ໃນວັນທີ 29 ມີນາ 2023, ທ່ານ ສົມຫວັງ ຄຸຣຸລັດ ຜູ້ອໍານວຍການບໍລິສັດ ຍອດງື່ມ ພາວເວີມະຫາຊົນ ໄດ້ເຂົ້າມອບເງິນປະກອບສ່ວນຊຸກຍູ້ວັນສ້າງຕັ້ງຫ້ອງວ່າການສູນກາງພັກ ຄົບຮອບ 68 ປີ( 24 ມີນາ 1955-24 ມີນາ 2023 ) ມູນຄ່າ 168,000,000 ກີບ (ໜຶ່ງຮ້ອຍຫົກສິບແປດລ້ານກີບ) ໃຫ້ແກ່ຫ້ອງວ່າການສູນກາງພັກ ເພື່ອປະກອບສ່ວນເຂົ້າໃນວຽກງານ ສຳຄັນຂອງຫ້ອງວ່າການສູນກາງພັກ, ຮັບໂດຍ ທ່ານ ທອງສະລິດ ມັງໜໍ່ເມກ ຫົວໜ້າຫ້ອງວ່າການສູນກາງພັກ.
ໂອກາດນີ້ ທ່ານ ສົມຫວັງ ຄຸຣຸລັດ ໄດ້ລາຍງານສະພາບການ ເຄື່ອນໄຫວທຸລະກິດຂອງບໍລິສັດຊຶ່ງໄດ້ດຳເນີນຫຼາຍທຸລະກິດເຊັ່ນ: ໂຮງກັ່ນນ້ຳມັນສຳເລັດຮູບ, ການຄ້າຂາເຂົ້າ-ຂາອອກ, ກໍ່ສ້າງຂົວທາງ, ຂົນສົ່ງ, ກະສິກໍາຄົບວົງຈອນ ແລະ ການທ່ອງທ່ຽວ, ພິເສດສຳລັບທຸລະກິດໂຮງກັ່ນນ້ຳມັນສຳເລັດຮູບແມ່ນ ສາມາດຜະລິດນ້ຳມັນກາຊວນຮັບໃຊ້ເຂດພາກເໜືອ ພ້ອມນັ້ນ,ໃນອະນາຄົດອັນໃກ້ນີ້, ບໍລິສັດຈະສາມາດຜະລິດໄດ້ທັງນ້ຳມັນກາຊວນ ແລະ ແອັດຊັງ ເພື່ອຈຳໜ່າຍຢູ່ໃນຂອບເຂດພາກເໜືອ ແລະ ເພື່ອສະໜອງໃຫ້ບັນດາໂຄງການ ຂອງພາກທຸລະກິດ ແລະ ຈະປະຕິບັດພັນທະອາກອນໃຫ້ຄົບຖ້ວນ ໃຫ້ແກ່ງົບປະມານຂອງລັດ.
ພ້ອມນີ້ ທ່ານ ທອງສະລິດ ມັງໜໍ່ເມກ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈ ປະທານ ປະທານ ບໍລິສັດ ພ້ອມດ້ວຍຄະນະ ທີ່ໄດ້ປະກອບສ່ວນສະໜັບສະໜູນຊ່ວຍເຫຼືອເງິນຊຸກຍູ້ເຂົ້າໃນວຽກງານວຽກງານຫ້ອງວ່າສູນກາງພັກ, ພ້ອມທັງຊົມເຊີຍບໍລິສັດ ທີ່ເປັນຜູ້ມີຄວາມຄິດລິເລີ່ມໃນການດຳເນີນທຸລະກິດ ໂດຍສະເພາະແມ່ນການສ້າງໂຮງກັ່ນນ້ຳມັນ ອັນໄດ້ຊ່ວຍແກ້ໄຂ ບັນຫາວິກິດທາງນ້ຳມັນ ແລະ ຫວັງເປັນຢ່າງຍິງວ່າ ບໍລິສັດຈະສືບຕໍ່ມີຄວາມເຂັ້ມແຂງໂດຍໝູນໃຊ້ຍຸດທະສາດ ແລະ ທ່າແຮງບົ່ມຊ້ອນ ເພື່ອໃຫ້ເກີດຜົນປະໂຫຍດສູງສຸດ ແກ່ປະເທດຊາດ ແລະ ປະຊາຊົນ.
ຂ່າວ-ພາບ: ຫ້ອງວ່າການສູນກາງພັກ
