ຕາມຂ່າວຈາກວິທະຍຸສາກົນຫວຽດນາມ, ເມື່ອບໍ່ດົນມານີ້ ສະພາແຫ່ງຊາດແຟງລັງ ໄດ້ຮັບຮອງເອົາຮ່າງກົດໝາຍ ອະນຸຍາດ ໃຫ້ປະເທດນີ້ເຂົ້າຮ່ວມສົນທິສັນຍາອັກລັງຕິກເໜືອ (NATO) ພາຍຫລັງແຟງລັງປະຕິບັດສຳເລັດທຸກຂັ້ນຕອນນິຕິກຳ ກ່ຽວກັບການເຂົ້າຮ່ວມ NATO ໃນທ້າຍອາຍຸການ ຂອງ ທ່ານ ສັນນາ ມາຣິນ (Sanna Marin), ນາຍົກລັດຖະມົນຕີແຟງລັງ. ຕາມແຜນການແລ້ວ ໃນວັນທີ 2 ເມສາປີນີ້ ແຟງລັງ ຈະຈັດການປ່ອນບັດເລືອກຕັ້ງສະພາຕ່ຳ ແລະ Helsinki ຢາກປະຕິບັດ ສຳເລັດຂັ້ນຕອນນິຕິບັນຍັດນີ້ໂດຍໄວເພື່ອແນໃສ່ຫລີກລ້ຽງຄວາມສ່ຽງເກີດຜົນສະທ້ອນຈາກການເຂົ້າຮ່ວມ NATO ຍ້ອນຊ່ອງວ່າງດ້ານການເມືອງທີ່ອາດຈະເກີດຂຶ້ນພາຍຫລັງການເລືອກຕັ້ງ. ປັດຈຸບັນມີ 28 ປະເທດ ຈາກຈຳນວນ 30 ປະເທດ ສະມາຊິກ NATO ເຫັນດີໃຫ້ແຟງລັງ ແລະ ຊູແອດ ເຂົ້າຮ່ວມເປັນສະມາຊິກຂອງອົງການນີ້. ຍັງພຽງແຕ່ 2 ປະເທດ ຍັງບໍ່ທັນ ເຫັນດີຕໍ່ການຮັບເອົາສອງປະເທດດັ່ງກ່າວເປັນສະມາຊິກແມ່ນຕວັກກີ ແລະ ຮົງກາຣີ, ໃນນັ້ນຕວັກກີ ພວມໄດ້ຮັບຖືວ່າແມ່ນຄວາມກັງວົນໃຫຍ່ທີ່ສຸດ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
