ກະຊວງພະລັງງານ ແລະ ບໍ່ແຮ່ (ພບ) ໄດ້ຈັດກອງປະຊຸມສະຫຼຸບແຜນພັດທະນາ ພບ ປະຈໍາປີ 2022, ກາງສະໄໝ ແລະ ຄາດຄະເນທ້າຍສະໄໝຂອງແຜນພັດທະນາຂະແໜງ ພບ 5 ປີ ຄັ້ງທີ IX (2021-2025) ແລະ ປະເມີນການຈັດຕັ້ງປະຕິບັດ 2 ວາລະແຫ່ງຊາດ ໃນຂະແໜງ ພບ ຂຶ້ນໃນລະຫວ່າງວັນທີ 2-3 ກຸມພານີ້, ໂດຍການເປັນປະທານຂອງ ທ່ານ ດາວວົງ ພອນແກ້ວ ລັດຖະມົນຕີກະຊວງ ພບ ໂດຍມີບັນດາທ່ານຈາກທຸກພາກສ່ວນກ່ຽວຂ້ອງເຂົ້າຮ່ວມ.
ທ່ານ ດາວວົງ ພອນແກ້ວ ໄດ້ກ່າວວ່າ: ກອງປະຊຸມຄັ້ງນີ້ຈະໄດ້ພ້ອມກັນເຮັດບາງວຽກງານທີ່ສໍາຄັນຄື:ສະຫຼຸບຕີລາຄາສະພາບການເຄື່ອນໄຫວວຽກງານ ພບ ໃນຂອບເຂດທົ່ວປະເທດໃນປີ 2022 ຜ່ານມາຄົ້ນຄວ້າ, ປຶກສາຫາລື ເພື່ອກໍານົດທິດທາງ, ໜ້າທີ່ ແລະ ລະດັບຄາດໝາຍກ່ຽວກັບການພັດທະນາວຽກງານ ພບ ສໍາລັບປີ 2023 ຮັບຟັງການສະຫຼຸບລາຍງານກ່ຽວກັບສະພາບການຈັດຕັ້ງປະຕິບັດ 2 ວາລະແຫ່ງຊາດ ຂອງຂະແໜງ ພບ ໃນປີ 2022 ຟັງການສະຫຼຸບກາງສະໄໝກ່ຽວກັບສະພາບການປະຕິບັດແຜນຍຸດທະສາດການພັດທະນາວຽກງານພະລັງງານ ແລະ ບໍ່ແຮ່ ໄລຍະ 5 ປີ (2021-2025),ຮັບຟັງການປະກອບຄໍາເຫັນຂອງຜູ້ຕາງໜ້າບັນດາກະຊວງ, ການປະກອບຄໍາເຫັນຂອງທ່ານຮອງເຈົ້າຄອງນະຄອນຫຼວງ, ທ່ານຮອງເຈົ້າແຂວງກ່ຽວກັບການປະສານສົມທົບ, ການຊີ້ນໍາ-ນໍາພາການພັດທະນາວຽກງານ ພບ ໃນໄລຍະຜ່ານມາ,ຮັບຟັງການລາຍງານສະພາບ ແລະ ບົດຮຽນການຄຸ້ມຄອງດ້ານວິຊາສະເພາະ, ການຄຸ້ມຄອງການດໍາເນີນທຸລະກິດ ແລະ ການຄຸ້ມຄອງບັນດາໂຄງການ, ແຜນງານໃນໄລຍະຜ່ານມາ ຂອງບັນດາກົມ, ສະຖາບັນ, ລັດວິສາຫະກິດອ້ອມຂ້າງກະຊວງ ແລະ ພະແນກພະລັງງານ ແລະ ບໍ່ແຮ່ແຂວງ. ພ້ອມນີ້, ກໍຈັດຕັ້ງການຍ້ອງຍໍສັນລະເສີນຜົນງານ 5 ປີ (2016-2020) ຂອງກະຊວງ ພບ,
ທ່ານລັດຖະມົນຕີກະຊວງ ພບ ຍັງກ່າວອີກວ່າ: ເນື້ອໃນ ແລະ ວຽກງານທີ່ນໍາມາຄົ້ນຄວ້າ, ປຶກສາຫາລື ແລະ ຕົກລົງຢູ່ໃນກອງປະຊຸມຄັ້ງນີ້ ມີຄວາມສໍາຄັນຫຼາຍ ແລະ ຫາກທຽບໃສ່ເວລາຂອງການດໍາເນີນກອງປະຊຸມແລ້ວເຫັນວ່າ ມີເວລາສັ້ນ ແລະ ຈໍາກັດຫຼາຍ. ສະນັ້ນ, ຈຶ່ງຂໍຮຽກຮ້ອງມາຍັງຜູ້ເຂົ້າຮ່ວມກອງປະຊຸມ ຈົ່ງໄດ້ເຊີດຊູຄວາມຮັບຜິດຊອບ, ເອົາໃຈໃສ່ຄົ້ນຄວ້າ, ປຶກສາຫາລື, ປະກອບຄໍາເຫັນເພື່ອເຮັດໃຫ້ເນື້ອໃນ ແລະ ວຽກງານຕ່າງໆຂອງກອງປະຊຸມໃຫ້ມີຄວາມໜັກແໜ້ນມີການຫັນປ່ຽນທີ່ຕັ້ງໜ້າ, ຮັບປະກັນໃຫ້ກອງປະຊຸມບັນລຸຜົນສໍາເລັດຢ່າງຈົບງາມ.
(ຂ່າວ-ພາບ:ສຸກສະຫວັນ)
