ໃນວັນທີ 3 ຕຸລາ ນີ້ ສະພາແຫ່ງຊາດ ໄດ້ຈັດກອງປະຊຸມທາບທາມຄໍາເຫັນໃສ່ຮ່າງກົດໝາຍຈໍານວນ 12 ສະບັບ ຂຶ້ນຢູ່ສະໂມສອນຂອງແຂວງຈໍາປາສັກ ໂດຍການເປັນປະທານກອງປະຊຸມຂອງ ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ມີບັນດາທ່ານປະທານ-ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ປະທານ-ຮອງປະທານສະພາປະຊາຊົນຂັ້ນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ຈາກ 4 ແຂວງພາກໃຕ້ ຄື: ແຂວງສາລະວັນ, ແຂວງຈໍາປາສັກ, ແຂວງເຊກອງ ແລະ ແຂວງອັດຕະປື ພ້ອມດ້ວຍພາກສ່ວນທີ່ກ່ຽວຂ້ອງກັບກົດໝາຍເຂົ້າຮ່ວມ.
ວາລະດໍາເນີນກອງປະຊຸມ, ທ່ານ ຄໍາໃບ ດໍາລັດ ໄດ້ກ່າວຈຸດປະສົງຂອງການດໍາເນີນກອງປະຊຸມວ່າ: ເພື່ອທາບທາມຄໍາເຫັນຂອງບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ຈາກ 4 ແຂວງພາກໃຕ້ ແລະ ພາກສ່ວນກ່ຽວຂ້ອງ ໃສ່ຮ່າງກົດໝາຍ ຈໍານວນ 12 ສະບັບ ໃຫ້ມີເນື້ອໃນຄົບຖ້ວນສົມບູນ ກ່ອນການນໍາເຂົ້າຄົ້ນຄວ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ XI ທີ່ຈະດໍາເນີນໃນທ້າຍປີ 2022 ນີ້. ຮ່າງກົດໝາຍ ຈໍານວນ 12 ສະບັບ ທີ່ນໍາມາທາບທາມໃນກອງປະຊຸມຄັ້ງນີ້ປະກອບມີ ກົດໝາຍສ້າງໃໝ່ 3 ສະບັບ, ກົດໝາຍສະບັບປັບປຸງ 9 ສະບັບ ຄື: ຮ່າງກົດໝາຍວ່າດ້ວຍໜັງສືຜ່ານແດນ (ສ້າງໃໝ່), ຮ່າງກົດໝາຍວ່າດ້ວຍການທາງນໍ້າ (ສ້າງໃໝ່), ຮ່າງກົດໝາຍວ່າດ້ວຍຫໍພິພິທະພັນ (ສ້າງໃໝ່), ກົດໝາຍວ່າດ້ວຍທະນາຍຄວາມ (ສະບັບປັງປຸງ), ກົດໝາຍວ່າດ້ວຍທະບຽນສານ (ສ້າງໃໝ່), ກົດໝາຍວ່າດ້ວຍວິທະຍາສາດ ແລະ ເຕັກໂນໂລຊີ (ສະບັບປັບປຸງ), ກົດໝາຍວ່າດ້ວຍວິສາຫະກິດ (ສະບັບປັງປຸງ), ກົດ ໝາຍວ່າດ້ວຍທຸລະກໍາທາງເອເລັກໂຕຣນິກ (ສະບັບປັບປຸງ), ກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ (ສະບັບປັບປຸງ), ກົດໝາຍວ່າດ້ວຍໄອຍະການທະຫານ (ສະບັບປັບປຸງ), ກົດໝາຍວ່າດ້ວຍການກວດສອບແຫ່ງລັດ (ສະບັບປັບປຸງ) ແລະ ກົດໝາຍວ່າດ້ວຍການກວດກາລັດ (ສະບັບປັບປຸງ). ພ້ອມດຽວກັນ, ປະທານກອງປະຊຸມໄດ້ຮຽກຮອງໃຫ້ບັນດາທ່ານຜູ້ແທນກອງປະຊຸມຈົ່ງພ້ອມກັນຍົກສູງຄວາມຮັບຜິດຊອບ ໃນການຄົ້ນຄວ້າປະກອບຄຳເຫັນຢ່າງຕັ້ງໜ້າ ເພື່ອເຮັດເນື້ອໃນໃຫ້ກົດໝາຍຄົບຖ້ວນສົມບູນ, ຮັດກຸມ ແລະ ສ່ອງແສງເຖິງແນວທາງຂອງພັກ, ມີລັກສະນະຊາດ, ລັກສະນະວິທະຍາສາດ, ລັກສະນະສາກົນ ໂດຍສອດຄ່ອງກັບສະພາບຄວາມເປັນຈິງ ຂອງສັງຄົມໃນປັດຈຸບັນ ແລະ ຍາວນານ.
ຈາກນັ້ນ, ກອງປະຊຸມໄດ້ຮັບຟັງການນໍາສະເໜີໂດຍຫຍໍ້ກ່ຽວກັບເຫດຜົນ, ຄວາມຈໍາເປັນ ແລະ ເນື້ອໃນເຈາະຈີມຕໍ່ການສ້າງ ແລະ ປັບປຸງກົດໝາຍ ແຕ່ລະສະບັບ ຈາກຄະນະຮັບຜິດຊອບ. ໂອກາດດຽວກັນ, ບັນດາທ່ານຜູ້ແທນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ຈາກ 4 ແຂວງພາກໃຕ້ ໄດ້ພ້ອມກັນປະກອບຄໍາເຫັນ ໃສ່ເນື້ອໃນຮ່າງກົດໝາຍທີ່ຄະນະຮັບຜິດຊອບນໍາສະເໜີຢ່າງມີຈຸດສຸມ, ແນໃສ່ເຮັດໃຫ້ເນື້ອໃນຂອງຮ່າງກົດໝາຍທີ່ສ້າງຂຶ້ນໃໝ່ ແລະ ສະບັບປັບປຸງ. ໃຫ້ມີເນື້ອໃນຄົບຖ້ວນສົມບູນ, ມີຄວາມຖືກຕ້ອງສອດຄ່ອງກັບສະພາບເສດຖະກິດ-ສັງຄົມ ໃນປັດຈຸບັນ ສາມາດພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ XI ທີ່ຈະມາເຖິງ, ກອງປະຊຸມຄັ້ງນີ້, ໄດ້ຮັບການສະໜັບສະໜູນຈາກ: ແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ) ຮ່ວມກັບ ມູນນິທິເອເຊຍ ຊຶ່ງກອງປະຊຸມຈະສືບຕໍ່ດໍາເນີນໄປຈົນຮອດວັນທີ 7 ຕຸລາ 2022 ຈຶ່ງຈະປິດລົງ.
(ຂ່າວ-ພາບ: ສົມວິຈິດ ໄຊມົນຕີ)
