ຂ່າວສານຊີອາໄອລາຍງານ ເມື່ອທ້າຍອາທິດທີ່ຜ່ານມານີ້, ກອງປະຊຸມລັດຖະມົນຕີການຄ້າ, ການລົງທຶນ ແລະ ອຸດສາຫະກຳກຸ່ມ G20 ໄດ້ຈັດຂຶ້ນຢູ່ອິນໂດເນເຊຍ ໂດຍກອງປະຊຸມຄັ້ງນີ້ຕົ້ນຕໍໄດ້ປຶກສາຫາລືກ່ຽວກັບການປະຕິຮູບອົງການການຄ້າໂລກ, ການທີ່ກົນໄກການຄ້າຫຼາຍຝ່າຍຊຸກຍູ້ໃຫ້ບັນລຸການພັດທະນາແບບຍືນຍົງ, ການຮັບມືກັບການແຜ່ລະບາດຂອງພະຍາດໂຄວິດ-19, ການຄ້າດີຈີຕອນກັບຕ່ອງໂສ້ຄຸນຄ່າທົ່ວໂລກ, ການລົງທຶນແບບຍືນຍົງ, ອຸດສາຫະກຳ 4.0 ແລະ ຫົວຂໍ້ອື່ນໆ.
ຜູ້ຕາງໜ້າຈີນໄດ້ກ່າວຄວາມເຫັນໃນກອງປະຊຸມວ່າ: ກຸ່ມ G20 ຄວນນຳໜ້າຈັດຕັ້ງປະຕິບັດຜົນສຳເລັດໃນກອງປະຊຸມລະດັບລັດຖະມົນຕີຄັ້ງທີ 12 ຂອງອົງການການຄ້າໂລກ, ຊຸກຍູ້ໃຫ້ການປະຕິຮູບອົງການການຄ້າໂລກມີຄວາມຄືບໜ້າຕົວຈິງ. ຈີນຍິນດີຮ່ວມກັບສະມາຊິກອື່ນໆຂອງກຸ່ມ G20, ຕັ້ງໜ້າເຂົ້າຮ່ວມການປະຕິຮູບອົງການການຄ້າໂລກ, ຊຸກຍູ້ໃຫ້ກົນໄກການຄ້າຫຼາຍຝ່າຍບັນລຸເປົ້າໝາຍການພັດທະນາແບບຍືນຍົງ. ຈີນພວມຍຶດໝັ້ນແນວຄວາມຄິດການພັດທະນາໃໝ່ທີ່ມີຫົວຄິດປະດິດສ້າງ, ປະສານງານແບບສີຂຽວ, ເປີດປະຕູ ແລະ ຊົມໃຊ້ຮ່ວມກັນ ເພີ່ມທະວີການອອກແບບນະໂຍບາຍຈາກຂັ້ນສູງສຸດ, ພ້ອມທັງສຸມກຳລັງເຂົ້າໃນການສ້າງການພົວພັນຄູ່ຮ່ວມພັດທະນາແບບສີຂຽວ, ຕັ້ງໜ້າດຳເນີນການລົງທຶນ ແລະການຮ່ວມມືສາກົນ, ຊຸກຍູ້ການຮ່ວມກັນສ້າງໜຶ່ງແລວໜຶ່ງເສັ້ນທາງຕາມທິດສີຂຽວ.
