ກະຊວງສຶກສາທິການ ແລະ ກິລາ ຫຼື ສສກ ຮ່ວມກັບ ອົງການໄຈກາ (JICA) ປະຈຳ ສປປ ລາວ ຈັດກອງປະຊຸມຝຶກອົບຮົມການຄຸ້ມຄອງ ແລະ ບໍາລຸງຮັກສາສະໜາມກິລາ ພາຍໃຕ້ຫົວຂໍ້ “ຄຸນຄ່າ ແລະ ພະລັງຂອງກິລາ” ປະສົບການຈາກປະເທດຍີ່ປຸ່ນ ເມື່ອບໍ່ດົນມານີ້ ທີ່ນະຄອນຫຼວງວຽງຈັນ, ໂດຍມີ ທ່ານ ປອ ນາງ ດາລາວອນ ກິດຕິພັນ ຫົວໜ້າຫ້ອງການ ກະຊວງສຶກສາທິການ ແລະ ກິລາ, ທ່ານ ນາກາໂນະ ຈຸນຢະ (NAKANO Junya) ອຸປະທູດ ສະຖານທູດຍີ່ປຸ່ນ ປະຈຳ ສປປ ລາວ ແລະ ທ່ານ ນາງາເຊະ ໂທຊິໂອະ (NAGASE Toshio) ຫົວໜ້າອົງການໄຈກາ ປະຈຳລາວ ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ຜູ້ອໍານວຍການ, ຫົວໜ້າ-ຮອງຫົວໜ້າພະແນກ, ຜູ້ຕາງໜ້າຈາກ ມະຫາວິທະຍາໄລແຫ່ງຊາດ, ສະຖາບັນກິລາ-ກາຍະກໍາ, ວິທະຍາໄລພະລະສຶກສາ, ຄະນະກຳມະການໂອແລມປິກ-ພາຣາແລມປິກແຫ່ງຊາດລາວ, ສະໜາມກິລາແຫ່ງຊາດ (ຫຼັກ 16), ນັກກິລາຄົນພິການ, ນັກກິລາທົ່ວໄປ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ບັນດາຜູ້ເຂົ້າຮ່ວມໄດ້ຮັບຟັງການນໍາສະເໜີສະພາບການກິລາຢູ່ປະເທດຍີ່ປຸ່ນ ແລະ ປະເທດລາວ, ການນຳໃຊ້, ການດໍາເນີນງານ ແລະ ການບຸລະນະຮັກສາສະໜາມກິລາຢ່າງເໝາະສົມ ແລະ ປຶກສາຫາລືກ່ຽວກັບ ຫົວຂໍ້, ເນື້ອໃນການຝຶກອົບຮົມການຄຸ້ມຄອງສະໜາມກິລາ ໃນ ສປປ ລາວ ທີ່ຈະຈັດຂຶ້ນຢູ່ຍີ່ປຸ່ນໃນໄວໆນີ້. ພ້ອມນັ້ນ, ໃນກອງປະຊຸມຍັງໄດ້ນຳສະເໜີຫົວຂໍ້ກ່ຽວກັບຄຸນຄ່າຂອງກິລາໃນລາວ ແລະ ສະໜາມກິລາເຈົ້າອານຸວົງ; ຫົວຂໍ້ຂົວຜ່ານກິລາບານເຕະ: ປັດຊະຍາທີ່ J-LEAGUE ແລະ ວິທີການເຊື່ອມຕໍ່ຍີ່ປຸ່ນ ແລະ ອາຊີຕາເວັນອອກສ່ຽງໃຕ້ຂອງ J. LEAGUE; ຫົວຂໍ້ກິດຈະກໍາບ້ານເກີດ: ວິທີທີ່ Omiya Ardija ປະກອບສ່ວນໃຫ້ກັບຊຸມຊົນທ້ອງຖິ່ນໂດຍຜ່ານກິລາ; ຫົວຂໍ້ຄຸນຄ່າຂອງກິລາໃນການມີສ່ວນຮ່ວມທາງສັງຄົມ; ຫົວຂໍ້ປຶກສາຫາລືກ່ຽວກັບໂຄງການຝຶກອົບຮົມທີ່ປະເທດຍີ່ປຸ່ນ;ຫົວຂໍ້ພົບກັນທີ່ແຂວງໄຊຕະມະ: ຕັ້ງຢູ່ພາກເໜືອຂອງນະຄອນຫຼວງໂຕກຽວ. ນອກຈາກນີ້, ໃນກອງປະຊຸມຍັງໄດ້ສົນທະນາ ແລກປ່ຽນຄວາມຄິດເຫັນລະຫວ່າງ J.LEAGUE, JICE ແລະ Omiya Ardija ແລະ ຜູ້ເຂົ້າຮ່ວມກອງປະຊຸມຈາກຝ່າຍລາວ ກ່ຽວກັບປະສົບການຂອງຍີ່ປຸ່ນໃນການຄຸ້ມຄອງສະຫນາມກິລາທ້ອງຖິ່ນ, ລະບົບການຄຸ້ມຄອງຂອງທີມ ແລະ ສະໂມສອນ, ການລະດົມທຶນ, ຄວາມສໍາພັນຂອງຂະແໜງການກິລາ ແລະ ຊຸມຊົນທ້ອງຖິ່ນ ແລະ ອື່ນໆ.
ໂອກາດນີ້, ທ່ານ ປອ ນາງ ດາລາວອນ ກິດຕິພັນ ກໍໄດ້ຍົກໃຫ້ເຫັນເຖິງຄວາມສຳຄັນຂອງສະໜາມກິລາເຈົ້າອານຸວົງ ສຳລັບຄົນລາວ ເປັນຕົ້ນແມ່ນນັກກິລາຄົນພິການ, ນັກກິລາທົ່ວໄປ ແລະ ມວນຊົນທຸກເພດທຸກໄວ. ຊຶ່ງການຝຶກອົບຮົມ ກ່ຽວກັບການຄຸ້ມຄອງ ແລະ ບໍາລຸງຮັກສາສະໜາມກິລາທີ່ປະເທດຍີ່ປຸ່ນ ຈະເປັນປະສົບການທີ່ດີໃຫ້ແກ່ພະນັກງານວິຊາການຂອງ ກະຊວງສຶກສາທິການ ແລະ ກິລາ ໃນການກະກຽມ ແລະ ຮຽນຮູ້ວິທີການຈັດການສະໜາມກິລາທີ່ດີ ເພື່ອຮັກສາສະໜາມກິລາໃຫ້ນຳໃຊ້ໄດ້ຍາວນານ ແລະ ເກີດປະໂຫຍດສູງສຸດ.
ຂໍ້ມູນ-ພາບ: ຫ້ອງການກະຊວງ ສສກ
