ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ ໄດ້ເຄື່ອນ ໄຫວຢ້ຽມຢາມພື້ນຖານການຜະລິດ ຢູ່ແຂວງຈໍາປາສັກ ໃນວັນທີ 22 ກັນຍາ ຜ່ານມານີ້, ໂດຍການພາທາງຂອງ ທ່ານ ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ. ມີການນໍາຈາກສໍານັກງານປະທານປະເທດ, ຈາກກະຊວງ, ຮອງເລຂາພັກແຂວງ, ຄະນະປະຈໍາພັກແຂວງ, ການນໍາພະແນກການກົມກອງທີ່ກ່ຽວຂ້ອງຂອງແຂວງ, ການນໍາເມືອງປາກຊ່ອງ, ເມືອງບາຈຽງຈະເລີນສຸກ, ບັນດາຫົວໜ່ວຍພື້ນຖານການຜະລິດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ຈຸດປະສົງໃນການມາເຄື່ອນໄຫວຢ້ຽມຢາມຢູ່ແຂວງຈຳປາສັກໃນຄັ້ງນີ້ ແມ່ນເພື່ອເປັນການຢ້ຽມຢາມ,ຕິດຕາມ ແລະ ຊຸກຍູ້ໃຫ້ກຳລັງໃຈແກ່ປະຊາຊົນຜູ້ປະກອບການ ການຜະລິດໃຫ້ມີການຂະຫຍາຍຕົວ ແລະ ພັດທະນາກ້າວຂຶ້ນ, ຕອບສະໜອງການບໍລິໂພກ ແລະ ສົ່ງອອກ, ປັບປຸງຂອດການຜະລິດຫັນໄປສູ່ທັນສະ ໄໝ ກະສິກຳສະອາດ ແລະ ຂະຫຍາຍຕະຫຼາດພາຍໃນ ແລະ ຕ່າງປະເທດຢ່າງກວ້າງຂວາງ.
ໃນການຢ້ຽມຢາມພື້ນຖານການຜະລິດຢູ່ເມືອງປາກຊ່ອງ ແຂວງຈຳປາສັກຄັ້ງນີ້ ແມ່ນໄດ້ໄປສວນກາເຟຂອງ ບໍລິສັດ ສົມໄຊຈະເລີນສົ່ງເສີມການກະເສດ ຈຳກັດຜູ້ດຽວ, ສວນຂອງບໍລິສັດອາໂກຣເຕັກ ໂປຣລາວ ຈຳກັດ (ປະເທດມາເລເຊຍ) ແລະ ຢ້ຽມຢາມ ບໍລິສັດ ກາເຟດາວ ຈໍາກັດ ຢູ່ຫຼັກ 20 ເມືອງບາຈຽງຈະເລີນສຸກ ຊຶ່ງຢູ່ແຕ່ລະຈຸດແມ່ນໄດ້ຮັບການຕ້ອນຮັບຈາກທາງບໍລິສັດແຕ່ລະແຫ່ງຢ່າງອົບອຸ່ນ ພ້ອມທັງຮັບຟັງການລາຍງານສະພາບການດຳເນີນທຸລະກິດໂດຍຫຍໍ້ໃຫ້ທ່ານຮອງປະທານປະເທດໄດ້ຮັບຊາບ ຂໍ້ສະດວກ, ຂໍ້ຫຍຸ້ງຍາກ ແລະ ທິດທາງແຜນການພັດທະນາ ໃນຕໍ່ໜ້າອີກດ້ວຍ.
(ຂ່າວ: ມຸກດາວັນ ວິທະຍຸ)
