ການແຂ່ງຂັນເຕະບານ 6 ຮັບ 1 ລາຍການ ມັດສະດາ ເຍົາວະຊົນ ລີກ ຄັ້ງທຳອິດ ຫຼື ລາຍການ “Mazda Youth League 2023” ຊຶ່ງມີການຊີງໄຊ 3 ຮຸ່ນ ຄື ຮຸ່ນອາຍຸບໍ່ເກີນ 10 ປີ (ຢູ-10), ຢູ-12 ແລະ ຢູ-14 ປີ ຈະເປີດສາກຂຶ້ນໃນລະຫວ່າງວັນທີ 1-2 ເມສານີ້ ເພື່ອເປັນການສົ່ງເສີມວົງການກິລາບານເຕະລາວໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ເວົ້າສະເພາະແມ່ນເປັນການສ້າງໂອກາດໃຫ້ນັກກິລາເຍົາວະຊົນແຕ່ລະສະໂມສອນ ໄດ້ມີເວທີສະແດງ ເພື່ອພັດທະນາຕົນເອງກ້າວສູ່ລະດັບອາຊີບ ໃນອະນາຄົດ.
ພິທີຈັບສະຫຼາກເຕະບານ ລາຍການ Mazda Youth League 2023 ໄດ້ມີຂຶ້ນເມື່ອວັນທີ 24 ມີນາ ຜ່ານມາ ທີ່ສູນບໍລິການລູກຄ້າ Mazda ເຂດສີໄຄ ເມືອງສີໂຄດຕະບອງ ນະຄອນຫຼວງວຽງຈັນ, ໂດຍມີ ທ່ານ ທິບພະເນດ ແກ້ວມະນິວົງ ປະທານບໍລິສັດ ແກ້ວໂອໂຕ ກຣຸບ ຈຳກັດ, ປະທານສະໂມສອນ ມັດສະດາ ຈີບີ ເອັບຊີ ທັງເປັນປະທານຈັດການແຂ່ງຂັນ ພ້ອມດ້ວຍຄະນະ, ບັນດາຄະນະນຳ ແລະ ຄູຝຶກແຕ່ລະສະໂມສອນ ຕະຫຼອດຮອດສື່ມວນຊົນເຂົ້າຮ່ວມ.
ລາຍການນີ້ ຈະນຳໃຊ້ລະບົບການແຂ່ງຂັນ ແບບລີກ ມີຮອບຂາໄປ-ຂາກັບ ຜັດປ່ຽນກັນເປັນເຈົ້າບ້ານ ກໍຄື ມີແຂ່ງຂັນນອກບ້ານ ແລະ ໃນບ້ານ ຄາດວ່າຈະດຳເນີນແຂ່ງຂັນຈົນໄປເຖິງເດືອນມິຖຸນາ 2023 ຈຶ່ງຈະສຳເລັດ. ສຳລັບ ຢູ-10 ປີ ມີ 6 ພາກສ່ວນເຂົ້າຮ່ວມ ປະກອບມີ ເຈົ້າພາບ ມັດສະດາ ຈີບີ ເອັບຊີ, ເອໄອເອັດ, ມາດເຕີ ເຊເວັນ ເອັບຊີ, ວຽງຈັນ ເອັບທີ, ຈຳປາຮັກ ແລະ ດັບເບິນຢູໄອຈີ ນາຄາ; ຢູ-12 ປີ ມີ 10 ພາກສ່ວນ ຄື: ປາກຊັນ ເອັບຊີ, ເອັມພີທີ ເອັບຊີ, ເອັບຊີ ຕາລັນຕາ, ວຽງຈັນ ເອັບທີ, ດັບເບິນຢູໄອຈີ ນາຄາ, ຈຳປາຮັກ ເອັບຊີ, ບີບີບີ ໂອໂຕ ເອັບຊີ, ເອໄອເອັດ, ມັດສະດາ ຈີບີ ເອັບຊີ ແລະ ມາດເຕີ ເຊເວັນ ເອັບຊີ; ຢູ-14 ປີ ມີ 10 ພາກສ່ວນເຂົ້າຮ່ວມ ປະກອບມີ ປາກຊັນ ເອັບຊີ, ມະຫາວິທະຍາໄລແຫ່ງຊາດ, ເອັບຊີ ຕາລັນຕາ, ວຽງຈັນ ເອັບທີ, ເອັບເຮັດແອວ (FHL), ຈຳປາຮັກ ເອັບຊີ, ເອສຣາ, ເອໄອເອັດ, ມັດສະດາ ຈີບີ ເອັບຊີ ແລະ ມາດເຕີ ເຊເວັນ ເອັບຊີ.
ການແຂ່ງຂັນລາຍການດັ່ງກ່າວ ມີການຊີງເງິນລາງວັນລວມ 30.000.000 ກີບ ສຳລັບທີມແຊ໋ມ 3 ຮຸ່ນ ຄື: ຢູ-10, ຢູ-12 ແລະ ຢ-14 ຈະໄດ້ຮັບຂັນແຊ໋ມ ພ້ອມເງິນສົດທີມລະ 5.000.000 ກີບ; ອັນດັບທີ 2 ຈະໄດ້ຮັບເງິນສົດທີມລະ 3.000.000 ກີບ; ອັນດັບທີ 3 ແລະ ອັນດັບທີ 4 ຈະໄດ້ຮັບເງິນສົດທີມລະ 1.000.000 ກີບ. ນອກຈາກນີ້ ທຸກທີມທີ່ເຂົ້າຮ່ວມແຂ່ງຂັນ ກໍຍັງຈະໄດ້ຮັບເງິນບຳລຸງທີມ ທີມລະ 500.000 ກີບອີກດ້ວຍ.
ຂ່າວໂດຍ ສົງການ ພັນແພງດີ
