ຕາມຂ່າວຈາກອັງກິດ ວັນທີ 2 ມີນານີ້, ຮ້ານສັບພະສິນຄ້າໃນອັງກິດ ຈຳກັດການຊື້ຜັກ ແລະ ໝາກໄມ້ ເນື່ອງຈາກສະພາບ ອາກາດປ່ຽນແປງຝົນຕົກໜັກ ແລະ ນ້ຳຖ້ວມ ສົ່ງຜົນໃຫ້ສິນຄ້າຂາດຕະຫລາດ ໂດຍສະເພາະໝາກເລັ່ນ, ໝາກແຕງ, ໝາກເຜັດໃຫຍ່ ແລະ ໝາກສະຕໍເບີຣີ. ເນື່ອງຈາກການປ່ຽນແປງຂອງດິນຟ້າອາກາດໃນເອີຣົບ ແລະ ອາຟຣິກກາເໜືອ ສົ່ງຜົນກະທົບຕໍ່ຜົນຜະລິດເຮັດໃຫ້ສິນຄ້າຂາດຕະຫລາດໂດຍບາງແຫ່ງຈຳກັດການຊື້ຜັກ ແລະ ໝາກໄມ້ ໄດ້ພຽງ 3 ຊະນິດຕໍ່ຄົນ. ຂະນະທີ່ຮ້ານຂາຍເຄື່ອງຍ່ອຍບໍ່ຈຳກັດການຊື້ແຕ່ສິນຄ້າມີລາຄາສູງຂຶ້ນ. ຜູ້ສົ່ງອອກໃນປະເທດມາຣົກ ລະບຸວ່າ: ໃນອາທິດຜ່ານມາມີອາກາດໜາວແຮງ ຝົນຕົກໜັກ ແລະ ເກີດນ້ຳຖ້ວມ ສົ່ງຜົນຕໍ່ຜະລິດຕະພັນທາງກະສິກຳ ສ່ວນທີ່ແອັດສະປາຍ ຕ້ອງຍົກເລີກການຂົນສົ່ງສິນຄ້າທາງເຮືອ ເນື່ອງຈາກສະພາບອາກາດທີ່ປ່ຽນແປງ. ສ່ວນສະມາຄົມຜູ້ຄ້າຍ່ອຍໃນອັງກິດ ຄາດວ່າ ສະຖານະການສິນຄ້າຂາດຕະຫລາດຈະມີຕໍ່ໄປອີກ 2-3ອາທິດ ຕໍ່ໜ້າ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
