ວັນທີ 27 ມັງກອນ 2023 ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ພ້ອມຄະນະ ໄດ້ເຄື່ອນໄຫວຢ້ຽມ ຢາມ ແລະ ເຮັດວຽກຢູ່ເມືອງສັງທອງ, ນະຄອນຫຼວງວຽງ ຈັນ ໂດຍການນໍາພາຂອງທ່ານ ພູຂົງ ບັນນະວົງ, ຮອງເຈົ້າຄອງນະຄອນຫຼວງວຽງຈັນ. ໃນໂອກາດນີ້ ທ່ານ ພົງສະຫວັນ ສີລິພັນ ເຈົ້າເມືອງສັງທອງ ໄດ້ລາຍງານໃຫ້ຮູ້ວ່າກ່ຽວກັບສະພາບການພັດທະນາເສດຖະກິດ-ສັງຄົມຂອງເມືອງ ເຊີ່ງຜ່ານມາອົງຄະນະພັກເມືອງສັງທອງ ໄດ້ເອົາໃຈໃສ່ສຶກສາອົບຮົມການເມືອງ- ແນວຄິດພະນັກງານ, ສະມາຊິກພັກ,ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າຕິດພັນກັບການແກ້ໄຂວຽກງານຕົວຈິງ, ສ້າງຄວາມເປັນເອກະພາບ ສ້າງຄວາມເສຍສະຫຼະ, ປຸກລະດົມການປະກອບສ່ວນເຂົ້າໃນການຈັດຕັ້ງປະຕິບັດ 2 ວາລະແຫ່ງຊາດ, ການປະຕິບັດຄາດໝາຍທີ່ກໍານົດໄວ້ໃນມະຕິກອງປະຊຸມໃຫຍ່ຄັ້ງທີ X ຂອງພັກ ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກນະຄອນຫຼວງວຽງຈັນ ແລະ ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງສັງທອງ ເຂົ້າສູ່ລວງເລີກ ແລະ ເປັນຮູບປະທໍາປະກົດເປັນຈິງເປັນກ້າວໆ ພ້ອມນັ້ນການປະຕິບັດຄາດໝາຍທີ່ກໍານົດໄວ້ໃນມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງສັງທອງ (4 ທິດທາງ 12 ຄາດໝາຍ ແລະ 8 ໜ້າທີ່ສໍາຄັນ) ໃນບັນດາທິດທາງ ຄາດໝາຍ ແລະ ໜ້າທີ່ສຳຄັນ ໂດຍສຸມໃສ່ 3 ເຂດໃຫຍ່ເປັນຫຼັກ ເຂດພັດທະນາທີ 1 ລຽບຕາມສາຍນໍ້າຕອນຕິດພູພະນັງລວມມີ 16 ບ້ານ ກໍານົດເປັນເຂດຜະລິດກະສິກໍາຕິດພັນກັບການທ່ອງທ່ຽວທາງດ້ານປະຫວັດສາດ ເຂດພັດທະນາທີ 2 ເຂດທາງເລກທີ 11 ລຽບຕາມສາຍແມ່ນໍ້າຂອງມີຄວາມຍາວລວມມີ 13 ບ້ານກໍານົດເປັນເຂດຜະລິດກະສິກໍາ, ອຸດສາຫະກໍາ ແລະ ການບໍລິການ ເຂດພັດທະນາທີ 3 ເຂດລຽບຕາມສາຍນໍ້າສັງລວມມີ 6 ບ້ານ ກໍານົດເປັນເຂດກະສິກໍາ ແລະການທ່ອງທ່ຽວທາງດ້ານທໍາມະຊາດ ຄຽງຄູ່ກັນນັ້ນການຈັດປະຕິບັດແຜນພັດທະນາເສດຖະກິດສັງຄົມເມືອງສັງທອງຕິດພັນກັບການຜັນຂະຫຍາຍວາລະແຫ່ງຊາດ ມາຮອດ ປັດຈຸບັນປະຊາຊົນໄດ້ທໍາການຜະລິດກະສິກໍາເປັນສິນຄ້າເປັນຂະບວນຟົດຟື້ນ ເປັນຕົ້ນ: ການປູກເຂົ້າ, ຢາງພາລາ, ສາລີ, ລ້ຽງສັດແບບເປັນຟາມ ແລະ ປູກຫຍ້າເພື່ອສະໜອງອາຫານໃຫ້ແກ່ສັດ ແລະ ອື່ນໆ.
ນອກຈາກນີ້ ຍັງໄດ້ປູກພືດອຸດສາຫະກໍາ ໝາກໄມ້ກິນໝາກ ແລະ ພັດທະນາການທ່ອງທ່ຽວຕິດພັນກັບການຜະລິດກະສິກໍາ. ສໍາລັບພື້ນຖານໂຄງລ່າງດ້ານຄົມມະນາຄົມ ໄດ້ສືບຕໍ່ພັດທະນາຢ່າງຕໍ່ເນື່ອງພົ້ນເດັ່ນ ແມ່ນການກໍ່ສ້າງ ແລະ ປັບ ປຸງສ້ອມແປງເສັ້ນທາງສາຍຫຼັກ, ທາງຮ່ອມດ້ວຍການລະ ດົມ, ດ້ວຍການປະກອບສ່ວນທຶນຂອງລັດ ແລະ ປະຊາຊົນມີສ່ວນຮ່ວມ ສະເພາະເສັ້ນທາງເພຍລາດ-ເຕົາໃຫ ໄດ້ຮັບການສະຊ່ວຍເຫຼືອລ້າຈາກສະພາການຄ້າຊາວຈີນຕ່າງດ້າວ ປະຈຳ ສປປ ລາວ ສ້ອມແປງເສັ້ນທາງດິນແດງດ້ວຍການຖົມຫີນເບດຄອສ ຍົກລະດັບໃຫ້ສູງຂຶ້ນ ມີການວາງທໍ່ໄດ້ມາດຕະຖານ ມີຄວາມຍາວ 18 ກິໂລແມັດ ປັດຈຸບັນການສ້ອມແປງສໍາເລັດ 100% ປະຊາຊົນໄປມາສະດວກສະບາຍ.
ໃນໂອກາດນີ້ ທ່ານຮອງນາຍົກລັດຖະມົນຕີ ໄດ້ມີຄໍາເຫັນໂອ້ລົມ ໂດຍເນັ້ນໃຫ້ອົງຄະນະພັກເມືອງສັງທອງສືບຕໍ່ເສີມຂະຫຍາຍມູນເຊື້ອ, ພ້ອມທັງຊຸກຍູ້ປະຊາຊົນທໍາການຜະລິດເປັນສິນຄ້າຕາມທ່າແຮງຂອງເມືອງ ໃຫ້ກາຍເປັນຂະ ແໜງການປາຍແຫຼມທີ່ສາມາດສ້າງລາຍຮັບ ໃຫ້ກໍານົດເອົາທ່າແຮງຂອງເມືອງ ສ້າງເປັນແຫຼ່ງທ່ອງທ່ຽວຕິດພັນກັບການຜະລິດກະສິກໍາ ເພື່ອໃຫ້ເມືອງພັດທະນາໄປຕາມທິດສີຂຽວ ແລະ ຍືນຍົງ ສໍາຄັນຕ້ອງພັດທະນາເປັນເມືອງທີ່ມີເອກະລັກ ຄຸ້ມຄອງການປຸກສ້າງຂອງປະຊາຊົນໄປຕາມຜັງເມືອງ ການພັດທະນາພື້ນຖານໂຄງລ່າງຕ້ອງໃຫ້ປະຊາຊົນເປັນເຈົ້າການມີສ່ວນຮ່ວມໃນການປູກ, ການລ້ຽງ. ສ່ວນໂຮງຮຽນໃຫ້ອົງການປົກຄອງນະຄອນຫຼວງວຽງຈັນ ເບິ່ງຄືນ ໂດຍສະເພາະອາຄານຮຽນ ແລະ ສິ່ງອໍານວຍຄວາມສະດວກຕ່າງໆ. ສໍາລັບການແກ້ໄຂປາກົດການຫຍໍ້ທໍ້ຕ້ອງຫັນລົງກໍ່ສ້າງຮາກຖານໃຫ້ມີຄວາມໝັກແໜ້ນເຂັ້ມແຂງ ໃຫ້ເບິ່ງກົກຂອງແຕ່ລະບັນຫາ ເພື່ອພ້ອມກັນແກ້ໄຂຢ່າງແຂງແຮງ ແລະ ເລິກເຊິ່ງ ນອກນີ້ໃຫ້ຖືເອົາຂະແໜງການທ່ອງທ່ຽວເປັນບູລິມະສິດຂອງການພັດທະນາ ດຶງດູດການທ່ອງທ່ຽວໃຫ້ຫຼາຍ ແລະ ຮັບປະກັນໃຫ້ໄດ້ຄວາມປອດໄພ 100%.
ນອກຈາກນີ້, ທ່ານ ຮອງນາຍົກລັດຖະມົນຕີ ພ້ອມຄະນະ ຍັງໄດ້ກວດກາເບິ່ງໂຄງການກໍ່ສ້າງເສັ້ນທາງເພຍລາດ-ເຕົາໃຫ ແລະ ຢ້ຽມຊົມບັນດາກິດຈະກໍາງານບຸນປະເພນີກອງເຂົ້າຫອມສັງທອງ ແລະ ຕະຫຼາດນັດຂາຍສິນຄ້າ ປະຈໍາປີ 2023, ຢ້ຽມຊົມອານາຊາຟາມຣິສອດ (ຟາມລ້ຽງມ້າ) ບ້ານເພຍລາດ ເຊິ່ງມີເນື້ອທີ່ການພັດທະນາທັງໝົດ 10 ເຮັກຕາ ໃນນີ້ພັດທະນາແລ້ວ 6 ເຮັກ ປະກອບມີມ້າຫຼາຍສາຍພັນທີ່ນໍາເຂົ້າຈາກຕ່າງປະເທດມີທັງໝົດ 31 ໂຕ ແລະ ໄປຢ້ຽມຊົມສະຖານທີ່ທ່ອງທ່ຽວການຜະລິດກະສິກໍາເປັນສິນຄ້າຕິດພັນກັບທໍາມະຊາດ ຟາມພາຈະເລີນ ບ້ານອ່າງນ້ອຍ ຕື່ມອີກ.
