ສະຖານີໂທລະພາບແຫ່ງຊາດລາວ ສຳເລັດການແຂ່ງຂັນ ພິທີກອນ, ໂຄສົກຂ່າວໄວໜຸ່ມດີເດັ່ນ ປະຈຳປີ 2022 ໃນວັນທີ 1 ຕຸລາ 2022 ເຊິ່ງສາມາດເລືອກໄດ້ຜູ້ຊະນະເລີດ ອັນດັບ 1 ແມ່ນ ທ້າວ ພຸດທະສິນ ກອງເເພງ, ອັນດັບ 2 ນາງ ອໍລະນີ ທະນູສິນ, ອັບດັບທີ 3 ທ້າວ ສຸກສະຫວາດ ເທບພະວົງ.
ທ່ານ ອຳຄາ ວົງໝື່ນກ້າ ຜູ້ອຳນວຍການໃຫຍ່ ໂທລະພາບແຫ່ງຊາດລາວ ໄດ້ໃຫ້ຮູ້ວ່າ: ການຈັດງານແຂ່ງຂັນຄັ້ງນີ້ ເປັນກິດຈະກໍາໜຶ່ງ ທີ່ນອນຢູ່ໃນຫລາຍກິດຈະກໍາ ຂອງໂທລະພາບແຫ່ງຊາດລາວ ຈັດຂຶ້ນເພື່ອສ້າງຂະບວນການວັນສື່ມວນຊົນ ແລະ ການພິມຈຳໜ່າຍ ຄົບຮອບ 72 ປີ ແລະ ວັນສ້າງຕັ້ງໂທລະພາບແຫ່ງຊາດລາວ ຄົບຮອບ 39 ປີ ກິດຈະກຳໃນຄັ້ງນີ້, ຍັງເນັ້ນໃສ່ສ້າງຜູ້ສືບທອດພິທີກອນ, ໂຄສົກຂ່າວ ໃຫ້ໄດ້ຄຸນນະພາບ ແລະ ມີຈຳນວນຫລາຍຂຶ້ນ ພ້ອມທັງເປັນການເປີດເວທີ ໃນການສະແດງຄວາມຮູ້ຄວາມສາມາດ ໃຫ້ແກ່ໄວໜຸ່ມທີ່ມີຄວາມມັກຮັກໃນດ້ານການເວົ້າ, ການເປັນພິທີກອນ ແລະ ເປັນໂຄສົກຂ່າວ ໃຫ້ກວ້າງຂວາງຍິ່ງຂຶ້ນ. ການແຂ່ງຂັນຄັ້ງນີ້, ຈະເປັນໂອກາດອັນດີໃຫ້ແກ່ຜູ້ເຂົ້າແຂ່ງຂັນທຸກທ່ານ ໄດ້ຮ່ວມແລກປ່ຽນ ແລະ ພ້ອມກັນພັດທະນາວຽກງານສື່ ໂດຍສະເພາະວຽກງານພິທີກອນ, ໂຄສົກຂ່າວ ໃຫ້ມີທັງປະລິມານ ແລະ ຄຸນນະພາບຫລາຍຂຶ້ນ ເພື່ອປະກອບສ່ວນເຂົ້າໃນການພັດທະນາ ສື່ໂທລະພາບ, ສື່ວິທະຍຸ ແລະ ການເຮັດຂ່າວອອນລາຍ ໃຫ້ສົມຄູ່ກັບຄວາມຮຽກຮ້ອງຕ້ອງການແຫ່ງການພັດທະນາ ສື່ໃນຍຸກປັດຈຸບັນ ໃຫ້ເຕີບໃຫຍ່ ແລະ ເຂັ້ມແຂງຂຶ້ນກວ່າເກົ່າ.
ການແຂ່ງຂັນດັ່ງກ່າວ, ໄດ້ເລີ່ມມາແຕ່ຕົ້ນເດືອນມີນາ 2021 ໂດຍມີຜູ້ສະໜັກຈາກນະຄອນຫລວງວຽງຈັນ ແລະ ຕ່າງແຂວງເຂົ້າຮ່ວມ ເກືອບ 200 ຄົນ, ກ່ອນທີ່ຈະມາເຖິງຮອບຊິງຊະນະເລີດ ຜູ້ເຂົ້າແຂ່ງຂັນແມ່ນໄດ້ຮັບການຝຶກອົບຮົມ, ມີການພົບປະແລກປ່ຽນປະສົບການການເປັນພິທີກອນ ແລະ ໂຄສົກ ຈາກບັນດາໂຄສົກສາຍອາຊີບ, ເຂົ້າທົດລອງການອ່ານຂ່າວ ແລະ ຮ່ວມກິດຈະກຳອື່ນໆ.
ຂ່າວ: ກິດຕາ; ພາບ: ເກດສະໜາ (ນັກຂ່າວສຳນັກຂ່າວສານປະເທດລາວ)
Medialaos MMD
