ກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ຮ່ວມກັບ ພະແນກອຸດສາຫະກຳ ແລະ ການຄ້າ ແຂວງຈຳປາສັກ ໄດ້ຈັດງານວາງສະແດງ ແລະ ຈຳໜ່າຍສິນຄ້າ ກະສິກໍາປຸງແຕ່ງ 09 ແຂວງ ຕົວແບບ ຂຶ້ນລະຫວ່າງວັນທີ 30 ກັນຍາ-02 ຕຸລາ 2022 ທີ່ ສູນການຄ້າ ແຟຣນຊິບມໍ ນະຄອນປາກເຊ, ແຂວງຈໍາປາສັກ. ໂດຍການເຂົ້າຮ່ວມຂອງ ທ່ານ ປອ. ວິໄລວົງ ບຸດດາຄໍາ ເຈົ້າແຂວງຈໍາປາສັກ, ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ພ້ອມດ້ວຍພະນັກງານພາກລັດ ແລະ ຫົວໜ່ວຍທຸລະກິດ 09 ແຂວງ ແລະ ບັນດາທ່ານແຂກຜູ້ມີກຽດທຸກທ່ານ.
ງານຄັ້ງນີ້ ໂດຍໄດ້ຮັບການສະໜັບສະໜູນດ້ານງົບປະມານ ຈາກໂຄງການປະເມີນການພັດທະນາສິນຄ້າ ຫົວໜ່ວຍທຸລະກິດຂະໜາດນ້ອຍ ແລະ ກາງ ເພື່ອສົ່ງອອກ ແລະ ເຂົ້າເຖິງຕະຫລາດ ສປ ຈີນ ສົກປີ 2021 ບົນພື້ນຖານສັນຍາຮ່ວມມືໂຄງການກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ລະ ຫວ່າງ ສປປ ລາວ ແລະ ສປ ຈີນ. ງານວາງສະແດງ ແລະ ຈໍາໜ່າຍສິນຄ້າ ໃນຄັ້ງນີ້ ເພື່ອແນໃສ່ການໂຄສະ ນາຜະລິດຕະພັນສິນຄ້າກະສິກຳປຸງແຕ່ງ ເພື່ອສົ່ງອອກ ແລະ ເຂົ້າເຖິງຕະຫລາດພາຍໃນ ແລະ ຕ່າງປະ ເທດ ຂອງຜະລິດຕະພັນລາວ, ເປັນການສົ່ງເສີມສິນຄ້າລາວເຂົ້າສູ່ຕະຫລາດພາຍໃນ ແລະ ສາກົນ, ກະຕຸ້ນການຕະຫລາດ ຢູ່ພາຍໃນປະເທດໃຫ້ມີການຂະຫຍາຍຕົວເພີ່ມຂຶ້ນ, ໃຫ້ຜູ້ຜະລິດ ແລະ ຜູ້ປະກອບການເຂົ້າໃຈກ່ຽວກັບ ສະພາບການປ່ຽນແປງຕະຫລາດທັງພາຍໃນ ແລະ ຕ່າງປະເທດ, ການປັບໂຕໃຫ້ເຂົ້າກັບສະພາບການໃນປັດຈຸບັນ(New normal), ເຮັດໃຫ້ຫົວໜ່ວຍທຸລະກິດ ໄດ້ແລກປ່ຽນບົດຮຽນເຊິ່ງກັນ ແລະ ກັນ, ທັງດ້ານການປຸງແຕ່ງ, ຕະຫລອອດຮອດການຈັບຄູ່ທະລະກິດ ລະຫວ່າງ ຜູ້ປຸງແຕ່ງ ແລະ ຜູ້ປະ ກອບການທຸລະກິດກະສິກໍາ, ຫັດຖະກໍາ ໃຫ້ມີມູນຄ່າທີ່ສູງຂຶ້ນ.
ພາຍໃນງານວາງສະແດງສິນຄ້າ ມີທັງໝົດ 40 ຫ້ອງ ມີ 46 ຫົວໜ່ວຍເຂົ້າຮ່ວມ; ໃນນັ້ນ ມີຫ້ອງວາງສະແດງສິນຄ້າ ຕົວແບບ ຂອງໂຄງການ ຈາກ 09 ແຂວງ ຈໍານວນ 01 ຫ້ອງໃຫຍ່, ກວມເອົາ 06 ຫ້ອງ ມີ 09 ຫົວໜ໋ວຍ, ຫ້ອງວາງສະແດງສິນຄ້າ ຜະລິດຕະພັນທີ່ພົ້ນເດັ່ນ ຂອງ 04 ແຂວງພາກໃຕ້ (ຈໍາປາສັກ, ສາລະວັນ, ເຊກອງ, ອັດຕະປື) ຈໍານວນ 04 ຫ້ອງ ມີ 04 ຫົວໜ່ວຍ, ຫ້ອງວາງສະແດງ ແລະ ຈໍາໜ່າຍສິນຄ້າ ວິສາຫະກິດ ພາຍໃນແຂວງຈໍາປາສັກ ຈຳນວນ 30 ຫ້ອງ. ໃນນັ້ນ: ສິນຄ້າໂອດັອບມີ 33 ຫົວໜ່ວຍ ຈາກ 09 ເມືອງ 01 ນະຄອນ (08 ຫ້ອງ); ສິນຄ້າຫັດຖະກໍາ 06 ຫົວໜ່ວຍ; ສິນຄ້າກະສິກໍາ ແລະ ອຸດສາຫະກໍາ ປຸງແຕ່ງ 17 ຫົວໜ່ວຍ. ສິນຄ້າທີ່ນໍາມາວາງສະແດງ ແລະ ຈໍາໜ່າຍ ແມ່ນປະເພດຜະລິດຕະພັນສິນຄ້າກະສິກໍາ-ອຸດສາຫະກໍາ ປຸ່ງແຕ່ງ(ກາເຟ-ຊາ-ເຂົ້າ-ຜັກ-ມັນ ຕົ້ນ-ປາສຕິກ-ທໍ່ພີອີ), ເຄື່ອງຫັດຖະກຳຈັກສານໄມ້ປ່ອງ-ຫວາຍ, ຜ້າຝ້າຍ, ຜ້າໄໝ, ສິນຄ້າໂອດັອບ ພ້ອມທັງສິນຄ້າອື່ນໆ ທີ່ເປັນທ່າແຮງຂອງແຂວງ ແລະ ສິນຄ້າຈາກ 9 ແຂວງ ທີ່ເຂົ້າຮ່ວມໂຄງການ.
ຂ່າວ: ສຸກສະຫວັດ
ຂໍ້ມູນ: ກ່ານສີລາ
