຂະບວນການຈັດຕັ້ງປະຕິບັດກິດຈະກຳຂອງແຕ່ລະອົງປະກອບ ແລະ ບັນດາກິດຈະກໍາຕ່າງໆຂອງໂຄງການທີ່ກຳລັງຈັດຕັ້ງປະຕິບັດຢູ່ໃນປະຈຸບັນ ແລະ ໃນຕໍ່ໜ້າໃຫ້ບັນລຸຕາມແຜນທີ່ວາງໄວ້ ພ້ອມທັງປຶກສາຫາລືກ່ຽວກັບບາງບັນຫາ, ຂໍ້ຄົງຄ້າງ ແລະ ສິ່ງທ້າທາຍຕ່າງໆ ເພື່ອພ້ອມກັນຫາວິທາງແກ້ໄຂໃຫ້ສອດຄ່ອງກັບການຈັດຕັ້ງປະຕິບັດບັນດາວຽກງານຕົວຈິງໃນປະຈຸບັນ ແລະ ຕໍ່ໜ້າ ແລະ ເພື່ອຄວາມເປັນເອກະພາບທາງດ້ານຫຼັກການ. ທັງນີ້, ກໍເພື່ອເຮັດໃຫ້ການຈັດຕັ້ງປະຕິບັດໂຄງການໃຫ້ບັນລຸຕາມຈຸດປະສົງ ແລະ ເປົ້າໝາຍຂອງໂຄງການທີ່ວາງໄວ້ ແລະ ປຶກສາຫາລືບັນຫາອື່ນໆອີກດ້ວຍ.
ນອກຈາກນັ້ນ, ຜູ້ເຂົ້າຮ່ວມກອງປະຊຸມໄດ້ຮັບຟັງການນຳສະເໜີຄວາມຄືບໜ້າຂອງການຈັດຕັ້ງປະຕິບັດໂຄງການ GPEIII:LEAP, ສິ່ງທ້າທາຍ ແລະ ແຜນການຈັດຕັ້ງປະຕິບັດ; ຂໍ້ມູນກ່ຽວກັບແຜນການຈັດຊື້-ຈັດຈ້າງ, ຄວາມຄືບໜ້າ, ຜົນສຳເລັດ, ສິ່ງທ້າທາຍ ແລະ ແຜນຕໍ່ໜ້າ; ຄວາມຄືບໜ້າການຈັດຕັ້ງປະຕິບັດກິດຈະກຳອົງປະກອບ 2.1 ລວມທັງຜົນສຳເລັດ; ຄວາມຄືບໜ້າການປະຕິບັດ SBM ແລະ ຂໍ້ມູນເບື້ອຕົ້ນກ່ຽວກັບ NSMP background, ຈໍານວນໂຮງຮຽນທີ່ໄດ້ຮັບຜົນປະໂຫຍດ, ແຜນງົບປະມານ ແລະ ການຈັດສັນຕ່າງໆ. ທັງນີ້, ກໍເພື່ອເຮັດໃຫ້ວຽກງານດັ່ງກ່າວເປັນໄປຕາມແຜນທີ່ວາງໄວ້ ແລະ ໄດ້ຮັບໝາກຜົນ.
ໂດຍ ບົວລະພາ
