ວູຟແຮມຕັນ ຢືນຢັນຢ່າງເປັນທາງການວ່າ ບຣູໂນ່ ຣາດ ຖືກປົດອອກຈາກຕໍາແໜ່ງຜູ້ຈັດການຮຽບຮ້ອຍແລ້ວ ດ້ວຍການເລີ່ມຕົ້ນທີ່ບໍ່ດີໃນລະດູການນີ້ ທີ່ປັດຈຸບັນຢູ່ໃນເຂດຕົກຊັ້ນ. ການພ່າຍແພ້ຕໍ່ ເວສແຮມ ຢູໄນເຕັດ ໃນວັນເສົາ ເປັນການພ່າຍແພ້ນັດທີ 4 ຂອງ ວູຟ ຂອງລະດູການນີ້ ແຖມຍັງຍິງໄປພຽງ 3 ປະຕູຈາກທີ່ຫຼິ້ນມາ 8 ນັດໃນລີກ.
ວູຟ ໃຊ້ເງິນໄປ 100 ລ້ານປອນກັບການເສີມທັບໃນໄລຍະລະດູຮ້ອນທີ່ຜ່ານມາ ແຕ່ສຸດທ້າຍແລ້ວ ຜົນງານກໍບໍ່ດີເທົ່າໃດ ເຮັດໃຫ້ ລາດ ຕ້ອງງອກຈາກຕໍາແໜ່ງ ຫຼັງຄຸມມາໄດ້ 15 ເດືອນ. ພວກເຂົາຍັງຫາໄຊຊະນະພົບພຽງແຕ່ນັດດຽວ ຈາກການລົງສະໜາມພຣີເມຍລີກ 15 ເກມຫຼັງສຸດ ຫຼືນັບຕັ້ງແຕ່ທີ່ເອົາຊະນະ ແອສຕັນ ວິນລ່າ 2-1 ເມື່ອວັນທີ 2 ເດືອນເມສາ.
ວູຟ ຈະໃຫ້ ສະຕີຟ ເດວິສ ແລະ ເຈມ ຄອນລິນ ສອງຄູຝຶກສອນຜູ້ມີປະສົບການ ເຮັດໜ້າທີ່ກຽມທີມສໍາລັບການໄປຢ້ຽມຢາມ ເຊວຊີ ໃນທ້າຍອາທິດຫນ້າ. ລາດ ເຂົ້າມາຮັບຕໍາແໜ່ງຄຸມທີມໃນໄລຍະຕົ້ນລະດູການທີ່ຜ່ານມາ ເພື່ອຮັບໜ້າທີ່ຕໍ່ຈາກ ນູໂນ ເອສປີຣິໂຕ ຊານໂຕ ແລະ ໃຫ້ທີມມີລຸ້ນໄປຫຼິ້ນບານເຕະເອີຣົບໃນໄລຍະເຄິ່ງທໍາອິດຂອງລະດູການ ກ່ອນປະເຊີນກັບບັນຫາຟອມການຫຼິ້ນ.
