ພາຍຫຼັງສິ້ນສຸດພາລະກິດການເຂົ້າຮ່ວມແຂ່ງຂັນເຕະບານຮຸ່ນອາຍຸບໍ່ເກີນ 20 ປີ ຫຼື ຢູ-20 ຊີງແຊ໋ມອາຊີ 2023 ຮອບຄັດເລືອກ ກຸ່ມ C ທີ່ ສປປ ລາວ ເປັນເຈົ້າພາບ ເມື່ອວັນທີ 18 ກັນຍາ ຜ່ານມາ ທີ່ສະໜາມກິລາແຫ່ງຊາດ (ຫຼັກ 16) ຊຶ່ງຜົນງານທີມຊາດລາວ ລົງສະໜາມໄປ 4 ນັດຊະນະ 1 ແລະ ເສຍ 3 ນັດ ຕົກຮອບໄປຕາມລະບຽບ ຂະນະທີ່ ຫົວໜ້າຄູຝຶກທີມຊາດລາວ ເຜີຍລູກທີມໄດ້ປະສົບການຢ່າງລົ້ນເຫຼືອ ຫວັງຈະພາບິນຂ້າມນໍ້າຂ້າມທະເລ ໄປເກັບຕົວຝຶກຊ້ອມໄລຍະຍາວ ໃນເດືອນເມສາ 2023 ທີ່ປະເທດຍີ່ປຸ່ນ ເພື່ອເສີມຄວາມແຂງແກ່ນ ກ່ອນລຸຍງານມະຫະກຳກິລາ ຊີເກມ ຄັ້ງທີ 32 ທີ່ປະເທດກຳປຸເຈຍ ເປັນເຈົ້າພາບ.
ຫຼັງເກມການແຂ່ງຂັນ ລາວ ເສຍໃຫ້ ປາແລັດສະຕິນ 0-1 ປະຕູ ໃນມື້ປິດກາແນຂ່ງຂັນລາຍການດັ່ງກ່າວ, ທ່ານ ໄມເຄິນ ໄວ ຫົວໜ້າຄູຝຶກທີມຊາດລາວ ໃຫ້ສຳພາດຕໍ່ສື່ມວນຊົນວ່າ: ໃນການພົບກັບ ປາແລັດສະຕິນ ເກມເລີ່ມຕົ້ນໃນເວລາ 7 ນາທີ ທີມຊາດລາວ ຂອງພວກເຮົາ ກໍມີໂອກາດເຫັນໄດ້ຢ່າງຊັດເຈນ ສ່ວນຈັງຫວະທີ່ນັກເຕະ ປາແລັດສະຕິນ ດຶງ ປີເຕີ ຊຶ່ງຂະນະນັ້ນ ກຳມະການຕັດສິນ ກໍບໍ່ໄດ້ໃຫ້ຈຸດໂທດ ແລະ ເຮົາກໍຕ້ອງຍອມຮັບເພາະມັນເປັນເກມການແຂ່ງຂັນ. ແນວໃດກໍດີ, ໃນການທີ່ໄດ້ລົງຫຼິ້ນກັບບັນດາທີມລະດັບໂລກ ຫຼື ແຣງກິ້ງດີກວ່າ ທີມຊາດລາວ ຫຼາຍຊັ້ນເຊີງ ຢ່າງ ທີມຊາດຍີ່ປຸ່ນ ເບີ 1 ຂອງ ຂົງເຂດອາຊີ, ທີມຊາດເຢເມນ ແລະ ປາແລັດສະຕິນ ອັນດັບ 94 ຂອງໂລກ ແຕ່ນັກກິລາລາວ ກໍພິສູດໃຫ້ເຫັນແລ້ວວ່າ ພວກເຂົາສາມາດສູ້ກັບ 3 ທີມ ດັ່ງກ່າວໄດ້ຢ່າງສູສີ ເຮັດໃຫ້ທີມຊາດລາວ ໄດ້ມີບົດຮຽນຫຼາຍດ້ານ ແລະ ຕ້ອງສຸມໃສ່ການພັດທະນາເປັນຕົ້ນຕໍ. ເຖິງຢ່າງໃດກໍຕາມ, ສິ່ງທີ່ທີມຊາດລາວ ບໍ່ສາມາດປະສົບຜົນສຳເລັດໃນລາຍການນີ້ ກໍຍ້ອນວ່າ ໃນວົງການບານລາວ ຍັງບໍ່ມີ ລີກ ທີ່ເຂັ້ມແຂງ ສະນັ້ນ ເພື່ອກຽມຄວາມພ້ອມເຂົ້າຮ່ວມ ຊີເກມ ຄັ້ງທີ 32 ທີ່ປະເທດກຳປຸເຈຍ ເປັນເຈົ້າພາບ ໃນປີ 2023 ທີມຊາດລາວ ຈະຕ້ອງມີເວລາເກັບຕົວໃຫ້ຫຼາຍຂຶ້ນ ແລະ ຫວັງວ່າໃນເດືອນເມສາ 2023 ຈະໄດ້ມີໂອກາດໄປເກັບຕົວຢູ່ປະເທດຍີ່ປຸ່ນ ພ້ອມທັງທົດສອບຄວາມສາມາດກັບບັນດາທີມແຂງແກ່ນຢູ່ປະເທດດັ່ງກ່າວ ແລະ ເຊື່ອໝັ້ນວ່ານັກກິລາທຸກຄົນໃນທີມມີຄວາມກະຫາຍ, ມີຄວາມຕັ້ງໃຈສູງ ແລະ ມີຄວາມຢາກຈະເອົາໄຊະນະໃນທຸກລາຍການເຂົ້າຮ່ວມແຂ່ງຂັນ. ແນວໃດກໍດີ, ຕໍ່ການເຂົ້າຮ່ວມແຂ່ງຂັນລາຍການນີ້ ສ່ວນຕົວແລ້ວແມ່ນມີຄວາມຮູ້ສຶກດີໃຈ ແລະ ມີຄວາມສຸກທີ່ສຸດ ທີ່ເຫັນແຟນບານຊາວລາວ ໃນຕົວເລກ 7.000 ຄົນ ຫາ 9.000 ຄົນ ເຂົ້າມາຊົມ ແລະ ມາເຊຍ ທີມຊາດລາວ ເປັນບັນຍາກາດ ແລະ ສີສັນຢ່າງຟົດຟື້ນ ຫວັງຢ່າງຍິ່ງວ່າ ໃນລາຍການໜ້າ ບໍ່ວ່າຈະເປັນລາຍການ ຊູຊຸກິ ຄັບ ຫຼື ລາຍການ ມິຊູມິຊິ ຄັບ ແຟນບານຈະສືບຕໍ່ສົ່ງເສີມເຂົ້າມາຊົມ-ເຊຍແບບນີ້ຕື່ມອີກ.
ສຳລັບຜົນງານຂອງ ທີມຊາດລາວ ໃນການລົງສະໜາມ 4 ນັດ ໃນລາຍການ ຢູ-20 ຊີງແຊ໋ມອາຊີ 2023 ຮອບຄັດເລືອກ ກຸ່ມ C ຊະນະ 1 ນັດ ແລະ ເສຍ 3 ນັດ ກໍຄື ຊະນະ ກວມ 3-0, ເສຍ ຍີ່ປຸ່ນ 0-4, ເສຍ ເຢເມນ 1-2 ແລະ ເສຍ ປາແລັດສະຕິນ 0-1 ໄດ້ອັນດັບທີ 4 ສ່ວນອັນດັບທີ 1 ຕົກເປັນຂອງທີມຊາດຍີ່ປຸ່ນ ລົງສະໜາມ 4 ນັດຊະນະ 4 ນັດລວດມີ 12 ຄະແນນເຕັມ ກາຍເປັນທີມດຽວທີ່ບໍ່ເສຍຈັກປະຕູ ແລະ ຍິງໄດ້ເຖິງ 22 ປະຕູຜ່ານເຂົ້າຮອບໃນຖານະແຊ໋ມກຸ່ມ C. ຂະນະທີ່ ເຢເມນ ມີ 7 ຄະແນນຢູ່ອັນດັບ 2 ເທົ່າກັບກັບ ປາແລັດສະຕິນ ກອດຄໍກັນຕົກຮອບ ເພາະບໍ່ດີພໍທີ່ຈະຜ່ານເຂົ້າຮອບໃນຖານະອັນດັບ 2 ຂອງກຸ່ມທີ່ດີທີ່ສຸດໄດ້ ເນື່ອງຈາກອັນດັບ 2 ກຸ່ມອື່ນໆມີຜົນງານໂດດເດັ່ນກວ່າ.
ລາຍການ ຢູ-20 ຊີງແຊ໋ມອາຊີ 2023 ຮອບຄັດເລືອກ ປີນີ້ ມີ 43 ທີມ ເຂົ້າຮ່ວມ ໂດຍໄດ້ແບ່ງອອກເປັນ 10 ກຸ່ມ, ອັນດັບ 1 ຂອງແຕ່ລະກຸ່ມແມ່ນຈະໄດ້ຜ່ານເຂົ້າຮອບ ແລະ ອັນດັບ 2 ທີ່ມີຄະແນນດີທີ່ສຸດຈຳນວນ 5 ທີມ ຜ່ານເຂົ້າຮອບສຸດທ້າຍທີ່ ປະເທດອູຊະເບກິດສະຖານ ໃນປີ 2023, ຊຶ່ງຮອບຄັດເລືອກປັດຈຸບັນແມ່ນຍັງເຫຼືອກຸ່ມ H ທີ່ຍັງບໍ່ທັນແຂ່ງຂັນສໍາເລັດ.
ໂດຍ: ສົງການ ພັນແພງດີ
