ທ່ານ ນາງ ແອນນາ ເອເທີວຽນ ວານເດສ ເອກອັກຄະລັດຖະທູດແຫ່ງ ສ ກູບາ ປະຈຳ ສປປ ລາວ ໄດ້ກ່າວໃນໂອກາດສະເຫລີມສະຫລອງວັນໄຊຊະນະການປະຕິວັດ ກູບາ ຄົບຮອບ 64 ປີວ່າ: ບັນດາສະຫາຍທີ່ນັບຖື, ເນື່ອງໃນໂອກາດປີໃໝ່ 2023 ຂ້າພະເຈົ້າຖືໂອກາດນີ້ ຂໍສົ່ງຄຳຊົມເຊີຍອັນອົບອຸ່ນມາຍັງບັນດາສະຫາຍ ແລະ ໃນຂະນະດຽວກັນ ກູບາ ກໍ່ກຳລັງສະເຫລີມສະຫລອງ 64 ປີແຫ່ງໄຊຊະນະຂອງການປະຕິວັດກູບາ.
ທ່ານ ນາງ ແອນນາ ເອເທີວຽນ ວານເດສ ເອກອັກຄະລັດຖະທູດແຫ່ງ ສ ກູບາ ປະຈຳ ສປປ ລາວ ໄດ້ກ່າວໃນໂອກາດສະເຫລີມສະຫລອງວັນໄຊຊະນະການປະຕິວັດ ກູບາ ຄົບຮອບ 64 ປີ ວ່າ: ບັນດາສະຫາຍທີ່ນັບຖື, ເນື່ອງໃນໂອກາດປີໃໝ່ 2023 ຂ້າພະເຈົ້າຖືໂອກາດນີ້ ຂໍສົ່ງຄຳຊົມເຊີຍອັນອົບອຸ່ນມາຍັງບັນດາສະຫາຍ ແລະ ໃນຂະນະດຽວກັນ ກູບາ ກໍ່ກຳລັງສະເຫລີມສະຫລອງ 64 ປີແຫ່ງໄຊຊະນະຂອງການປະຕິວັດກູບາ.
ໃນປີ 2022 ທີ່ຜ່ານມາ, ກູບາ ໄດ້ປະເຊີນໜ້າກັບຫລາຍບັນຫາທ້າທາຍ ແລະ ຫຍຸ້ງຍາກຢູ່ພາຍໃນປະເທດ ແລະ ສະພາບການສາກົນທີ່ສັບສົນ ເຮັດໃຫ້ ກູບາ ບໍ່ສາມາດບັນລຸແຜນພັດທະນາແຫ່ງຊາດ ຕາມຄາດໝາຍ. ກູບາ ໄດ້ປະເຊີນກັບເຫດການທີ່ຮ້າຍແຮງເຊັ່ນ: ອຸບັດເຫດແກ໊ສລະເບີດຢູ່ໂຮງແຮມຊາຣາໂຕກາ (Saratoga) ຢູ່ນະຄອນຫລວງລາຮາວານ, ໄຟໄໜ້ສາງເກັບນ້ຳມັນເຊື້ອໄຟຢູ່ແຂວງມາຕາງສັດ ແລະ ພາຍຸເຮີລິເຄນອຽງ ທີ່ພັດຜ່ານທາງພາກກາງ ແລະ ພາກເໜືອຂອງກູບາ ທີ່ຮ້າຍແຮງ, ບວກໃສ່ບັນດາມາດຕະການປິດລ້ອມທາງດ້ານເສດຖະກິດ ແລະ ການລະບາດພະຍາດຂອງໂຄວິດ-19 ເຮັດໃຫ້ກູບາໄດ້ຮັບຜົນກະທົບຢ່າງໜັກ, ແຕ່ເຖິງ ຢ່າງໃດກໍຕາມ ບັນຫາດັ່ງກ່າວນັ້ນກໍ່ບໍ່ໄດ້ເຮັດໃຫ້ພວກເຮົາທໍ້ຖອຍໃຈ. ພວກເຮົາ ໄດ້ຊຸກຍູ້ການພັດທະນາບັນດາໂຄງການ ເພື່ອແນໃສ່ຊອກຫາຊ່ອງທາງແກ້ໄຂບັນຫາເສດຖະກິດ ແລະ ສັງຄົມທີ່ຕ້ອງໄດ້ແກ້ໄຂຢ່າງໄວ, ໂດຍສະເພາະໂຄງການຊຸກຍູ້ການຜະລິດສະບຽງອາຫານ ແລະ ໂພຊະນາການ, ຍຸດທະສາດ ເພື່ອໃຫ້ບັນລຸຄວາມໝັ້ນຄົງໄຟຟ້າແຫ່ງຊາດ, ການຕໍ່ຕ້ານແຜນການໂຄ່ນລົ້ມທາງດ້ານການເມືອງ-ອຸດົມຄະຕິຈາກຕ່າງປະເທດ, ການພັດທະນາຍຸດທະສາດ ເພື່ອຄວບຄຸມ ແລະ ດ້ານແພ່ລະບາດຂອງພະຍາດໂຄວິດ-19 ດ້ວຍວັກຊິນ 3 ຊະນິດທີ່ນັກວິທະຍາສາດກູບາ ເປັນຜູ້ຄິດຄົ້ນໄດ້, ການຈັດຕັ້ງປະຕິບັດລະບົບຄຸ້ມຄອງລັດຖະບານ ທີ່ອີງໃສ່ວິ ທະຍາສາດ ແລະ ນະວັດຕະກຳ ແລະ ບັນດາໂຄງການສັງຄົມຕ່າງໆ. ຫລຸດຜ່ອນຄວາມບໍ່ເທົ່າທຽມກັນທາງສັງຄົມ, ສົ່ງເສີມຄວາມກ້າວໜ້າຂອງແມ່ຍິງ ແລະ ຕ້ານການຈຳແນກເຊື້ອຊາດ. ຄຽງຄູ່ກັນນັ້ນ, ການເພີ່ມທະວີ ການປົກຄອງຕົນເອງ ແລະ ການພັດທະນາຂອງລັດວິສາຫະກິດສັງຄົມນິຍົມ, ການຂະຫຍາຍ ແລະ ການຂຶ້ນທະບຽນຂອງບໍລິສັດຈຸລະພາກຂະໜາດນ້ອຍ ແລະ ຂະໜາດກາງ ທີ່ເກີດຂຶ້ນໃໝ່ຫລາຍພັນບໍລິສັດ ທັງພາກ ລັດ ແລະ ເອກະຊົນ, ສ່ວນໃຫຍ່ແລ້ວແມ່ນເອກະຊົນ.
ແຜນການເສດຖະກິດປີ 2023 ໄດ້ກຳນົດເປົ້າໝາຍທີ່ມີຄວາມສຳຄັນທີ່ສຸດ ເພື່ອປະເຊີນໜ້າກັບທຸກບັນຫາທີ່ໄດ້ຮັບການວິເຄາະແລ້ວ ໃນເສດຖະກິດແຫ່ງຊາດ, ພ້ອມທັງສືບຕໍ່ຊຸກຍູ້ການສ້າງຄວາມສາມາດ ແລະ ສະພາບແວດລ້ອມດ້ານສະຖາບັນໃຫ້ມີຄວາມຄືບໜ້າຕື່ມອີກຢ່າງມີປະສິດທິຜົນ, ໄວ ແລະ ກ້າວໜ້າຕາມຮູບແບບການພັດທະນາເສດຖະກິດ ແລະ ສັງຄົມ. ເຖິງວ່າມີຄວາມພະຍາຍາມດັ່ງກ່າວກໍ່ຕາມ, ແຕ່ນະໂຍບາຍການໂຄ່ນລົ້ມ ແລະ ຄວາມພະຍາຍາມ ເພື່ອສ້າງຄວາມບໍ່ໝັ້ນຄົງ, ພ້ອມທັງການຊີ້ນຳ, ການສະໜັບສະໜູນການເງິນ ແລະ ຝຶກອົບຮົມບຸກຄົນໃຫ້ສ້າງຄວາມບໍ່ສະຫງົບຢູ່ພາຍໃນກູບາ. ກູບາແມ່ນຕ້ອງມີຄວາມ ກຽມພ້ອມຕະຫລອດເວລາໃນຂະນະທີ່ນະໂຍບາຍປິດລ້ອມທີ່ເຂັ້ມງວດ, ການຂົ່ມເຫັງທາງດ້ານການເງິນ ທີ່ເປັນອຸປະສັກຕໍ່ການທະນາຄານ ແລະ ການຄ້າ ທີ່ພະຍາຍາມເຮັດໃຫ້ເສດຖະກິດພົບຄວາມຫຍຸ້ງຍາກ, ເປັນອຸ ປະສັກຕໍ່ການຮ່ວມມືກັບຕ່າງປະເທດ ແລະ ທຳລາຍການປະຕິວັດ ຊຶ່ງເປົ້າໝາຍດັ່ງກ່າວ ຂອງພວກອິດທິກຳລັງປໍລະປັກຈະບໍ່ມີມື້ໄດ້ຮັບຜົນສຳເລັດ. ໃນປີຜ່ານມາປະຊາຊົນກູບາ ໄດ້ລົງຄະແນນສຽງ ແລະ ຮັບຮອງເອົາກົດໝາຍຄອບຄົວສະບັບປັບປຸງໃໝ່ ຊຶ່ງສະແດງໃຫ້ເຫັນເຖິງຈິດສຳນຶກຂອງສັງຄົມຢ່າງສູງ ແລະ ຊັດເຈນ ພ້ອມທັງສະແດງອອກດ້ວຍຄວາມໂປ່ງໃສ ແລະ ເປັນທຳຢ່າງແທ້ຈິງໃນການເລືອກຕັ້ງຜູ້ແທນສະມາຊິກ ສະພາອຳນາດປະຊາຊົນ. ໃນປີ 2022 ທີ່ຜ່ານມາມີເຫດການສຳຄັນໃນການປະຕິບັດນະໂຍບາຍການຕ່າງປະເທດຂອງກູບາ, ໄດ້ຮຽກຮ້ອງ ເຖິງຄວາມອົດທົນ, ແນວຄິດ ແລະ ການປະຕິບັດຢ່າງ ເຂັ້ມງວດຕິດແທດ ກັບຫລັກການ ແລະ ຮີດຄອງປະເພນີ. ຄວາມພະຍາຍາມໃນການຟື້ນຟູການເຈລະຈາ ໃຫ້ມີສັນຕິພາບຢູ່ໂກລົມເບຍ ຊຶ່ງເປັນການສະແດງໃຫ້ເຫັນຈຸດຢືນ ແລະ ທ່ຽງທຳຂອງ ກູບາ ໃນການປົກປ້ອງກົດໝາຍສາກົນ ແລະ ຄຳໝັ້ນສັນຍາທີ່ຈະຊ່ວຍເຫລືອບັນດາປະເທດຂົງເຂດອາເມລິກາລາຕິນ. ພວກເຮົາມີຄວາມຍິນດີທີ່ຈະສືບຕໍໍ່ເປັນປະເທດເປັນກາງໃນການສືບຕໍ່ເຈລະຈາສັນຕິພາບລະຫວ່າງລັດຖະບານໂຄລົມເບຍ ແລະ ກຳລັງປະຕິວັດຂອງໂຄລົມເບຍ (ELN). ພວກເຮົາພວມກ້າວໄປໜ້າໃນການພົວພັນກັບພາກພື້ນ, ເຊື່ອໝັ້ນວ່າຄວາມສຳຄັນຂອງການເຊື່ອມໂຍງ ແລະ ການປ້ອງກັນສັນຕິພາບຂອງພາກພື້ນ, ເປັນເອກະພາບ ແລະ ສະໜັບສະໜູນ ເຊິ່ງກັນ ແລະ ກັນ.
ການພົວພັນກັບບັນດາປະເທດປະຊາຄົມ ແລະ ຕະຫລາດຮ່ວມຄາຣິບຽນ (CARICOM) ແມ່ນໄດ້ຮັບການຮັດແໜ້ນພາຍຫລັງ 50 ປີ ຊຶ່ງ 4 ປະເທດຂົງເຂດກາຣິບຽນເຊັ່ນ: Barbados, Guyana,Jamaica ແລະ Trinidad ແລະ Tobago ໄດ້ສ້າງສາຍພົວພັນການທູດກັບ ກູບາ ຢ່າງເປັນທາງການ. ຄຽງຄູ່ກັນນັ້ນ ກູບາ ໄດ້ມີຄວາມປິຕິຍິນດີທີ່ບຣາຊິນ ກັບ ຄືນເຂົ້າມາເປັນສະມາຊິກຂອງກຸ່ມປະເທດກາຣິບຽນ ແລະ ອາເມລິກາລາຕິນ (CELAC) ຄືນໃໝ່ ແລະ ຖືວ່າ ອາເມລິກາລາຕິນ ແລະ ກາຣິບຽນສາມາດສືບຕໍ່ຮັດແໜ້ນຄວາມເປັນເອກະພາບໃນຄວາມຫລາກຫລາຍຂອງຕົນ ແມ່ນເງື່ອນໄຂທີ່ສຳຄັນຂອງການເຊື່ອມໂຍງຢ່າງແທ້ຈິງ. ໃນເວທີສາກົນ, ກູບາ ໄດ້ຮັບເລືອກຕັ້ງເປັນປະທານຂອງກຸ່ມ 77+ຈີນ ຊຶ່ງສະແດງໃຫ້ເຫັນເຖິງການເຄື່ອນໄຫວການທູດປະຕິວັດສາກົນຂອງກູບາ. ພວກເຮົາເປັນເອກະພາບກັບອາຊຽນ ມີການພົວພັນທີ່ມີມູນເຊື້ອຮ່ວມກັບບັນດາສະມາຊິກ. ການຢ້ຽມຢາມອານເຊຣິ, ຕວກກີ, ຣັດເຊຍ ແລະ ຈີນຂອງປະທານປະເທດກູບາ ໃນທ້າຍປີຜ່ານມາໂດຍຕອບສະໜອງຕາມເຊື້ອເຊີນຂອງບັນດາປະເທດດັ່ງກ່າວ ເປັນການຊຸກຍູ້ ແລະ ຮັດແໜ້ນສາຍພົວພັນທາງດ້ານການເມືອງ ແລະ ເສດຖະກິດຮ່ວມກັບປະເທດດັ່ງກ່າວ. ນອກຈາກນັ້ນ, ກູບາ ຂໍສະແດງຄວາມຂອບໃຈຕໍ່ການຕ້ອນຮັບ ແລະ ຄວາມເຄົາລົບນັບຖືຈາກ ລັດຖະບານແຫ່ງ ສປປ ລາວ ຕໍ່ທ່ານນາຍົກລັດຖະມົນຕີແຫ່ງ ສ ກູບາ ທີ່ເດີນທາງມາຢ້ຽມຢາມ ສປປ ລາວ ແລະ ພາກພື້ນອາຊີຕາເວັນອອກສ່ຽງໃຕ້ເປັນຄັ້ງທຳອິດ ຊຶ່ງລວມມີ: ສສ ຫວຽດນາມ ແລະ ກຳປູເຈຍ. ອັນເປັນການສະແດງເຖິງສາຍພົວພັນມິດຕະພາບ ແລະ ການຮ່ວມມືອັນແໜ້ນແຟ້ນຂອງສອງພັກ-ລັດ ແລະ ປະຊາຊົນຂອງສອງປະເທດພວກເຮົາ.
ກູບາ ກ່າວປະນາມນະໂຍບາຍທີ່ໂຫດຮ້າຍ ແລະ ໄຮ້ມະນຸດສະທຳຂອງການປິດລ້ອມທາງດ້ານເສດຖະກິດ, ການຄ້າ ແລະ ການເງິນທີ່ມີຕໍ່ກູບາ ຊຶ່ງໃນການກ່າວປະນາມດັ່ງກ່າວ ໄດ້ຮັບການສະໜັບສະໜູນຢ່າງຫລວງຫລາຍຈາກປະຊາຄົມໂລກ, ລວມທັງບັນດາລັດຖະບານປະເທດຕ່າງໆທີ່ເປັນ ເພື່ອນມິດກັບ ກູບາ ຊຶ່ງຂໍຖືໂອກາດນີ້ ສະແດງຄວາມຮູ້ບຸນຄຸນຢ່າງເລິກເຊິ່ງ ແລະ ເຊື່ອໝັ້ນວ່າໂລກຂອງພວກເຮົາຈະດີຂຶ້ນໂດຍປາສະຈາກການປິດລ້ອມ ເຊິ່ງກັນ ແລະ ກັນ. ເຖິງຢ່າງໃດກໍ່ຕາມ ກູບາ ມີຄວາມມຸ່ງມາດປາຖະໜາສືບຕໍ່ສ້າງສາສາຍພົວພັນມິດຕະພາບ, ເຄົາລົບນັບຖືເຊິ່ງກັນ ແລະ ກັນ, ເຄົາລົບກົດໝາຍສາກົນ ແລະ ສິດອຳນາດອະທິປະໄຕຂອງທຸກປະເທດຢູ່ໃນໂລກ. ການພົວພັນກັບ ສປປ ລາວ, ໂດຍສະເພາະໃນປີ 2022 ຜ່ານມາ ສອງຝ່າຍໄດ້ມີການພົບປະແບບທາງໄກຮ່ວມກັນລະຫວ່າງການນຳຂັ້ນສູງທັງສາຍພັກ-ລັດ, ອົງການຕຸລາການ ແລະ ນິຕິບັນຍັດ. ນອກຈາກນັ້ນ, ການພົວພັນຂອງປະຊາຊົນໄດ້ເຂົ້າສູ່ລວງເລິກກໍໍ່ຄືການແລກປ່ຽນຄະນະຜູ້ແທນຮ່ວມກັນ, ກູບາ ຊຸກຍູ້ການຮ່ວມມືທາງດ້ານເສດຖະກິດຮ່ວມກັບ ສປປ ລາວ ພາຍຫລັງທີ່ໄດ້ມີການລົງນາມສັນຍາຮ່ວມໃນໂອກາດທີ່ ທ່ານ ນາຍົກລັດຖະມົນຕີແຫ່ງ ສ ກູບາ ຢ້ຽມຢາມ ສປປ ລາວໃນເດືອນຕຸລາປີ 2022 ຜ່ານມາ.
ກູບາ ຈະເອົາໃຈໃສ່ໃນການຮັກສາສາຍພົວພັນທີ່ມີມູນເຊື້ອຖານອ້າຍນ້ອງທີ່ເກີດຢູ່ຖ້ຳເມືອງວຽງໄຊ ຊຶ່ງເປັນສະຖານທີ່ທຳອິດທີ່ຄະນະແພດຂອງກູບາປະຈຳຢູ່ລາວ. ຄຽງຄູ່ກັນນັ້ນ, ພວກເຮົາຈະໄດ້ສືບຕໍ່ຊຸກຍູ້ບັນຫາທີ່ຍັງຄົງຄ້າງລະຫວ່າງສອງປະເທດຂອງພວກເຮົາ ເພື່ອເປັນການເສີມຂະຫຍາຍ ແລະ ຮັດແໜ້ນການພົວພັນສອງຝ່າຍ, ແນໃສ່ການກະກຽມສະເຫລີມສະຫລອງ 50 ປີແຫ່ງການສ້າງຕັ້ງສາຍພົວພັນການທູດລະຫວ່າງ ສ ກູບາ ແລະ ສປປ ລາວ ໃນປີໜ້າ.
ຂໍສະແດງຄວາມຂອບໃຈມາຍັງພັກ, ລັດຖະບານ ແລະ ປະຊາຊົນລາວທີ່ໄດ້ໃຫ້ການສະໜັບສະໜູນ ແລະ ຄວາມສາມັກຄີອັນເປັນມູນເຊື້ອໄດ້ຮັບການເສີມຂະຫຍາຍ ແລະ ເພີ່ມທະວີຄວາມສາມັກຄີແບບພິເສດໃນຫລາຍປີມານີ້. ຂ້າພະເຈົ້າຂໍຢ້ຳຄືນຄຳເວົ້າຂອງທ່ານ ມານູເອັນ ມາເຣໂຣ ກຣູຊ (Miguel Diaz Canel Bermudez) ປະທານປະເທດແຫ່ງ ສ ກູບາ ທີ່ໄດ້່າວວ່າ “ການປົກປ້ອງກູບາ ແມ່ນການປົກປ້ອງໂຄງການຂອງກຽດສັກສີຂອງມວນມະນຸດ”. ກູບາ ຂໍສະແດງຄວາມຂອບໃຈ ແລະ ພູມໃຈທີ່ມີ ສປປ ລາວໄດ້ຄຽງຂ້າງສະເໝີ.
ຂ້າພະເຈົ້າຂໍຖືໂອກາດນີ້ ອວຍພອນໃຫ້ບັນດາສະຫາຍ ຈົ່ງມີສຸຂະພາບເຂັ້ມແຂງ, ປະສົບຜົນສຳເລັດໃນໜ້າທີ່ວຽກງານ ແລະ ມີຄວາມຈະເລີນຮຸ່ງເຮືອງ. ນອກຈາກນັ້ນ, ຂ້າພະເຈົ້າຂໍນຳເອົາຄວາມຢື້ຢາມຖາມຂ່າວ ແລະ ພອນໄຊອັນປະເສີດຂອງ ສະຫາຍ ມານູເອັນ ມາເຣໂຣ ກຣູຊ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດກູບາ ເຖິງສະຫາຍ ທອງລຸນ ສິສຸດລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ; ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ແລະ ບັນດາການນຳຂອງລາວ ພ້ອມດ້ວຍປະຊາຊົນລາວອ້າຍນ້ອງທີ່ຮັກແພງ ນະໂອກາດນີ້ດ້ວຍ. ສາຍພົວພັນມິດຕະພາບ ກູບາ ແລະ ລາວໝັ້ນຍືນ.
