ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ເມື່ອບໍ່ດົນມານີ້, ທ່ານ ສິງຄຳ ມິ່ງບຸນຕາ ຮອງຫົວໜ້າອົງການກະແດງລາວແຂວງຫລວງພະບາງ ໄດ້ນໍາເຄື່ອງໂທລະໂຄ່ງ 1 ຊຸດ, ປະກອບມີ ແອັມ 1 ໜ່ວຍ, ໄມ 1 ອັນ, ດອກໂທລະໂຄ່ງ 5 ດອກ ແລະ ເສື້ອຊູຊີບອີກຈໍານວນໜຶ່ງ ເພື່ອນໍາໃຊ້ເຂົ້າໃນວຽກງານປ້ອງກັນໄພພິບັດຂັ້ນເມືອງ ລວມມູນຄ່າເກືອບ 7 ລ້ານກີບ ມາມອບໃຫ້ບ້ານວັງຊຽງ, ກຸ່ມໂພນທອງ ເມືອງໂພນທອງ ແຂວງຫລວງພະບາງ, ມີພະນັກງານຫ້ອງການຖະແຫລງຂ່າວ, ວັດທະນະທຳ ແລະ ທ່ອງທ່ຽວເມືອງ, ຂະແໜງການທີ່ກ່ຽວຂ້ອງ, ອົງການຈັດຕັ້ງບ້ານ ແລະ ປະຊາຊົນພາຍໃນບ້ານເຂົ້າຮ່ວມໃນພິທີມອບ-ຮັບ ເພື່ອນໍາໃຊ້ເຂົ້າໃນວຽກງານສຳຄັນຕ່າງໆຂອງບ້ານເຊັ່ນ: ປະກາດຂ່າວ, ປະກາດແຈ້ງການຕ່າງໆຂອງຂັ້ນເທິງ ໃຫ້ປະຊາຊົນໄດ້ຮັບຮູ້ຢ່າງວ່ອງໄວ, ທັນເຫດການ ແລະ ທັນເວລາຫລາຍຂຶ້ນ.
ໂອກາດນີ້, ທ່ານ ສິງຄຳ ມິ່ງບຸນຕາ ຍັງໄດ້ໂອ້ລົມປະຊາຊົນພາຍໃນບ້ານ ໃຫ້ຍົກສູງສະຕິລະວັງຕົວຕໍ່ບັນຫາຢາເສບຕິດ, ເອົາໃຈໃສ່ພັດທະນາເສດຖະກິດຂອງບ້ານ ໃຫ້ຂະ ຫຍາຍຕົວ, ສຸມໃສ່ທ່າແຮງທີ່ມີຢູ່ ໂດຍສະເພາະແມ່ນ ການປູກຝັງ-ລ້ຽງສັດໃຫຍ່ເປັນສິນຄ້າ ເພື່ອປະກອບສ່ວນເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນເທື່ອລະກ້ວ.
ຕອນທ້າຍ, ນາຍບ້ານບ້ານດັ່ງກ່າວ ກໍໄດ້ຕາງໜ້າໃຫ້ປະຊາຊົນທຸກຄົນພາຍໃນບ້ານ ໄດ້ສະແດງຄວາມຂອບໃຈ ມາຍັງອົງການກາແດງແຂວງຫລວງພະບາງ ທີ່ໄດ້ຍາດແຍງທຶນຮອນຈັດຊື້ຊຸດໂທລະໂຄ່ງ ມາມອບໃຫ້ໃນຄັ້ງນີ້, ພ້ອມທັງຢືນຢັນວ່າ ຈະປົກປັກຮັກສາເປັນຢ່າງດີ ເພື່ອໃຫ້ໄດ້ນໍາໃຊ້ຍາວນານ ແລະ ເກີດຜົນປະໂຫຍດສູງສຸດ.
ຂ່າວ: ສົມເພັດ ໄຊມີກອນ
Medialaos MMD
