ຕາມຂ່າວຈາກລາຣີຊສາ ວັນທີ 2 ມີນານີ້ ຍອດຜູ້ເສຍຊີວິດຈາກເຫດລົດໄຟ 2 ຂະບວນຕຳກັນໃກ້ກັບເມືອງລາຣີຊສາ ປະເທດເກຣັກ ເພີ່ມຂຶ້ນຢ່າງໜ້ອຍ 43 ຄົນ, ບາດເຈັບຫລາຍກວ່າ 50 ຄົນ. ປັດຈຸບັນເຈົ້າໜ້າທີ່ກູ້ໄພພວມໃຊ້ລົດເຄນຍົກຊາກລົດໄຟ ເພື່ອເປີດທາງໃຫ້ໜ່ວຍກູ້ໄພຄົ້ນຫາຜູ້ລອດຊີວິດຈາກເຫດການເກີດຂຶ້ນທາງພາກເໜືອຂອງເກຣັກ ຫ່າງຈາກ ນະຄອນຫລວງອາແຕນ ປະມານ 380 ກິໂລແມັດ.
ຂະນະເກີດເຫດຂະບວນ ລົດໄຟ ໂດຍສານ ມີຜູ້ໂດຍສານປະມານ 350 ຄົນ ແລະ ມຸ້ງໜ້າໄປເມືອງເທສຊາໂລນິກິ ແລ່ນມາ ດ້ວຍຄວາມໄວສູງຕຳກັບລົດໄຟຂົນສົ່ງສິນຄ້າຢ່າງຮຸນແຮງເຮັດໃຫ້ຕູ້ລົດໄຟຢ່າງໜ້ອຍ 1 ຕູ້ ເສຍຫາຍຢ່າງໜັກ ແລະ ອີກ 3 ຕູ້ເກີດໄຟໄໝ້. ຂະນະທີ່ ຕູ້ລົດໄຟ 4 ຕູ້ທຳອິດ ຂອງຂະບວນ ລົດໄຟໂດຍສານຕົກລາງ. ຂະນະນີ້ ເຈົ້າໜ້າທີ່ຕຳຫຼວດຂອງເກຣັກ ພວມສືບສວນສອບສວນຫາສາເຫດທີ່ເກີດຂຶ້ນຄັ້ງນີ້ຢ່າງຮີບດ່ວນ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
