” ອາກົ້ງ” ເຄີຍກໍ່ເຫດປຸ້ນຊັບຊິງຊັບມາແລ້ວ 11 ຄັ້ງ ແລະ ເຄີຍຖືກຈັບດຳເນີນຄະດີພໍອອກຈາກຄຸກກໍ່ມາກໍ່ເຫດປຸ້ນຮ້ານເພັດ,ຮ້ານຄຳ ກ່ອນທີ່ຈະຖືກຈັບທີ່ປະເທດໄທ ຫລັງຈາກກໍ່ເຫດປຸ້ນຮ້ານຄຳພໍໃຈ ( ປະຫວັດ ຂອງ ວິລະສອນ ຫຼື ອາກົ້ງ )
ທ້າວ ສີລະສອນ ຫຼື ອາກົ້ງ ເດີນທາງອອກຈາກບ້ານມາສຶກສາຮ່ຳຮຽນເອົາຄວາມຮູ້ຢູ່ໃນນະ ຄອນຫຼວງວຽງຈັນ ເພື່ອຫວັງຈະມີຊີວິດທີ່ດີໃນອະນາຄົດ ແຕ່ແລ້ວຄວາມຫວັງກໍ່ພັງທະລາຍລົງ ຍ້ອນຕິດຫຼິ້ນເກມພະນັນອອນລາຍຢ່າງໂງຫົວບໍ່ຂຶ້ນຈົນນຳພາຊີວິດລົງເຫວ ດ້ວຍການກໍ່ເຫດປຸ້ນຊັບຕາມຮ້ານເກມ ແລະ ຮ້ານເພັດ,ຮ້ານຄໍາ ຈຳນວນ 11 ຄັ້ງ ເພື່ອຫາເງິນມາຫຼິ້ນເກມພະນັນອອນລາຍ,ສຸດທ້າຍຊີວິດກໍພິກຜັນຈາກນັກສຶກສາມີອະນາຄົດທີ່ສົດໃສກາຍມາເປັນຜູ້ຖືກຫາໃນຄະດີປຸ້ນຊັບຢ່າງຫຼີກລ່ຽງບໍ່ໄດ້
ພັທ ບຸນມີ ແກ້ວພົມມາ ຫົວໜ້າພະແນກຕຳຫຼວດ ປກສ ເມືອງໄຊທານີ ນະຄອນຫຼວງວຽງຈັນ ໄດ້ຖະແຫຼງຕໍ່ນັກຂ່າວ ປກສ ນວ ໃນວັນທີ 14 ມັງກອນ 2020 ວ່າ: ພາຍຫຼັງທີ່ໄດ້ຮັບແຈ້ງຄວາມ ໃນວັນທີ 20 ທັນວາ 2019 ວ່າ: ມີເຫດການປຸ້ນຊັບຢູ່ຮ້ານເກມພາຍໃນເມືອງໄຊທານີ ນະຄອນຫຼວງວຽງຈັນ ເກີດຂຶ້ນຢ່າງຕໍ່ເນື່ອງຈຶ່ງໄດ້ແຕ່ງ
ຕັ້ງເຈົ້າໜ້າທີ່ວິຊາສະເພາະລົງກວດກາເກັບກຳຂໍ້ມູນ ເພື່ອກຳນົດ ແລະ ຄັດຈ້ອນເປົ້າໝາຍ ໂດຍໄດ້ຮັບການຊີ້ນຳຢ່າງໃກ້ຊິດຈາກຄະນະພັກ-ຄະນະບັນຊາ ປກສ ນະຄອນຫຼວງ
ວຽງຈັນ ແລະ ປກສ ເມືອງໄຊທານີ; ເຊິ່ງໃຊ້ເວລາ 19 ວັນ ຈຶ່ງຮູ້ວ່າ: ຜູ້ກໍ່ເຫດຊື່ທ້າວ ສີລະສອນ (ອາກົ້ງ) ອາຍຸ 22 ປີ, ຢູ່ບ້ານວັງຊອຍ ເມືອງ ແລະ ແຂວງໄຊຍະບູລີ ເຊິ່ງເປັນນັກສຶກສາປີ 4 ຢູ່ສະຖາບັນແຫ່ງໜຶ່ງໃນນະຄອນຫຼວງວຽງຈັນ,ພັກເຊົາຢູ່ຫ້ອງເຊົ່າບ້ານໜອງວຽງຄຳ ເມືອງໄຊທານີ. ນະຄອນຫຼວງວຽງຈັນ ຕົກມາຮອດວັນທີ 09 ມັງກອນ 2020, ເວລາ 17:00 ໂມງ ເຈົ້າໜ້າທີ່ ປກສ ເມືອງໄຊທານີ ກໍໄດ້ເຂົ້າຈັບຕົວຜູ້ກ່ຽວໃນຫ້ອງເຊົ່າ ພ້ອມຂອງກາງລົດຈັກ 2 ຄັນ ແລະ ເງິນ 50.000 ບາດ. ຫຼັງຈາກນັ້ນ,ເຈົ້າໜ້າທີ່ກໍສືບຕໍ່ເກັບກູ້ຂອງກາງຢູ່ເສັ້ນທາງບ້ານໜອງວຽງຄຳ ລວມມີໜວກກັນກະທົບ 2 ໜ່ວຍ ມາສືບສວນຂະຫຍາຍຜົນ.
ທ້າວ ສີລະສອນ ຫຼື ອາກົງ ໄດ້ໃຫ້ການຮັບສາລະພາບວ່າ: ໃນປີ 2016 ຜູ້ກ່ຽວໄດ້ລົງມາຮຽນຢູ່ສະຖາບັນແຫ່ງໜຶ່ງໃນນະຄອນຫຼວງວຽງຈັນ. ມາຮອດປີ 2018, ກໍໄດ້ຕິດຫຼິ້ນເກມພະນັນອອນລາຍຢ່າງແຮງ ແລະ ເສຍເງິນເປັນຈຳນວນຫຼວງຫຼາຍ,ທັງມີໜີ້ສິນຈຳນວນໜຶ່ງຈຶ່ງເຮັດໃຫ້ຜູ້ກ່ຽວມີແນວຄວາມຄິດຢາກໄດ້ເງິນຄືນຈາກຮ້ານເກມເຫຼົ່ານັ້ນ, ຈຶ່ງໄດ້ວາງແຜນຊອກຫາທຸກວິທີທາງເພື່ອຈະເອົາເງິນຄືນໂດຍເບື້ອງຕົ້ນໄດ້ໄປຊື້ປືນປອມມາດັດແປງເພື່ອຈະກ່ໍເຫດ,ໃນວັນທີ 20 ທັນວາ 2019, ຈຶ່ງໄດ້ລົງມືກໍ່ເຫດປຸ້ນຮ້ານເກມຢູ່ເຂດບ້ານດົງໂດກ ແລະ ຫຼາຍຮ້ານໃນເມືອງໄຊທານີລວມມີ 10 ຮ້ານ ແລະ ເມືອງສີສັດຕະນາກ 1 ຮ້ານ (ຮ້ານແລກປ່ຽນເງິນຕາ) ໄດ້ເງິນທັງໝົດ 50.000.000 ກີບ, ເງິນບາດ 30.0000 ບາດ; ເຊິ່ງແຕ່ລະຄັ້ງທີ່ລົງມືກໍ່ເຫດແມ່ນໄດ້ໃສ່ຊຸດສີດຳ, ໜວກກັນກະທົບສີດຳ ແລະ ມີຖົງສີດຳ ພ້ອມປືນປອມສີຂາວ 1 ກະບອກ. ເມື່ອໄດ້ເງິນມາແລ້ວຕົນເອງກໍໄປຊື້ລົດຈັກ 2 ຄັນຄື: ລົດຈັກຍີ່ຫໍ້ YAMAHA R 15 ສີດຳ ແລະ ລົດຈັກຍີ່ຫໍ້ Z 800 ແລ້ວເອົາໄປຫຼິ້ນເກມພະນັນອອນລາຍ ແລະ ຮັກສາໄວ້ຈຳນວນໜື່ງ, ສ່ວນປືນທີ່ໃຊ້ໃນການກໍ່ເຫດຕົນໄດ້ນຳໄປຖິ້ມລົງໜອງນ້ຳເຂດບ້ານໜອງວຽງຄຳ ຍ້ອນຕົນເອງໄດ້ສັ່ງຊື້ປືນແທ້ ເພື່ອນຳໃຊ້ເຂົ້າໃນການກໍ່ເຫດຄັ້ງຕໍ່ໄປ.
