ສະພາແຫ່ງຊາດລາວ ຮ່ວມກັບ ສະຖານເອກອັກຄະລັດຖະທູດຫວຽດນາມປະຈໍາລາວ ເປີດຂະບວນການຂີ່ລົດຖີບສາມັກຄີ ແລະ ການແຂ່ງຂັນລົດຖີບເພື່ອສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ປີ 2022 ຄືວັນສ້າງຕັ້ງສາຍພົວພັນທາງການທູດລະຫວ່າງລາວ-ຫວຽດນາມ,ຫວຽດນາມ-ລາວ ວັນທີ5ກັນຍາຄົບຮອບ60ປີ ເເລະ ວັນເຊັນສົນທິສັນຍາເເລະການຮ່ວມມືວັນທີ18ກໍລະກົດຄົບຮອບ45ປີ ຈັດຂຶ້ນຕອນເຊົ້າວັນທີ 24 ກັນຍາ 2022 ຢູ່ຫໍສະພາແຫ່ງຊາດ ມີ ທ່ານໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ, ທ່ານຫງວຽນບ໋າຮຸ່ງ ເອກອັກຄະລັດຖະທູດ ຫວຽດນາມປະຈໍາລາວ, ມີການນໍາຂັ້ນສູງພັກ-ລັດ ລາວ-ຫວຽດນາມ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ ເປັນຈໍານວນຫລາຍ.
ໂອກາດນີ້ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ສະພາແຫ່ງຊາດມີຄໍາເຫັນກ່າວເປີດພິທີວ່າ:ການຈັດຂະບວນຂີ່ລົດຖີບສາມັກຄີ ແລະ ການແຂ່ງຂັນລົດຖີບຄັ້ງນີ້ ເພື່ອແນໃສ່ຊຸກຍູ້ ແລະ ເສີມສ້າງຄວາມສາມັກຄີຮັກແພງ ໃຫ້ພະນັກງານ, ໄວໜຸ່ມ ກໍ່ຄືມວນຊົນຂອງສອງປະເທດ ໄດ້ມີໂອກາດພົບປະ ແລະ ເຄື່ອນໄຫວກິດຈະກໍາດ້ານກິລາຮ່ວມກັນ, ເປັນການ ຂ່ຳນັບຊົມເຊີຍ ແລະ ສະເຫຼີມສະຫຼອງ 2 ວັນປະຫວັດສາດລະຫວ່າງລາວ-ຫວຽດນາມ, ຫວຽດນາມ-ລາວ ໂດຍສະເພາະວັນສ້າງຕັ້ງສາຍພົວພັນທາງການທູດວັນທີ5ກັນຍາຄົບຮອບ 60 ປີ ເເລະ ວັນເຊັນສັນຍາມິດຕະພາບ ແລະ ການຮ່ວມມື ຄົບຮອບ45ປີໃຫ້ມີຂະບວນຟົດຟື້ນ.
ທ່ານ ສັນຍາ ປຣະເສີດ ມີຄໍາເຫັນຕື່ມວ່າ: ການເປີດຂະບວນການຂີ່ລົດຖີບສາມັກຄີ ແລະ ການແຂ່ງຂັນລົດຖີບຄັ້ງນີ້ເປັນຫນື່ງໃນກິດຈະກໍາທີ່ສອງພັກ-ສອງລັດເວົ້າລວມ , ເວົ້າສະເພາະກໍ່ຄື ສະພາແຫ່ງຊາດສອງປະເທດຈັດຂື້ນເພື່ອສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ,ຫວຽດນາມ-ລາວ ປີ 2022 ນອກຈາກນີ້ ໄລຍະຜ່ານມາ, ສະພາແຫ່ງຊາດລາວ ໄດ້ສ້າງກິດຈະກໍາຕ່າງໆ ໃນປີນີ້ ເປັນຕົ້ນ: ການແລກປ່ຽນຢ້ຽມຢາມ ຂອງການນໍາຂັ້ນສູງ ຂອງສອງສະພາແຫ່ງຊາດລາວ-ຫວຽດນາມ ,ແລກປ່ຽນການຢ້ຽມຢາມຂອງການນໍາ ຂັ້ນຮອງປະທານສະພາສະພາເເຫ່ງຊາດຮ່ວມກັນ, ການພົບປະແບບເຊິ່ງໜ້າ ແລະ ທາງໄກ ລະຫວ່າງ ສອງການນໍາ ຂອງສອງສະພາແຫ່ງຊາດ ເພື່ອແລກປ່ຽນບົດຮຽນໃນການຈັດຕັ້ງປະຕິບັດພາລະບົດບາດ ຂອງອົງການນິຕິບັດຍັດ; ການແລກປ່ຽນບົດຮຽນ ລະຫວ່າງສອງຫ້ອງວ່າການສະພາແຫ່ງຊາດ; ແລກປ່ຽນສານອວຍພອນ ລະຫວ່າງ ຄູ່ຮ່ວມຕໍາແໜ່ງຂອງສອງການນໍາສະພາແຫ່ງຊາດ ໃນໂອກາດສຳຄັນຂອງສອງປະເທດ ມີການຈັດພິທີປະຖະກະຖາເລົ່າມູນເຊື້ອການພົວພັນຮ່ວມມື ລະຫວ່າງ ລາວ-ຫວຽດນາມ ແລະ ກິດຈະກໍາອື່ນໆ.
ສໍາລັບ ເປີດຂະບວນການຂີ່ລົດຖີບສາມັກຄີ ແລະ ການແຂ່ງຂັນລົດຖີບເພື່ອສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມດຫວຽດນາມ-ລາວ ປີ 2022 ໄດ້ເເບ່ງອອກເປັນສອງກຸ່ມ ກຸ່ມທີ່1ເເມ່ນການຂີ່ລົດຖີບສາມັກຄີ ມີໄລຍະທາງເເຕ່ຫໍສະພາແຫ່ງຊາດ ຫາ ສວນສາທາລະນະເຈົ້າຟ້າງຸ່ມ ເເລ້ວ ຂີ່ກັບຄືນມາຫໍສະພາແຫ່ງຊາດ, ກຸ່ມທີ່2ເເມ່ນປະເພດການເເຂ່ງຂັນໂດຍມີຫລາຍພາກສ່ວນເຂົ້າຮ່ວມ ເລີ່ມຈາກຫໍສະພາແຫ່ງຊາດ ຫາ ທ່ານາເເລ້ງເເລ້ວຂີ່ກັບຄືນມາເສັ້ນໄຊ ຫນ້າຫໍສະພາແຫ່ງຊາດ ຜູ້ຊະນະເລີດຈະໄດ້ຮັບຂັນພ້ອມດ້ວຍຂອງລາງວັນຈໍານວນຫນື່ງ.
ໂດຍ: ເດດອາລຸນ ແກ້ວວິໄລ (ວິທະຍຸແຫ່ງຊາດ)
