ວິທະຍຸກະຈາຍສຽງຫວຽດນາມລາຍງານວ່າ: “ຄວາມຍຸຕິທຳໃນສັງຄົມເພື່ອທຸກໆຄົນ, ຢຸດຕິການໃຊ້ແຮງງານເດັກ !” ນີ້ແມ່ນຫົວຂໍ້ຂອງວັນປ້ອງກັນ, ຕ້ານການໃຊ້ແຮງງານເດັກໂລກ ວັນທີ 12 ມິຖຸນາ. ເນື່ອງໃນໂອກາດດັ່ງກ່າວ, ອົງການແຮງງານສາກົນ (ILO) ໄດ້ຈັດກອງປະຊຸມສຳມະນາຂັ້ນສູງ ຢູ່ນອກກອງປະຊຸມແຮງງານສາກົນ ຄັ້ງທີ 111 ທີ່ສຳນັກງານ ສປຊ ປະຈຳ ເຊີແນວ ປະເທດສະວິດ ໃນວັນທີ 11 ມິຖຸນາ ຜ່ານມາ. ກອງປະຊຸມດັ່ງກ່າວໄດ້ສຸມໃສ່ປຶກສາຫາລືກ່ຽວກັບສາຍພົວພັນລະຫວ່າງຄວາມຍຸຕິທຳໃນສັງຄົມ ແລະ ລຶບລ້າງການໃຊ້ແຮງງານເດັກ, ກໍຄືມາດຕະການຕ່າງໆເພື່ອຊຸກຍູ້ຄວາມຍຸຕິທຳໃນສັງຄົມ.
ເວັບໄຊ Theworldcounts.com ຄາດຄະເນວ່າ: ດ້ວຍລະດັບຄວາມໄວຄືໃນປັດຈຸບັນ, ຄວາມສ່ຽງຮອດປີ 2025 ທົ່ວໂລກຈະມີແຮງງານເດັກເຖິງ 121 ລ້ານຄົນ. ໃນນັ້ນ, ໂລກຍັງມີເວລາ 2 ປີ ເພື່ອບັນລຸໄດ້ເປົ້າໝາຍເລກທີ 8 ໃນບັນດາເປົ້າໝາຍພັດທະນາແບບຍືນຍົງຂອງ ສປຊ, ນັ້ນແມ່ນລຶບລ້າງຮູບແບບແຮງງານເດັກໃນປີ 2025. ດັ່ງນັ້ນ, ທ່ານ ກິລເບີດ ຮອງໂບ ຜູ້ອຳນວຍການໃຫຍ່ອົງການແຮງງານສາກົນ (ILO) ໄດ້ຮຽກຮ້ອງໃຫ້ບັນດາປະເທດ, ລັດຖະບານ ແລະ ບັນດາອົງການຈັດຕັ້ງສາກົນຕ້ອງຮ່ວມແຮງຮ່ວມໃຈຊຸກຍູ້ບັ້ນຕໍ່ສູ້ຕ້ານແຮງງານເດັກ, ດ້ວຍວິທີຊ່ວຍເຫຼືອກັນສ້າງຄວາມຍຸຕິທຳໃນສັງຄົມໃຫ້ຫຼາຍຂຶ້ນກວ່າເກົ່າອີກ. ຖ້າເຮັດໄດ້ສິ່ງດັ່ງກ່າວ, ການຢຸດຕິການໃຊ້ແຮງງານເດັກແມ່ນສາມາດບັນລຸໄດ້ຢ່າງແນ່ນອນ.
