ກອງປະຊຸມສະຫຼຸບວຽກງານ ຮອບດ້ານປະຈຳປີ 2022 ແລະ ວາງແຜນການປີ 2023 ຂອງພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງອັດຕະປື ໄດ້ຈັດຂຶ້ນໃນວັນທີ 15 ກຸມພາ 2023 ນີ້ ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງ ທ່ານ ກົງຈັກ ສີສະຫວາດ ຫົວໜ້າພະແນກ ຖວທ ແຂວງ ອັດຕະປື ເປັນກຽດເຂົ້າຮ່ວມຂອງ ທ່ານ ບຸນເສີດ ເສດທິລາດ ຮອງເຈົ້າແຂວງ ຜູ້ຊີ້ນຳຂົງເຂດວັດທະນະທຳ-ສັງຄົມແຂວງ, ມີຮອງຫົວໜ້າພະແນກ ຖວທ ແແຂວງ, ຫົວໜ້າ-ຮອງຫົວໜ້າ ຫ້ອງການ ຖວທ 5 ເມືອງ ແລະ ບັນພະນັກງານ-ລັດພະກອນເຂົ້າຮ່ວມ.
ທ່ານ ກົງຈັກ ສີສະຫວາດ ໄດ້ກ່າວເປີດໃນກອງປະຊຸມຄັ້ງນີ້ວ່າ: ຈຸດປະສົງຕົ້ນຕໍຂອງກອງປະຊຸມ ແມ່ນເພື່ອສະຫຼຸບວຽກງານ ຖວທ ໃນການຈັດຕັ້ງປະຕິບັດໃນໄລຍະປີ 2022 ທີ່ຜ່ານມາ ແລະ ວາງທິດທາງແຜນການປະຈຳປີ 2023 ເຊິ່ງຕະຫຼອດໄລຍະທີ່ຜ່ານມາຄະນະນຳແຕ່ລະຂັ້ນ ໄດ້ມີຄວາມຮັບຜິດຊອບສູງ ປະກອບສ່ວນເຂົ້າໃນການຊີ້ນຳ-ນຳພາວຽກງານ ຖວທ ຢ່າງໃກ້ຊິດຕິດແທດ ເຊິ່ງສະແດງອອກໃນການເອົາໃຈໃສ່ ກຳນົດບັນດາແຜນການ, ແຜນງານ ແລະ ໂຄງການຈຸດສຸມ ຂອງວຽກງານ ຖວທ ເຂົ້າໃນແຜນພັດທະນາຢູ່ແຂວງອັດຕະປືຢ່າງຖືກຕ້ອງສອດຄ່ອງ, ພະນັກງານ ລັດຖະກອນ ທົ່ວຂະແໜງການ ຖວທ ໄດ້ມີຄວາມຫ້າວຫັນ ໃນການປະຕິບັດໜ້າທີ່ຂອງຕົນ, ໄດ້ເປັນເຈົ້າການປະຕິບັດໜ້າທີ່ການເມືອງ ດ້ວຍຄວາມຮັບຜິດຊອບສູງ, ເປັນເສນາທິການໃຫ້ແກ່ຄະນະພັກ ແລະ ອຳນາດການປົກຄອງທ້ອງຖິ່ນ ອັນໄດ້ເຮັດໃຫ້ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ສືບຕໍ່ຂະຫຍາຍຕົວ ແລະ ໄດ້ຮັບການປັບປຸງດີຂຶ້ນກວ່າເກົ່າ ທັງດ້ານປະລິມານ ແລະ ຄຸນນະພາບ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ ຂອງປະເທດເຮົາໃຫ້ມີຄວາມເຂັ້ມແຂງຂຶ້ນຢ່າງຕໍ່ເນື່ອງ, ປະກອບສ່ວນເຮັດໃຫ້ປະເທດຊາດເຮົາມີຄວາມສະຫງົບ, ມີສະຖຽນລະພາບ ແລະ ຄວາມໝັ້ນຄົງທາງດ້ານການເມືອງທີ່ໜັກແໜ້ນ, ປະຊາຊົນບັນດາເຜົ່າມີຄວາມສາມັກຄີປອງດອງ ແລະ ມີຊີວິດການເປັນຢູ່ທາງດ້ານວັດຖຸ ກໍຄືຈິດໃຈນັບມື້ນັບດີຂຶ້ນ.
ໃນຕະຫລອດໄລຍະດໍາເນີນກອງປະຊຸມຜູ້ເຂົ້າຮ່ວມ ຍັງໄດ້ຮັບຟັງບົດສະຫລຸບການຈັດຕັ້ງປະຕິບັດວຽກງານຖະເເຫລງຂ່າວ ວັດທະນະທໍາ ເເລະ ທ່ອງທ່ຽວ ປະຈຳສົກປີ 2022 ຜ່ານມາ ເເລະ ວາງທິດທາງເເຜນການໃນປີ 2023 ທີ່ສະເຫນີໂດຍ ທ່ານ ອ໋ອງຄຳ ຄູນສະໄໝ ຮອງຮອງຫົວໜ້າພະແນກ ຖະເເຫລງຂ່າວ ວັດທະນະທໍາ ເເລະ ທ່ອງທ່ຽວ ພ້ອມທັງປະກອບຄໍາ ເຫັນໃສ່ບົດລາຍງານດັ່ງກ່າວຢ່າງມີຈຸດສຸມ ເເລະ ເປັນໄປຕາມທິດຊີ້ນໍາຂອງປະທານກອງປະຊຸມດ້ວຍຄວາມຮັບຜິດຊອບສູງ ກົງໄປ-ກົງມາ ເເລະ ມີລັກສະນະສ້າງສັນ ເປັນຕົ້ນ ແມ່ນການປະກອບສ່ວນຈາກຕ່າງໜ້າຫ້ອງການ ຖວທ 5 ຕົວເມືອງເເນໃສ່ເຮັດໃຫ້ວຽກງານ ຖວທ ໃນຊຸມປີຕໍ່ຫນ້າຖືກຈັດຕັ້ງປະຕິບັດຢ່າງມີປະສິດທິພາບ ເເລະ ປະສິດທິຜົນກວ່າເກົ່າ.
ໂອກາດດຽວກັນ ໃນວາລະກອງປະຊຸມ ຍັງໄດ້ມີພິທີມອບຫລຽນໄຊຊັ້ນ II, ຊັ້ນ III, ຫລຽນກາແຮງງານ, ໃບຍ້ອງຍໍລັດຖະບານ ແລະ ໃບຍ້ອງຍໍຂອງແຂວງໃຫ້ບຸກຄົນ ທີ່ມີຜົນງານດີເດັ່ນ ໃນຄະນະນຳ, ພະນັກງານຫຼັກແຫຼງ, ພະນັກງານວິຊາການຂົງເຂດ ຖວທ ທີ່ໄດ້ປະກອບສ່ວນວຽກງານທາງດ້ານເຮື່ອແຮງ ແລະ ສະຕິປັນຍາເຂຢ້າໃນວຽກງານລວມ ກໍຄື ຂະບວນການແຂ່ງຂັນຮັກຊາດ-ພັດທະນາ ໄລຍະ 5 ປີ (2016-2020) ເຊິ່ງໃນນີ້ ຫຼຽນໄຊແຮງງານຊັ້ນ II ຈຳສວນ 1 ທ່ານ; ຫຼຽນໄຊແຮງງານຊັ້ນ III ຈຳນວນ 10 ທ່ານ; ຫລຽນກາແຮງງານ ຈຳນວນ 12 ທ່ານ, ໃບຍ້ອງຍໍລັດຖະບານຈຳນວນ 17 ທ່ານ, ໃບຍ້ອງຍໍຂອງແຂວງ 16 ທ່ານ ແລະ ມອບໃບຍ້ອງຍໍກົມກອງ ຂັ້ນອຳນວຍການໃຫຍ່ວິທະຍຸກະຈາຍສຽງແຫ່ງຊາດ ມອບໃຫ້ ຫ້ອງການ ຖວທ ເມືອງ ພູວົງ, ຫ້ອງການ ຖວທ ເມືອງ ສະໜາມໄຊ ແລະ ຫ້ອງການ ຖວທ ເມືອງໄຊເສດຖາ ທີ່ມີຜົນງານປະກອບສ່ວນສະໜອງຂໍ້ມູນຂ່າວສານໃນໄລຍະ 1 ປີຜ່ານມາ.
ຕອນທ້າຍກອງປະຊຸມ ທ່ານ ບຸນເສີດ ເສດທິລາດ ຮອງເຈົ້າແຂວງ ຜູ້ຊີ້ນຳຂົງເຂດວັດທະນະທຳ-ສັງຄົມແຂວງ ໄດ້ສະເເດງຄວາມຊົມເຊີຍ ເເລະ ຕີລາຄາສູງຕໍ່ຜົນສໍາເລັດທີ່ຂະເເຫນງ ຖະເເຫລງຂ່າວ ວັດທະນະທໍາເເລະທ່ອງທ່ຽວຍາດ ມາໄດ້ໃນໄລຍະ1 ປີຜ່ານມາ ເປັນການປະກອບສ່ວນສຳຄັນເຂົ້າ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໄດ້ເປັນເຈົ້າການປະຕິບັດບົດບາດໜ້າທີ່ ເປັນກະບອກສຽງທີ່ແຫຼມຄົມ ໃນການເຜີຍແຜ່ແນວທາງນະໂຍບາຍຂອງພັກ–ລັດ, ເຮັດໜ້າທີ່ໂຄສະນາສຶກສາອົບຮົມນໍ້າໃຈຮັກຊາດ, ຮັກລະບອບໃໝ່, ປະຊາທິປະໄຕ ແລະ ສ້າງສະຕິເຄົາລົບກົດໝາຍ, ສົ່ງເສີມໃຫ້ປະຊາຊົນຮູ້ອະນຸລັກຮັກສາ, ເສີມຂະ ຫຍາຍວັດທະນະທຳອັນດີງາມຂອງຊາດ, ຂອງເຜົ່າ ແລະ ສົ່ງເສີມການທ່ອງທ່ຽວ ທາງທໍາມະຊາດ, ວັດທະນະທໍາ ແລະ ປະຫວັດສາດ ເປັນທ່າແຮງດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ຖືເອົາວຽກງານການທ່ອງທ່ຽວ ເປັນເສດຖະກິດປາຍແຫຼມ ເພື່ອປະກອບສ່ວນເຂົ້າໃນການກະຕຸກຊຸກຍູ້ໃນການພັດທະນາເສດຖະກິດ–ສັງຄົມ, ໃນຕໍ່ໜ້າ ແລະ ຍາວນານນີ້ ຄະນະພັກ-ຄະນະນໍາ, ສະມາຊິກພັກ, ພະນັກງານ-ລັດຖະກອນທົ່ວຂະເເຫງຖະເເຫລງຂ່າວ ວັດທະນະທໍາ ເເລະ ທ່ອງທ່ຽວ ເອົາໃຈໃສ່ຈັດຕັ້ງປະຕິບັດໃນຫຼາຍຫນ້າວຽກໃຫ້ຫຼາຍຂຶ້ນກວ່າເກົ່າ ໂດຍສະເພາະຖືສຳຄັນ ແລະ ເອົາໃຈໃສ່ການກໍ່ສ້າງພັກທາງດ້ານການເມືອງ, ໂດຍນຳໃຊ້ຫຼາຍຮູບການ, ວິທີການທີ່ອຸດົມສົມບູນ ສອດຄ່ອງເໝາະສົມ ເພື່ອໂຄສະນາເຜີຍແຜ່, ສຶກສາອົບຮົມພະນັກງານ, ສະມາຊິກພັກໃຫ້ຮັບຮູ້, ເຂົ້າໃຈ, ກຳແໜ້ນເຊື່ອມຊຶມແນວທາງ, ແຜນນະໂຍບາຍ, ມະຕິຄຳສັ່ງຂອງພັກ, ລະບຽບກົດໝາຍຂອງລັດໃນແຕ່ລະໄລຍະ, ຊຸກຍູ້ສົ່ງເສີມວຽກງານການທ່ອງທ່ຽວ ຍູ້ແຮງເຮັດໃຫ້ເສດຖະກິດພາຍໃນແຂວງ, ເອົາໃຈໃສ່ປັບປຸງ ແລະ ພັດທະນາ ການທ່ອງທ່ຽວຂອງແຂວງຢ່າງຕໍ່ເນື່ອງ, ມີຈຸດສຸມ ເພື່ອສົ່ງເສີມການທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດ ຕິດພັນກັບການທ່ອງທ່ຽວກະສິກຳຕາມທິດສີຂຽວ, ຍືນຍົງ ແລະ ມີສ່ວນຮ່ວມຂອງປະຊາຊົນ, ເອົາໃຈໃສ່ປັບປຸງດ້ານກົງຈັກການຈັດຕັ້ງ ແລະ ການກໍ່ສ້າງບຸກຄາລະກອນຈະແຈ້ງ, ຮັດກຸມ ແລະ ສອດຄ່ອງກັບໜ້າວຽກຕົວຈິງ, ຍົກລະດັບຄວາມຮູ້ ຄວາມສາມາດຂອງພະນັກງານ-ລັດຖະກອນ ທາງດ້ານທິດສະດີ ແລະ ວິຊາສະເພາະ ເພື່ອຮັບໃຊ້ໜ້າທີ່ການເມືອງ ໄປຕາມທິດພະນັກງານສືບທອດປ່ຽນແທນພ້ອມທັງ ເອົາໃຈໃສ່ ປັບປຸງຍົກລະດັບວຽກງານສື່ມວນຊົນ ໃຫ້ທັນສະໄໝ, ຂະຫຍາຍຕາໜ່າງໂທລະໂຄ່ງໄປສູ່ຊຸມຊົນທ້ອງຖິ່ນ ເຂດຫ່າງໄກສອກຫຼີກໃຫ້ໄດ້ເຂົ້າເຖິງຂໍ້ມູນຂ່າວສານ, ນໍາໃຊ້ສື່ແບບໃໝ່ໃຫ້ຫຼາຍຂຶ້ນ ເພື່ອໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ກົດໝາຍຂອງລັດ, ຕອບຕ້ານການໂຄສະນາສິ່ງທີ່ບິດເບືອນຂໍ້ມູນຕົວຈິງ ຕໍ່ແນວທາງນະໂຍບາຍຂອງພັກ-ລັດ ໄດ້ຢ່າງທັນການ ເເລະ ອື່ນໆໃຫ້ໄດ້ດີຂຶ້ນເທື່ອລະກ້າວ.
#ຂ່າວ: ໄພບູນ
#ມີເດຍລາວ#ອັດຕະປື
