ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມານີ້, ທ່ານນາຍົກລັດຖະມົນຕີຍີ່ປຸ່ນໄດ້ປະກາດຮັບນັກທ່ອງທ່ຽວລາຍບຸກຄົນ ໂດຍບໍ່ຜ່ານບໍລິສັດທ່ອງທ່ຽວຕັ້ງແຕ່ວັນທີ 11 ຕຸລາໜ້ານີ້ເປັນຕົ້ນໄປ ໂດຍສົ່ງສັນຍານການເປີດປະເທດເຕັມຮູບແບບຄັ້ງທຳອິດໃນຮອບປະມານ 2 ປີເຄິ່ງຫຼັງຈາກການແຜ່ລະບາດຂອງພະຍາດໂຄວິດ-19.
ທ່ານ ຟູມິໂອະ ຄິຊິດະ ນາຍົກລັດຖະມົນຕີຂອງຍີ່ປຸ່ນກ່າວໃນຖະແຫຼງການໂດຍລະບຸວ່າ ຍີ່ປຸ່ນຈະເປີດຮັບນັກທ່ອງທ່ຽວແບບບໍ່ມີວີຊ່າ (Free Visa) ລາຍບຸກຄົນໂດຍບໍ່ຜ່ານບໍລິສັດທ່ອງທ່ຽວ ນັບຕັ້ງແຕ່ວັນທີ 11 ຕຸລານີ້ເປັນຕົ້ນໄປ. ທ່ານກ່າວວ່າ ພວກເຮົາຈະຍົກເລີກການຈຳກັດຈຳນວນຜູ້ເດີນທາງເຂົ້າປະເທດ ແລະ ຈະກັບມາອະນຸຸຍາດໃຫ້ນັກທ່ອງທ່ຽວທົ່ວໄປເຂົ້າປະເທດ ແລະ Free Visa ການທ່ອງທ່ຽວອີກຄັ້ງນັບຕັ້ງແຕ່ວັນທີ 11 ຕຸລານີ້ເປັນຕົ້ນໄປ ຊຶ່ງປັດຈຸບັນ, ຍີ່ປຸ່ນອະນຸຍາດສະເພາະຜູ້ເດີນທາງເຂົ້າປະເທດແບບຜ່ານບໍລິສັດທ່ອງທ່ຽວ ໂດຍຈຳກັດຈຳນວນມື້ລະບໍ່ເກີນ 5 ໝື່ນຄົນ ແລະ ກຳນົດໃຫ້ຜູ້ເດີນທາງເຂົ້າປະເທດທຸກຄົນຕ້ອງຂໍວີຊ່າໃນການພະຍາຍາມເພື່ອສະກັດກັ້ນການແຜ່ລະບາດຂອງພະຍາດໂຄວິດ-19.
ໂດຍນັບແຕ່ວັນທີ 11 ຕຸລາເປັນຕົ້ນໄປ ນັກທ່ອງທ່ຽວໄລຍະສັ້ນທີ່ໄດ້ຮັບການຍົກເວັ້ນວີຊ່າໃນໄລຍະກ່ອນພະຍາດໂຄວິດ-19 ແຜ່ລະບາດ ຈະສາມາດເຂົ້າປະເທດຍີ່ປຸ່ນໄດ້ໂດຍບໍ່ຕ້ອງຂໍວີຊ່າທ່ອງທ່ຽວ ແລະ ບໍ່ຕ້ອງຈອງທຣິບ (Trip) ຜ່ານບໍລິສັດທ່ອງທ່ຽວເຮັດໃຫ້ເຂົ້າປະເທດໄດ້ງ່າຍຂຶ້ນ.
