ຕາມບົດສະຫຼຸບຕີລາຄາການຊີ້ນໍາ-ນໍາພາ ຂອງອົງຄະນະພັກແຂວຜົ້ງສາລີ ຕໍ່ການພັດທະນາເສດ ຖະກິດພາຍໃນແຂວງ ໃນໄລຍະ 6 ເດືອນຕົ້ນປີນີ້ ແມ່ນມີທ່າຂະຫຍາຍຕົວດີຂຶ້ນກວ່າປີຜ່ານມາ ຊຶ່ງໄດ້ຍົກໃຫ້ເຫັນຜົນງານການພັດທະນາພື້ນຖານໂຄງລ່າງດ້ານເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຊຶ່ງແຂວງໄດ້ສຸມໃສ່ແກ້ໄຂ 8 ບັນຫາ, ຈັດຕັ້ງປະຕິບັດ 16 ວຽກໃຫຍ່, 6 ເປົ້າໝາຍ, 11 ວຽກຈຸດສຸມ, 4 ວຽກເນັ້ນໜັກ
9 ແຜນງານ ແລະ 6 ທາງອອກ ຊຶ່ງຄາດວ່າໃນປີ 2022 ເສດຖະກິດ ຂອງແຂວງຈະຂະຫຍາຍຕົວລື່ນແຜນການປີ 2022 ທີ່ກໍານົດໄວ້ (ແຜນການປີ 5,93%), ລວມຍອດຜະລິດຕະພັນພາຍໃນສະເລ່ຍໃສ່ ຫົວຄົນໜຶ່ງຈະບັນລຸ 1.339 ໂດລາ (ແຜນການປີ 1.271 ໂດລາ). ການປະຕິບັດລາຍຈ່າຍໄດ້ຖືເອົາການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍເປັນບຸລິມະສິດ, ປະຕິບັດລາຍຈ່າຍລວມໄດ້ທັງໝົດ 166,71 ຕື້ກີບ ເທົ່າກັບ 45,23% ຂອງແຜນການປີ (ແຜນການ 368,59 ຕື້ກີບ), ທຽບໃສ່ໄລຍະດຽວກັນໃນປີຜ່ານມາຫຼຸດລົງ 4,20%; ການຜະລິດສະບຽງອາຫານ, ທັນຍາຫານ ເພື່ອສະໜອງພາຍໃນແຂວງ ແມ່ນໄດ້ເອົາໃຈໃສ່ປຸກລະດົມຊາວກະສິກອນຜະລິດເຂົ້ານາແຊງຢູ່ 2 ເມືອງຄື: ເມືອງໃໝ່, ເມືອງຂວາ. ນາປີມີເນື້ອທີ່ທັງໝົດ 8.141,92 ເຮັກຕາ, ທຽບໃສ່ໄລຍະດຽວກັນໃນປີຜ່ານມາແມ່ນເພີ່ມຂຶ້ນ 85,05%; ການຜະລິດພືດລະດູແລ້ງ ບັນລຸໄດ້ໃນເນື້ອທີ່ທັງໝົດ 4.096,15 ເຮັກຕາ, ຜົນຜະລິດ 10.737,30 ໂຕນ ຊຶ່ງລວມມີ ສາລີແຂງ, ສາລີຫວານ, ພືດຕະກຸນຖົ່ວ, ໝາກອຶ, ໝາກເຜັດ, ໝາກແຕງ, ຜັກບົ່ວຜັກທຽມ ແລະ ພືດຜັກຕ່າງໆ ເພື່ອສະໜອງພາຍໃນ ແລະ ເປັນສິນຄ້າສົ່ງອອກ; ນອກນັ້ນກໍໄດ້ຊຸກຍູ້ສົ່ງເສີມການປູກພືດຜັກເຮືອນຮົ່ມໄດ້ຈໍານວນ 107 ຫຼັງ ຢູ່ 6 ເມືອງ ລວມມີ 93 ຄອບຄົວ, 26 ບ້ານ.
ມາຮອດປັດຈຸບັນ, ເນື້ອທີ່ນາໄດ້ຮັບນໍ້າຊົນລະປະທານໃນ ລະດູຝົນມີ 7.385 ຮຕ ເທົ່າກັບ 90% ຂອງເນື້ອທີ່ນາໃນທົ່ວແຂວງ ແລະ ເນື້ອທີ່ນາໄດ້ຮັບນໍ້າຊົນລະປະທານໃນລະດູແລ້ງ ມີ 4.611 ຮຕ ເທົ່າກັບ 56,23% ຂອງເນື້ອທີ່ນາທັງໝົດໃນທົ່ວແຂວງ; ໄປຄ່ຽງຄູ່ກັນນີ້, ແຂວງໄດ້ສົ່ງເສີມການລ້ຽງປາແບບເປັນກຸ່ມ ມີ 4 ກຸ່ມ ຄື: (ເມືອງສໍາພັນ 1 ກຸ່ມ, ເມືອງຂວາ 1 ກຸ່ມ ແລະ ເມືອງໃໝ່ 2 ກຸ່ມ) ແລະ ລ້ຽງແບບເປັນຟາມຂະໜາດນ້ອຍ ມີທັງໝົດ 9 ຟາມ (ເມືອງຜົ້ງສາລີ 1 ຟາມ, ເມືອງບຸນເໜືອ 1 ຟາມ, ເມືອງບຸນໃຕ້ 5 ຟາມ ແລະ ເມືອງໃໝ່ 2 ຟາມ) ສາມາດສະໜອງພາຍໃນໄດ້ 190,98 ໂຕນ ພຽງພໍກັບຄວາມຕ້ອງການພາຍໃນແຂວງ.
ພ້ອມນີ້ ຍັງໄດ້ສົ່ງເສີມລ້ຽງສັດນ້ອຍເປັນສິນຄ້າລ້ຽງໝູ, ແບ້ ແບບເປັນຟາມຂະໜາດນ້ອຍລວມມີ 9 ຟາມ, ສັດປີກ: ເປັດ, ໄກ່ ມີ 5 ຟາມ ແລະ ໄດ້ຫັນການລ້ຽງສັດໃຫຍ່ ງົວ, ຄວາຍ ແບບເປັນຟາມຂະໜາດນ້ອຍມີ 16 ຟາມ. ຊຸກຍູ້ສົ່ງເສີມການຜະລິດໜຶ່ງເມືອງ, ໜຶ່ງຜະລິດຕະພັນ (ODOP) ມາຮອດປັດຈຸບັນ ແຂວງໄດ້ຮັບຮອງ 19 ກາໝາຍ, ມີລາຍຮັບທັງໝົດ 6,37 ຕື້ກີບ; ສໍາລັບການຜະລິດສິນຄ້າສົ່ງອອກແຂວງຜົ້ງສາລີ ໄດ້ສືບຕໍ່ຊຸກຍູ້ສົ່ງເສີມບັນດາໂຄງການຜະລິດສິນຄ້າ ທີ່ມີຕະຫຼາດຮອງຮັບແລ້ວ ແລະ ຕາມຈໍານວນ 21 ລາຍການທີ່ນອນໃນເປົ້າໝາຍໂຄງການປູກພືດທົດແທນການປູກຝິ່ນ; ສິນຄ້າສົ່ງອອກໃນ 6 ເດືອນຕົ້ນປີ ລວມມີຊາ, ຢາງພາລາ, ອ້ອຍ, ກ້ວຍ, ກາເຟ, ໝາກ ແໜ່ງ, ໝາກເດືອຍ ແລະ ອື່ນໆ. ອັນທີ່ພົ້ນເດັ່ນໃນ 6 ເດືອນ ຕົ້ນປີ 2022 ໄດ້ສົ່ງອ້ອຍ ອອກໄປ ສປ ຈີນ ທັງໝົດ 254.563 ໂຕນ, ມູນຄ່າ 96,73 ຕື້ກີບ ແລະ ສົ່ງອອກກ້ວຍໄດ້ ທັງໝົດ 12.966,19 ໂຕນ, ຄິດເປັນມູນຄ່າ 76,65 ຕື້ກີບ. ໄປພ້ອມກັນນີ້, ແຂວງຍັງໄດ້ລົງກໍ່ສ້າງພື້ນຖານໂຄງລ່າງ ຮັບໃຊ້ແກ່ການພັດທະນາ, ການດໍາລົງຊີວິດ ແລະ ການແກ້ໄຂຄວາມທຸກຍາກໃນບ້ານເປົ້າໝາຍດີຂຶ້ນເປັນກ້າວໆ.
ໂດຍ: ຕະວິນຍານ
Medialaos MMD (ໜັງສືພິມ ປະຊາຊົນ)
