(ສພຊ) ເພື່ອເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ລະຫວ່າງ ສອງສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ. ການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022 ຄື: 60 ປີ ແຫ່ງການສ້າງຕັ້ງສາຍພົວພັນການທູດ ແລະ 45 ປີ ແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ. ພ້ອມກັນນີ້, ເປັນການສ້າງຄວາມສາມັກຄີ ລະຫວ່າງ ສະພາແຫ່ງຊາດລາວ – ສະພາແຫ່ງຊາດຫວຽດນາມ ລວມທັງອົງການຈັດຕັ້ງລັດໃນຂົງເຂດການຕ່າງປະເທດ ແລະ ສະຖານທູດຫວຽດນາມ ປະຈຳ ສປປ ລາວ. ໃນວັນທີ 24 ກັນຍາຜ່ານມາ, ສະພາແຫ່ງຊາດ ໄດ້ຈັດງານແຂ່ງຂັນລົດຖີບມິດຕະພາບ ລາວ-ຫວຽດນາມ ປະຈໍາປີ 2022 ຊຶ່ງໄດ້ຮັບການສະໜັບສະໜູນຫຼັກຈາກ ທະນາຄານພັດທະນາລາວ ລວມມູນຄ່າ 500 ລ້ານກວ່າກີບ.
ເພື່ອເປັນການສັນລະເສີນຜົນງານ ແລະ ຄຸນງາມຄວາມດີດັ່ງກ່າວ, ຄະນະປະຈໍາສະພາແຫ່ງຊາດ ຈຶ່ງໄດ້ມອບໃບຍ້ອງຍໍ ໃຫ້ທະນາຄານພັດທະນາລາວ. ຕາງໜ້າສະພາແຫ່ງຊາດມອບໂດຍທ່ານ ບຸນທັນ ບຸນວິໄລ ຮອງເລຂາທິການສະພາແຫ່ງຊາດ, ຕາງໜ້າທະນາຄານພັດທະນາລາວຮັບໂດຍ ທ່ານ ວຽງຄໍາ ວັນສີລາລົມ ຮອງຜູ້ອໍານວຍການທະນາຄານພັດທະນາລາວ ໂດຍການເຂົ້າຮ່ວມເປັນສັກຂີພິຍານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍພະນັກງານທີ່ກ່ຽວຂ້ອງຂອງສອງຝ່າຍ. ໃນປີຜ່ານມາ, ທະນາຄານພັດທະນາລາວ ໄດ້ໃຫ້ການສະໜັບສະໜູນ ສະພາແຫ່ງຊາດ ໂດຍສະເພາະ ກົມສື່ມວນຊົນ, ຄະນະເລຂາທິການສະພາແຫ່ງຊາດ ມູນຄ່າ 200 ລ້ານກີບ ເພື່ອຮັບໃຊ້ເຂົ້າໃນວຽກງານສື່ມວນຊົນ. ສະເພາະປີນີ້, ທະນາຄານພັດທະນາລາວ ໄດ້ໃຫ້ການອຸປະຖໍາ ກົມສື່ມວນຊົນ, ຄະນະເລຂາທິການສະພາແຫ່ງຊາດ ມູນຄ່າ 300 ລ້ານກວ່າກີບ. ໃນນັ້ນ, ໄດ້ຊື້ກ້ອງຖ່າຍຮູບ ແລະ ກ້ອງວິດີໂອ ເພື່ອປະກອບສ່ວນຮັບໃຊ້ເຂົ້າໃນວຽກງານສື່ມວນຊົນຂອງສະພາແຫ່ງຊາດ ຫວັງວ່າຈະໄດ້ຮັບການອຸປະຖໍາຕື່ມອີກໃນປີຕໍ່ໆໄປ.
