ພິທີເປີດງານບຸນປະເພນີກອງເຂົ້າຫອມສັງທອງ ແລະ ງານວາງສະແດງສິນຄ້າຢູ່ເມືອງສັງທອງ, ນະຄອນຫລວງວຽງຈັນ ຄັ້ງທີ II ປະຈຳປີ 2023 ຈັດຂຶ້ນໃນຕອນແລງວັນທີ 27 ມັງກອນ 2023 ທີ່ບ້ານເພຍລາດ ພາຍໃນເທດສະບານເມືອງ ໂດຍມີ ທ່ານ ຖະຫນອມ ທໍາທອງ, ປະທານແນວລາວສ້າງຊາດນະຄອນຫລວງວຽງຈັນ, ທ່ານ ພົງສະຫວັນ ສີລິພັນ, ເຈົ້າເມືອງສັງທອງ, ພ້ອມດ້ວຍແຂກຮັບເຊີນ ແລະ ມວນຊົນຊາວເມືອງສັງທອງ ເຂົ້າຮ່ວມ.
ທ່ານ ລຸນທອງ ບຸນມະນີ, ຮອງເຈົ້າເມືອງສັງທອງ ໄດ້ຂຶ້ນລາຍງານກ່ຽວກັບການກະກຽມຈັດງານຄັ້ງນີ້ ເຊີ່ງຈຸດປະສົງເພື່ອເປັນການປົກປັກຮັກສາ ແລະ ສົ່ງເສີມຮີດຄອງປະເພນີ ວັດທະນະທຳອັນດີງາມຂອງຊາດ, ທັງເປັນການສຶກສາອົບຮົມປູກຈິດສຳນຶກໃຫ້ແກ່ຊາວໜຸ່ມ, ເຍົາວະຊົນ, ອານຸຊົນ ແລະ ປະຊາຊົນບັນດາເຜົ່າພາຍໃນເມືອງໃຫ້ຮັບຮູ້ວິຖີການດຳລົງຊີວິດຂອງປະຊາຊົນໃນເມື່ອກ່ອນຕິດພັນກັບຍຸກສະ ໄໝປັດຈຸບັນ, ທັງເປັນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວພາຍໃນ ເມືອງສັງທອງ ກໍຄື ນະຄອນຫລວງວຽງຈັນ ໃຫ້ນັບມື້ເພີ່ມຂຶ້ນ.
ພາຍໃນງານຄັ້ງນີ້ ມີຫລາຍກິດຈະກໍາ ເປັນຕົ້ນ: ງານວາງ ສະແດງສິນຄ້າຫນຶ່ງເມືອງຫນຶ່ງຜະລິດຕະພັນ ແລະ ສິນຄ້າອື່ນໆ, ຊົມກອງເຂົ້າຫອມສັງທອງ, ການສະ ແດງສິລະປະ, ການແຂ່ງຂັນກິລາບານເຕະ ແລະ ເປຕັງ ແລະ ກິດຈະກໍາອື່ນໆ ເຊີ່ງຈະດໍາເນີນໄປຮອດວັນທີ 29 ມັງກອນ 2023 ຈິ່ງຈະສໍາເລັດ.
ສໍາລັບພິທີເປີດບຸນກອງເຂົ້າຫອມສັງທອງຄັ້ງນີ້ ເລີ່ມຕົ້ນຈາກການແຫ່ກ້ອນກໍາລັງຈາກພາກສ່ວນຕ່າງໆ ພາຍໃນເມືອງ, ຈາກນັ້ນໄດ້ມີພິທີສູດກອງເຂົ້າຫອມ, ຊົມສິລະປະວັນນະຄະດີ ແລະ ອື່ນໆ ດ້ວຍຄວາມເບີກບານມ່ວນຊື່ນ.
Cr: BT
