ພິທີເປີດການຖ່າຍທອດເຕັກນິກການປູກເຂົ້ານາ ດ້ວຍກົນຈັກຂະໜາດນ້ອຍຂອງໂຄງການຮ່ວມມືລະຫ່ວາງພະແນກກະສິກຳ ແລະ ປ່າໄມ້ ແຂວງຜົ້ງສາລີ ກັບ ພະແນກກະສິກຳ ແລະ ປ່າໄມ້ ແຂວງດຽນບ່ຽນ ສສ ຫວຽດນາມ ໄດ້ຈັດຂຶ້ນໃນວັນທີ 7 ມິຖຸນາ ນີ້ ຢູ່ທົ່ງນາຂອງທ່ານ ນາງ ນາ ຈັນທະກົດ ບ້ານໂພນໂຮມ ເມືອງບຸນເໜືອ, ໂດຍການເຂົ້າຮ່ວມຂອງທ່ານ ວິສອນ ລາວເມົາ ຮອງເຈົ້າແຂວງຜົ້ງສາລີ ຜູ້ຊີ້ນຳຂົງເຂດເສດຖະກິດຂັ້ນແຂວງ, ມີ ທ່ານ ສົມຈິດ ສິດທິວົງ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີພາກສ່ວນກ່ຽວຂ້ອງ ຕະຫຼອດຮອດປະຊາຊົນພາຍໃນ 6 ບ້ານເປົ້າໝາຍເຂົ້າຮ່ວມ.
ທ່ານ ສົມຈິດ ສິດທິວົງ ກ່າວວ່າ: ໃນລະດູການຜະລິດນາປີປະຈຳປີ 2023 ນີ້, ພະແນກກະສິກຳ ແລະ ປ່າໄມ້ ແຂວງຜົ້ງສາລີ ໄດ້ສົມທົບກັບ ສະຫະກອນແທ໋ງອຽນ ແຂວງດຽນບ່ຽນ ເພື່ອພ້ອມກັນທົດລອງປູກເຂົ້ານາ ດ້ວຍການນໍາໃຊ້ກົນຈັກຂະໜາດນ້ອຍ ຊຶ່ງການທົດລອງ ຄັ້ງນີ້ ຖືວ່າເປັນບາດກ້າວໜຶ່ງ ທີ່ສໍາຄັນ ເພື່ອຊຸກຍູ້ການຫັນກະສິກຳ ເປັນທັນສະໄໝເທື່ອລະກ້າວ; ໂດຍນໍາໃຊ້ງົບປະມານການຊ່ວຍເຫຼືອຈາກພະແນກກະສິກຳ ແລະ ພັດທະນາຊົນນະບົດແຂວງດຽນບ່ຽນ ສສ ຫວຽດນາມ; ໂດຍຄິດເປັນມູນຄ່າລວມປະມານ 171 ລ້ານກວ່າດົງ (ສະກຸນເງິນຫວຽດນາມ) ແລະ ງົບປະມານການຊ່ວຍເຫຼືອຈາກສະຫະກອນແບ່ງອຽນປະມານ 15 ລ້ານກວ່າດົງ; ໃນໄລຍະທຳການຜະລິດ ແລະ ເກັບກ່ຽວ; ໄດ້ຈັດຕັ້ງປະຕິບັດຢູ່ 6 ບ້ານ, 10 ຄອບຄົວ ຂອງເມືອງບຸນເໜືອຄື: ບ້ານຫ້ວຍຕູ້, ບ້ານເດື່ອ, ບ້ານຍໍ້, ບ້ານຊຽງປີ້, ບ້ານນໍ້າແພ ແລະ ບ້ານໂພນໂຮມ, ການດຳເນີນກິດຈະກຳດຳນາໂດຍການນຳໃຊ້ກົນຈັກຂະໜາດນ້ອຍ ຄັ້ງນີ້ມີອຸປະກອນ ແລະ ເຄື່ອງຈັກເຊັ່ນ: ເຄື່ອງກົນຈັກດຳນາ ຈຳນວນ 2 ເຄື່ອງ, ເຄື່ອງຫວ່ານກ້າຈຳນວນ 1 ເຄື່ອງ, ຖາດກ້າຈຳນວນ 3.677 ອັນ, ຝຸ່ນຊີວິພາບ ຈຳນວນ 40 ກິໂລ, ແນວພັນເຂົ້າພັນປັບປຸງທີ່ມີຄຸນນະພາບສູງ ຈາກ ສສ ຫວຽດນາມ ຈຳນວນ 135 ກິໂລ ສຳລັບທົດລອງໃນເນື້ອທີ່ 5,05 ເຮັກຕາ.
ທ່ານ ສົມຈິດ ສິດທິວົງ ກ່າວຕື່ມອີກວ່າ: ການທົດລອງນໍາໃຊ້ເຄື່ອງດຳນາຂະໜາດນ້ອຍເຂົ້າໃນການຜະລິດນາປີໃນປີ 2023 ນີ້ ເປັນການນຳເອົາ ເຕັກນິກວິທະຍາສາດການຜະລິດເຂົ້າສູ່ກະສິກຳ ຫຼື ເວົ້າອີກຢ່າງໜຶ່ງກໍຄື ການຫັນກະສິກຳເປັນທັນສະໄໝ ຊຶ່ງພື້ນທີ່ ແລະ ສະພາບພູມສັນຖານການຜະລິດ ຢູ່ແຂວງຜົ້ງສາລີ ຍັງເປັນພື້ນທີ່ນາທົ່ງນ້ອຍ ແລະ ເປັນນາຂັ້ນໄດ, ດັ່ງນັ້ນ ການນຳໃຊ້ກົນຈັກຂະໜາດນ້ອຍເຂົ້າໃນການຜະລິດ ເປັນທາງເລືອກທີ່ເໝາະສົມກວ່າ ການນໍາໃຊ້ກົນຈັກໃຫຍ່, ເຕັກນິກການຜະລິດເຂົ້ານາໃນຮູບແບບລັກສະນະດັ່ງກ່າວນີ້ ໄດ້ຮັບຄວາມນິຍົມຫຼາຍ ຢູ່ບັນດາແຂວງພາກເໜືອຂອງປະເທດຫວຽດນາມ ເປັນຕົ້ນແມ່ນເຂດພູດອຍ ຊຶ່ງມີພື້ນທີ່ຄ້າຍໆກັບແຂວງຜົ້ງສາລີ; ນອກນີ້ເຕັກນິກການເຮັດນາແບບນໍາໃຊ້ກົນຈັກຂະໜາດນ້ອຍນີ້ ມັນບໍ່ສະເພາະແຕ່ໃຊ້ພຽງກົນຈັກຢ່າງດຽວ ທີ່ວ່າຫັນເປັນທັນສະໄໝ, ຊຶ່ງມັນຍັງລວມເອົາເຕັກນິກການກ້າເຂົ້ານາ ຊຶ່ງກ່ອນຈະສາມາດໃຊ້ກົນຈັກດຳນາ ໄດ້ ກໍຕ້ອງຜ່ານການກ້າເຂົ້ານາແບບໃໝ່ (ກ້າໃສ່ຖາດ) ຢ່າງເປັນລະບົບ ແລະ ຖືກຕາມເຕັກນິກ ຊຶ່ງການທົດລອງ ແລະ ຜົນໄດ້ຮັບຈາກການດຳນາແບບກົນຈັກ ດັ່ງກ່າວນີ້ ໄດ້ຮັບການຢັ້ງຢືນຢ່າງເປັນທາງການຈາກ ປະເທດເພື່ອນບ້ານ ຢ່າງ ເປັນຮູບປະທຳ ຊຶ່ງມີຜົນຜະລິດທີ່ສູງກວ່າ ແລະ ປະຢັດຕົ້ນທຶນການຜະລິດ; ຢູ່ປະເທດຫວຽດນາມ ສາມາດ ໃຫ້ຜົນຜະລິດເຂົ້າປະມານ 8 ໂຕນຕໍ່ເຮັກຕາ; ແຕ່ສຳລັບຢູ່ແຂວງຜົ້ງສາລີຄາດຄະເນວ່າ ຈະໃຫ້ໄດ້ຮັບຜົນຜະລິດປະມານ 5,5-6 ໂຕນຕໍ່ເຮັກຕາ (ທຽບກັບຜົນຜະລິດເດີມປະມານ4 ໂຕນ/ຮຕ); ຄາດ ໝາຍດັ່ງກ່າວນີ້ ຖ້າ ປະຊາຊົນ ຫຼື ຜູ້ເຂົ້າຮ່ວມໂຄງການຈັດຕັ້ງປະຕິບັດຖືກຕ້ອງຕາມເຕັກນິກ ແລະ ບໍ່ມີໄພພິບັດອື່ນເກີດຂຶ້ນ ອາດຈະໄດ້ຮັບຜົນຫຼາຍກວ່າການຄາດຄະເນ ກໍເປັນໄດ້.
(ຂ່າວ-ພາບ: ແສງຄຳ ສາລີວັນ )
