ໃນວັນທີ 15 ກຸມພານີ້ ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງບໍ່ແກ້ວ, ກະຊວງ ຖວທ ໄດ້ມອບອຸປະກອນຊຸດໂທລະໂຄ່ງຂອງໂຄງການປັບປຸງຂະຫຍາຍຕາໜ່າງໂທລະໂຄງທົ່ວປະເທດ (ໄລຍະ2) ໃຫ້ແຂວງບໍ່ແກ້ວ ໂດຍການເປັນປະທານ ຂອງທ່ານ ໂພສີ ແກ້ວມະນີວົງ ຄະນະປະຈຳພັກກະຊວງ, ຮອງລັດຖະມົນຕີກະຊວງ ຖວທ ຫົວໜ້າຄະນະຮັບຜິດຊອບໂຄງການ, ເປັນກຽດເຂົ້າຮ່ວມມີທ່ານ ຄຳຜະຫຍາ ພົມປັນຍາ ຮອງເຈົ້າແຂວງໆ ບໍ່ແກ້ວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ຊຸດອຸປະກອນໂທລະໂຄ່ງທີ່ນຳມາມອບໃນຄັ້ງນີ້ປະກອບມີ 50 ຊຸດ, ໃນນັ້ນມອບໃຫ້ເມືອງຫ້ວຍຊາຍ 11 ຊຸດ, ເມືອງຕົ້ນເຜິ້ງ 9 ຊຸດ, ເມືອງປາກທາ 10 ຊຸດ, ເມືອງຜາອຸດົມ 12 ຊຸດ ແລະ ເມືອງເມິງ. ໃຫ້ກຽດມອບໂດຍທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ, ທັງເປັນຮອງຫົວໜ້າຄະນະຮັບຜິດຊອບໂຄງການ, ໃຫ້ກຽດຮັບໂດຍທ່ານ ສົມຄິດ ວົງປັນຍາ ຫົວໜ້າພະແນກ ຖວທ ແຂວງ ໂດຍຊ້ອງໜ້າຄະນະປະທານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ. ຈາກນັ້ນຈະສືບຕໍ່ມອບໃຫ້ບັນດາເມືອງຕື່ມອີກ.
ໂອກາດນີ້ໄດ້ຝືກອົບຮົມຄວາມຮູ້ ກ່ຽວກັບການນຳໃຊ້ອຸປະກອນໃຫ້ແກ່ພະນັກງານວິຊາການ ເຕັກນິກຂອງແຂວງ ແລະ ບັນດາເມືອງ. ຊຸດຝືກອົບຮົມໃນຄັ້ງນີ້ສຳມະນາກອນຈະໄດ້ຮຽນຮູ້ທາງພາກທິດສະດີ ແລະ ພາກປະຕິບັດຕົວຈິງ. ໂດຍສະເພາະຄວາມສຳຄັນ ແລະ ອົງປະກອບຂອງເຄື່ອງຂະຫຍາຍສຽງ, ສ່ວນປະກອບຂອງປາກໂທລະໂຄ່ງ, ວິທີປະກອບປາກໂທລະໂຄ່ງ, ວິທີການກວດກາ ແລະ ການຕິດຕັ້ງໂທລະໂຄ່ງ, ການຕິດຕັ້ງໂທລະໂຄ່ງໃສ່ກັບເຄື່ອງຂະຫຍາຍສຽງ ແລະ ວິທີການຕິດຕັ້ງຈານດາວທຽມອື່ນໆ.
ຂ່າວ: ຄໍາພັນ ແກ້ວມະນີ, ພາບ: ສອນໄຊ
