ກະຊວງ ເຕັກໂນໂລຊີ ແລະ ການສື່ສານ ສປປ ລາວ ແລະ ກະຊວງ ວິທະຍາສາດ ແລະ ເຕັກໂນໂລຊີ ສສ ຫວຽດນາມຈະຈັດງານວາງສະແດງ, ຈັບຄູ່ຮ່ວມມືດ້ານເຕັກໂນໂລຊີ ນະວັດຕະກຳ ລາວ-ຫວຽດນາມ (Tech-Innovation Vietnam-Laos) ປະຈໍາປີ 2023 ຂຶ້ນ ໃນລະຫວ່ງວັນທີ 4-5 ເມສາ 2023 ນີ້, ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງ ເຕັກໂນໂລຊີ ແລະ ການສື່ສານໄດ້ຖະແຫຼງຂ່າວກ່ຽວກັບການຈັດງານ ດັ່ງກ່າວເມື່ອວັນທີ 21 ມີນາ ນີ້ວ່າ: ຈຸດປະສົງຕົ້ນຕໍຂອງການຈັດງານວາງສະແດງດັ່ງກ່າວແມ່ນເພື່ອຊຸກຍູ້ການຮ່ວມມືດ້ານການນຳໃຊ້, ຖ່າຍທອດ ເຕັກໂນໂລຊີ ນະວັດຕະກຳ, ແລະ ຊອກຄູ່ຮ່ວມມື ລະຫວ່າງ ໜ່ວຍງານຄົ້ນຄວ້າວິໄຈ ແລະ ບັນດາວິສາຫະກິດຂອງສອງປະເທດ, ເພີ່ມທະວີການພົວພັນຮ່ວມມື, ຮອບດ້ານບົນພື້ນຖານນ້ຳໃຈມິດຕະພາບອັນຍິ່ງໃຫຍ່ ແລະ ຄວາມສາມັກຄີພິເສດ ທີ່ເປັນມູນເຊື້ອອັນຍາວນານ ລະຫວ່າງ ລາວ-ຫວຽດນາມ, ເພື່ອເຊື່ອມໂຍງບັນດານັກຄົ້ນຄວ້າວິໄຈ ແລະ ນັກພັດທະນາເຕັກໂນໂລຊີ ນະວັດຕະກຳ ຂອງຫວຽດນາມ ກັບບັນດາອົງການຂອງລັດ ແລະ ບັນດາຫົວໜ່ວຍທຸລະກິດລາວ ເພື່ອຊຸກຍູ້ສົ່ງເສີມດ້ານການຄ້າ ແລະ ການລົງທຶນດ້ານເຕັກໂນໂລຊີ ນະວັດຕະກຳ ໃນຂົງເຂດທີ່ສຳຄັນຂອງລາວ, ເພື່ອສົ່ງເສີມການຖ່າຍທອດເຕັກໂນໂລຊີ, ການນຳໃຊ້ນະວັດຕະກຳ ສ້າງ ແລະ ຊອກກາລະໂອກາດໃນການຮ່ວມມື, ການລົງທຶນ ແລະ ການຖ່າຍທອດເຕັກໂນໂລຊີ ລະຫວ່າງບັນດາອົງການຈັດຕັ້ງ, ບັນດາວິສະຫະກິດ ລາວ-ຫວຽດນາມ.
ງານວາງສະແດງ, ຊອກຄູ່ຮ່ວມມືດ້ານເຕັກໂນໂລຊີ ນະວັດຕະກຳ ລາວ-ຫວຽດນາມ (Tech-Innovation Vietnam-Laos) ປະຈໍາປີ 2023 ດັ່ງກ່າວ ຄາດວ່າ ຈະຈັດຂຶ້ນໃນ ລະຫວ່າງວັນທີ 4-5 ເມສາ 2023, ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC), ນະຄອນຫຼວງງວຽງຈັນ.
ໃນງານຄັ້ງນີ້ເປັນການຮ່ວມມືລະຫວ່າງ 2 ກະຊວງ ກໍຄືກະຊວງ ເຕັກໂນໂລຊີ ແລະ ການສື່ສານ ສປປ ລາວ ແລະ ກະຊວງ ວິທະຍາສາດ ແລະ ເຕັກໂນໂລຊີ ສສ ຫວຽດນາມ ຊຶ່ງໄດ້ມີການເຊື້ອເຊີນບັນດາສະຖາບັນການຄົ້ນຄວ້າ, ສະຖາບັນການສຶກສາ, ພາກສ່ວນທຸກິດ ແລະ ຜູ້ປະກອບກິດຈະການທຸລະກິດ Startup ທີ່ມີຊື່ສຽງ ຈາກ 2 ປະເທດເຂົ້າຮ່ວມ, ຊຶ່ງຈະໄດ້ຈັດຫຼາຍກິດຈະກໍາຢ່າງເປັນຂະບວນຟົດຟື້ນ ເຊັ່ນ: ງານວາງສະແດງ ກ່ຽວກັບເຕັກໂນໂລຊີການສື່ສານຂໍ້ມູນຂ່າວສານ,ເຕັກໂນໂລຊີດິຈິຕ໋ອນ, ພະລັງງານທົດແທນ, ການບຳບັດສິ່ງແວດລ້ອມ, ການເກັບຮັກສາອາຫານ-ເຕັກໂນໂລຊີປຸງແຕ່ງ, ຂົງເຂດການທ່ອງທ່ຽວ, ການຄ້າເອເລັກໂຕນິກ(E-commerce), ເຕັກໂນໂລຊີ ນະວັດຕະກຳໃໝ່, ຜົນງານການຄົ້ນຄວ້າ ແລະ ຜະລິດຕະພັນຈາກຫົວຄິດປະດິດສ້າງ ຂອງທຸລະກິດ Startup ຈາກ ສປປ ລາວ ແລະ ສສ ຫວຽດນາມ ຈຳນວນ 60 ກວ່າຮ້ານວາງສະແດງ (booth) ໃນນັ້ນຄາດຄະເນ ມີຮ້ານວາງສະແດງ ຂອງຫວຽດນາມ ຈຳນວນ 30 ຮ້ານ ແລະ ຮ້ານວາງສະແດງຂອງຄູ່ຮ່ວມມືລາວ ຈຳນວນ 30 ຮ້ານ, ມີກອງປະຊຸມສຳມະນາ ກ່ຽວກັບວິຊາການ ຫົວຂໍ້: ເປີດກ້ວາງການຮ່ວມມື ແລະ ກຳນົດແຜນພັດທະນາ ລະບົບນິເວດນະວັດຕະກຳ ແລະ ຜູ້ປະກອບການທຸລະກິດ Startup, ເວທີເສວະນາ ການເຊື່ອມໂຍງດ້ານເຕັກໂນໂລຊີ ແລະ ຜູ້ປະກອບການທຸລະກິດ Startup. ເນື້ອໃນຕົ້ນຕໍ: (1) ຂຸດຄົ້ນຊອກຮູ້, ຖ່າຍທອດເຕັກໂນໂລຊີ ແລະ ນະວັດຕະກຳ ຢູ່ ສສ ຫວຽດນາມ; (2) ຊຸກຍູ້ສົ່ງເສີມຖ່າຍທອດເຕັກໂນໂລຊີ ແລະ ນະວັດຕະກໍາ ຂອງ ສປປ ລາວ; (3) ກໍານົດແຜນຮ່ວມມື ເພື່ອພັດທະນາລະບົບນິເວດນະວັດຕະກຳໃໝ່ ລະຫວ່າງ ສອງປະເທດ ສປປ ລາວ ແລະ ສສ ຫວຽດນາມ (4) ພັດທະນາລະບົບນິເວດນະວັດຕະກຳ ໃໝ່ ສສ ຫວຽດນາມ ແລະ ເປີດກວ້າງຮ່ວມກັບ ສປປ ລາວ.
ສະນັ້ນຂໍເຊີນຊວນບັນດາກະຊວງ, ຂະແໜງການພາກລັດ, ສະຖາບັນຄົ້ນຄວ້າ, ສະຖາບັນການສຶກສາ, ມະຫາວິທະຍາໄລ, ພາກທຸລະກິດ ເອກະຊົນ ແລະ ຜູ້ປະກອບການດ້ານໄອຊີທີ ແລະ ດີຈີຕອນ ທັງພາຍໃນ ແລະ ຕ່າງປະເທດ ເຂົ້າຮ່ວມໃນງານດັ່ງກ່າວ ເພື່ອວາງສະແດງຜົນງານ ໃຫ້ການອຸປະຖຳ ແລະ ເຂົ້າຊົມກິດຈະກຳຕ່າງໆຂອງການວາງສະແດງຄັ້ງນີ້ ຢ່າງຟົດຟື້ນ.
(ຂ່າວ-ພາບ:ສຳນານ-ພັດ)
