ໃນລະຫວ່າງວັນທີ 28-29 ມີນາ 2023 ນີ້, ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງກາເງິນ, ໄດ້ນໍາພາຄະນະຜູ້ແທນຂອງກະຊວງການເງິນ ທີ່ປະກອບດ້ວຍກົມການເງິນຕ່າງປະເທດ, ກົມສ່ວຍສາອາກອນ ແລະ ກົມອາຊຽນ ກະຊວງການຕ່າງປະເທດ (ໃນນາມຜູ້ຕິດ ຕາມ) ເຂົ້າຮ່ວມກອງປະຊຸມ ຮອງລັດຖະມົນຕີການເງິນອາຊຽນ (ASEAN Finance Deputies’ Meeting – AFDM) ສຳລັບກອງປະຊຸມ ຮອງລັດຖະມົນຕີການເງິນ ແລະ ຮອງຜູ້ວ່າການທະນາຄານກາງ ອາຊຽນ, ກອງປະຊຸມຮອງລັດຖະມົນຕີການເງິນ ແລະ ຮອງຜູ້ວ່າການທະນາຄານກາງອາຊຽນ+3, ກອງປະຊຸມຮ່ວມລະຫວ່າງ ປະເທດສະມາຊິກອາຊຽນ ກັບບັນດາສະພາທຸລະກິດ (ປະກອບມີສະຫະລັດອາເມລິກາ, ສະຫະພາບເອີຣົບ ແລະ ອາຊຽນ) ແລະ ກອງປະຊຸມສຳມະນາປິ່ນອ້ອມອື່ນໆ ຊຶ່ງໄດ້ຈັດຂຶ້ນທີ່ ບາຫລີ ປະ ເທດອິນໂດເນເຊຍ.
ໃນສະພາບທີ່ບັນດາປະເທດທົ່ວໂລກ ກຳລັງຟື້ນຟູຈາກຜົນກະທົບຂອງການລະບາດຂອງພະຍາດ ໂຄວິດ-19 ແລະ ການຫລຸດຜ່ອນມາດຕະການ ໄດ້ເຮັດໃຫ້ເສດຖະກິດຂອງອາຊຽນ ແລະ ພາກພື້ນ ເລີ່ມມີການຂະຫຍາຍຕົວທີ່ດີຂຶ້ນ, ແຕ່ການສືບຕໍ່ຜັນປ່ຽນສະພາບຂອງໂລກ ເຊັ່ນ: ບັນ ຫາດິນຟ້າອາກາດ, ບັນຫາເງິນເຟີ້ ແລະ ລາຄາສິນຄ້າທີ່ຍັງສູງ ອາດຍັງເປັນສິ່ງທ້າທາຍສົມຄວນຕໍ່ແຜນການພັດທະ ນາໃນອາຊຽນ ແລະ ພາກພື້ນ. ສະນັ້ນ, ກອງປະຊຸມໃນຄັ້ງນີ້ນອກຈາກສືບຕໍ່ປຶກສາຫາລືກ່ຽວກັບການຮ່ວມມື, ການເຊື່ອມໂຍງດ້ານການເງິນ-ເງິນຕາເຊັ່ນ: ການຈັດຕັ້ງປະຕິບັດແຜນແມ່ບົດອາຊຽນ 2025, ອຳນວຍຄວາມສະດວກໃນການດຳເນີນທຸລະກິດ ແລະ ການຄ້າ ໃນພາກພື້ນ, ການຄົ້ນຄວ້າປະເມີນເສດຖະກິດມະຫາພາກ, ການຈັດຕັ້ງປະຕິບັດບັນດາກອງທຶນ ແລະ ການຊ່ວຍເຫລືອດ້ານເຕັກນິກວິຊາ ການ. ພ້ອມນັ້ນ, ຍັງໄດ້ປຶກສາຫາລື ບັນດາວຽກງານສຳຄັນອື່ນໆ ທີ່ເຫັນວ່າເປັນວຽກງານບຸລິມະສິດ ທີ່ບັນດາປະເທດສະມາຊິກ ໂດຍຮ່ວມກັບບັນດາຄູ່ຮ່ວມພັດທະນາ ໄດ້ສຸມໃສ່ເສີມຂະຫຍາຍການຮ່ວມມືເຊັ່ນ: ການສ້າງສະພາບແວດລ້ອມ ເພື່ອສົ່ງເສີມດ້ານສຸຂະພາບ ແລະ ສາທາລະນະສຸກ, ການຮັບປະກັນດ້ານສະບຽງອາຫານ, ການຫັນການຮ່ວມມືເປັນຮູບແບບເສດຖະກິດດີຈິຕ໋ອນ, ການສົ່ງເສີມການພັດທະນາຂອງວິສາຫະກິດຂະໜາດນ້ອຍ ແລະ ກາງ, ການພັດທະນາໂຄງລ່າງພື້ນຖານ ແລະ ການລົງທຶນການເງິນສີຂຽວ ແລະ ການສ້າງເຄື່ອງມືດ້ານການເງິນ ທີ່ຮັບປະ ກັນຄວາມຍືນຍົງ ແລະ ສົ່ງເສີມການພັດທະນເສດຖະກິດ, ພ້ອມທັງສາມາດຮອງຮັບສະພາບການປ່ຽນແປງ ຫລື ຄວາມສ່ຽງ ທີ່ອາດເກີດຂຶ້ນອີກໃນອະນາຄົດ.
ນອກນັ້ນ, ຍັງໄດ້ມີການພົບປະສອງຝ່າຍ ເພື່ອແລກປ່ຽນຍຸດທະສາດການຮ່ວມມື ດ້ານເສດຖະກິດ-ການເງິນ ແລະ ການສະໜອງການຊ່ວຍເຫລືອດ້ານວິຊາການ ໂດຍສະ ເພາະໃນໂອກາດທີ່ສປປ ລາວ ຈະເປັນເຈົ້າພາບ ແລະ ປະ ທານກອງປະຊຸມ 2024 ເຊິ່ງໃນລະຫວ່າງວັນທີ 30-31 ມີນາ 2023 ນີ້, ທ່ານ ຮອງລັດຖະມົນຕີກະຊວງການເງິນຍັງໄດ້ນໍາພາຄະນະຜູ້ແທນ ເຂົ້າຮ່ວມກອງປະຊຸມລະດັບລັດຖະມົນຕີການເງິນອາຊຽນ ແລະ ຜູ້ວ່າການທະນາຄານອາຊຽນ, ກອງປະຊຸມລັດຖະມົນຕີການເງິນອາຊຽນ ຄັ້ງທີ 27 (27th AFMM), ກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ ຄັ້ງທີ 9 (9th AFMGM), ກອງປະຊຸມວົງແຄບຂອງລັດຖະມົນຕີການເງິນອາຊຽນ (AFMM Retreat), ກອງປະຊຸມລະຫວ່າງ AFMGM ແລະ ສະພາທຸລະກິດສະຫະລັດອາເມລິກາ-ອາຊຽນ (US – ASEAN), ກອງປະຊຸມລະຫວ່າງ AFMGM ແລະ ສະພາທຸລະກິດເອີຣົບ-ອາຊຽນ (EU– ASEAN), ກອງປະຊຸມລະຫວ່າງ AFMGM ແລະ ສະຖາບັນການເງິນສາກົນ (IFIs) ເພື່ອຍົກສູງວຽກງານການຮ່ວມມື ແລະ ແລກປ່ຽນ ບົດຮຽນທາງດ້ານເສດຖະກິດ-ການເງິນ ລະ ຫວ່າງອາຊຽນ ກັບບັນດາປະເທດເສດຖະກິດຂະໜາດໃຫຍ່ ແລະ ສະຖາບັນການເງິນສາກົນ.
ໄປຄຽງຄູ່ກັນນັ້ນ, ຄະນະຜູ້ແທນສປປ ລາວ ຈະສືບຕໍ່ເຂົ້າຮ່ວມກອງປະຊຸມສໍາມະນາປິ່ນອ້ອມເປັນຕົ້ນ: ກອງປະຊຸມສຳມະນາປຶກສາຫາລືລະດັບສູງ, ເພື່ອສົ່ງເສີມການເຂົ້າຫາແຫລ່ງທຶນເປັນດິຈິຕອນ ແລະ ຄວາມສາມາດການເຂົ້າຫາແຫລ່ງທຶນ ສຳລັບຂະແໜງທຸລະກິດຍ່ອຍ ແລະ ກອງປະຊຸມສໍາມະນາລະດັບສູງຂອງ ອາຊຽນ. ສຳລັບກອງປະ ຊຸມໃນຄັ້ງນີ້, ເຕັມໄປດ້ວຍບັນຍາກາດອັນດີ ແລະ ຄວາມໝາຍສໍາຄັນ ໂດຍສະເພາະການຊຸກຍູ້ວຽກງານການຮ່ວມມື ແລະ ການເຊື່ອມໂຍງ ດ້ານການເງິນອາຊຽນ ເພື່ອບັນລຸຕາມເປົ້າໝາຍແຜນແມ່ບົດ ປະຊາຄົມເສດຖະກິດອາຊຽນແຕ່ນີ້ຮອດປີ 2025 ແລະ ຍິນດີຕໍ່ກັບສປປ ລາວ ທີ່ຈະໄດ້ເປັນປະທານກອງປະຊຸມດັ່ງກ່າວໃນປີ 2024.
