ການຖືພາເຖິງແມ່ນວ່າເປັນເລື່ອງທຳມະຊາດສຳລັບຄູ່ຜົວ-ເມຍ ຫຼື ແຕ່ງງານຖືກຕ້ອງຕາມກົດໝາຍເປັນຄູ່ຜົວ-ເມຍກັນແລ້ວ, ແຕ່ການຖືພາກໍແມ່ນຄວາມພ້ອມເກືອບທຸກດ້ານຂອງຄອບຄົວ. ພ້ອມນັ້ນ ກໍລະນີການຖືພາແບບບໍ່ຕັ້ງໃຈຂອງຄູ່ບ່າວສາວ ຫຼື ໄວໜຸ່ມຍັງມີຜົນສະທ້ອນ, ມີຄວາມສ່ຽງຕໍ່ກັບແມ່ ແລະ ລູກ. ພ້ອມນັ້ນ, ຍັງມີຜົນກະທົບຕໍ່ກັບສະພາບເສດຖະກິດ.
ຂໍ້ມູນຈາກສູນຂ່າວສານການແພດສຸຂະສຶກສາ ກະຊວງສາທາລະນະສຸກໃຫ້ຮູ້ວ່າ: ສໍາລັບຜົນສະທ້ອນຂອງການຖືພາໃນໄວໜຸ່ມມີຄວາມສ່ຽງຕໍ່ແມ່ ແລະ ລູກຄື: ຖືກໂຈະການຮຽນ, ຖືກສັງຄົມ ແລະ ບຸກຄົນອ້ອມຂ້າງເວົ້າໃສ່, ມີບັນຫາໃນການລ້ຽງລູກ (ສັບສົນບໍ່ຮູ້ວິທີລ້ຽງລູກ), ສ່ຽງຕໍ່ການເສຍຊີວິດໃນເວລາເກີດລູກ, ສ່ຽງຕໍ່ການເປັນຊັກກະຕຸກ, ເສຍເລືອດຫຼາຍ, ແມ່ເກີດມີອາການຊຶມເສົ້າ, ພະຍາດເລືອດຈາງ, ສ່ຽງຕໍ່ການຫຼຸລູກ, ເກີດກ່ອນກຳນົດ, ເດັກເກີດມາມີນ້ຳໜັກຕ່ຳ, ພັດທະນາການຊ້າທາງດ້ານຮ່າງກາຍ ແລະ ຈິດໃຈ. ໃນນັ້ນ, ຜົນກະທົບຕໍ່ສະພາບເສດຖະກິດມີຄື: ຂາດເງິນຄຳທີ່ຈະໃຊ້ຈ່າຍບໍລິການຕ່າງໆ ທັງໃນເວລາຖືພາ, ຕອນເກີດ ແລະ ຫຼັງເກີດເພື່ອລ້ຽງດູລູກ. ໃນນັ້ນ, ບໍ່ສາມາດທົນກັບສະພາບຄວາມກົດດັນຈາກສັງຄົມຈົ່ມຂວັນນິນທາໄດ້, ອາດຖືກສັງຄົມລັງກຽດກໍລະນີເປັນແມ່ຖືພາ ແລະ ລ້ຽງລູກດ່ຽວ, ບໍ່ມີອາຊີບ ຫຼື ອາຊີບບໍ່ໝັ້ນຄົງ ເນື່ອງຈາກຕ້ອງໄດ້ເບິ່ງແຍງລູກ ແລະ ບັນຫາອື່ນໆ.
ແນວໃດກໍຕາມ ໄວໜຸ່ມທີ່ຖືພາແບບບໍ່ພ້ອມຍັງມີທາງເລືອກທີ່ດີສະເໝີ ໂດຍສະເພາະ ສິ່ງທີ່ຄວນປະຕິບັດເຊັ່ນ: ຄວນປຶກສາຄອບຄົວ, ຖ້າໃຫ້ເປັນການດີ ທ່ານສາມາດຂໍຄໍາປຶກສາໄດ້ທີ່ໂຮງໝໍໃກ້ບ້ານທ່ານ ຫຼື ສາມາດຕິດຕໍ່ສອບຖາມກັບທີມແພດ ແລະ ສົ່ງຂໍ້ຄວາມໄປປຶກສາທີ່ເພສ ຮັກມີແຜນ ແລະ ສາມາດສອບຖາມ, ປຶກສາກັບທີມແພດທີ່ສາຍດ່ວນເບີ 020 555 666 17-18 ໄດ້ 24 ຊົ່ວໂມງ. ທີ່ສໍາຄັນເວລາຖືພາແລ້ວ ສິ່ງທີ່ຄວນຫຼີກລ່ຽງຄື: ຫ້າມກິນຢາຫຼຸລູກທີ່ບໍ່ໄດ້ຮັບການຮອງຮັບ ດ້ວຍຕົນເອງ ແລະ ຄິດໃຫ້ດີກ່ອນຕັດສິນໃຈ ເພື່ອປ້ອງກັນການຫຼຸລູກທີ່ບໍ່ປອດໄພ.
ໂດຍ: ວັນເພັງ
