ທ່ານ ສີຈິ້ນຜິງ, ປະທານປະເທດຈີນ ໄດ້ພົບປະກັບ ທ່ານ ວາລະດີເມຍ ປູຕິນ, ປະທານາທິບໍດີຣັດເຊຍ ຢູ່ຫໍຮັບແຂກຊາມາຄານຂອງປະເທດອຸດສະເບກິດສະຖານ ໃນຕອນ ບ່າຍວັນທີ 15 ກັນຍາ 2022. ສອງຝ່າຍໄດ້ແລກປ່ຽນຄວາມຄິດຄວາມເຫັນຮ່ວມກັນກ່ຽວກັບການພົວພັນລະ ຫວ່າງຈີນ-ຣັດເຊຍ ກໍຄືບັນຫາສາກົນ ແລະ ພາກພື້ນທີ່ມີຄວາມສົນໃຈຮ່ວມກັນ.
ທ່ານ ສີຈິ້ນຜິງ ກ່າວວ່າ: ນັບແຕ່ຕົ້ນປີນີ້ເປັນຕົ້ນມາ, ຈີນ ແລະ ຣັດເຊຍໄດ້ຮັກສາການຕິດຕໍ່ພົວພັນທາງຍຸດທະສາດທີ່ມີປະສິດທິຜົນສູງ. ການຮ່ວມມືລະຫວ່າງສອງປະເທດໃນຂົງເຂດຕ່າງໆ ໄດ້ຮັບການຊຸກຍູ້ສົ່ງເສີມຢ່າງໜັກແໜ້ນເປັນກ້າວໆ, ກິດຈະກຳປີແລກປ່ຽນດ້ານກິລາໄດ້ດຳເນີນໄປຢ່າງມີຜົນສໍາເລັດ, ການຮ່ວມມືລະດັບທ້ອງຖິ່ນແລະການແລກປ່ຽນລະຫວ່າງປະຊາຊົນກັບປະຊາຊົນມີຄວາມແໜ້ນແຟ້ນຫຼາຍຂຶ້ນກວ່າເກົ່າ. ສອງຝ່າຍໄດ້ປະສານງານກັນຢ່າງ
ແໜ້ນແຟ້ນໃນເວທີສາກົນ ແລະ ປົກປັກຮັກສາຫຼັກການພື້ນຖານຂອງການພົວພັນສາກົນ. ທ່າມກາງການປະເຊີນໜ້າກັບການປ່ຽນແປງຂອງໂລກ, ການປ່ຽນແປ່ງແຫ່ງຍຸກສະໄໝ ແລະ ການປ່ຽນແປງທາງປະຫວັດສາດ, ຈີນ ຍິນດີທີ່ຈະເຮັດວຽກຮ່ວມມືກັບຣັດເຊຍ ເພື່ອສະແດງໃຫ້ເຫັນຄວາມຮັບຜິດຊອບຂອງປະເທດໃຫຍ່ ແລະ ມີບົດບາດນຳໜ້າເພື່ອເພີ່ມຄວາມໝັ້ນຄົງເຂົ້າໃນສະຖານະການຂອງໂລກທີ່ມີການປ່ຽນແປງ ແລະ ສັບສົນວຸ້ນວາຍ.
ທ່ານ ສີຈິ້ນຜິງ ກ່າວເນັ້ນຕື່ມວ່າ: ຈີນ ຍິນດີທີ່ຈະເຮັດວຽກຮ່ວມກັບຣັດເຊຍ ເພື່ອລົງເລິກການຮ່ວມມືດ້ານ ການຄ້າ, ກະສິກໍາ, ການເຊື່ອມໂຍງເຊື່ອມຈອດ ແລະ ຂົງເຂດອື່ນໆ. ສອງຝ່າຍຕ້ອງເພີ່ມທະວີການປະສານງານພາຍໃຕ້ຂອບການຮ່ວມມືຫລາຍຝ່າຍ ເຊີ່ງລວມເຖີງອົງການຮ່ວມມືຊ່ຽງໄຮ້ (SCO), ກອງປະຊຸມກ່ຽວກັບການປະສານງານ ແລະ ສ້າງຄວາມເຊື່ອໝັ້ນໃນອາຊີ ແລະ BRICS ເພື່ອສົ່ງ ເສີມຄວາມສາມັກຄີ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ຂະຫຍາຍການຮ່ວມມືກັນໃນການປະຕິບັດງານ, ຮ່ວມກັນປົກປັກຮັກສາຜົນປະໂຫຍດ້ານຄວາມໝັ້ນຄົງຂອງພາກພື້ນແຫ່ງນີ້ລວມເຖີງຜົນປະໂຫຍດຮ່ວມກັນຂອງບັນດາປະເທດກໍາລັງພັດທະນາ ແລະ ປະເທດທີ່ເປັນຕະ ຫຼາດຈະເລີນໃໝ່.
ທ່ານ ປູຕິນ ກ່າວວ່າ: ປັດຈຸບັນ, ໂລກພວມມີການປ່ຽນ ແປງຫລາຍຢ່າງ, ແຕ່ສິ່ງດຽວທີ່ຍັງບໍ່ປ່ຽນແປງ ແມ່ນມິດ ຕະພາບ ແລະ ຄວາມໄວ້ເນື້ອເຊື່ອໃຈກັນລະຫວ່າງຣັດເຊຍ ແລະຈີນ, ການພົວພັນຄູ່ຮ່ວມປະສານງານຍຸດທະສາດຮອບດ້ານລະຫວ່າງສອງປະເທດໄດ້ມີຄວາມໝັ້ນຄົງຂະ ໜົງແກ່ນດັ່ງພູເຂົາ. ຣັດເຊຍຍິນດີຮ່ວມກັບຈີນລົງເລິກແລະປັບປຸງການຕິດຕໍ່ພົວພັນແລະການປະສານງານກັນລະຫວ່າງສອງຝ່າຍແລະຫຼາຍຝ່າຍໃຫ້ດີຂຶ້ນ, ເປີດກວ້າງການຮ່ວມມືໃນຂົງເຂດທີ່ສຳຄັນຕ່າງໆ ເຊັ່ນ: ເສດຖະກິດ ການຄ້າ ແລະ ພະລັງງານ ເປັນຕົ້ນ.
ທ່ານ ປູຕິນ ຍັງໄດ້ອວຍພອນໃຫ້ກອງປະຊຸມໃຫຍ່ຜູ້ ແທນທົ່ວປະເທດ ຄັ້ງທີ 20 ຂອງພັກກອມມູນິດຈີນ ທີ່ຈະຈັດຂຶ້ນໃນອີກບໍ່ດົນນີ້ເຕັມໄປດ້ວຍຜົນສໍາເລັດຢ່າງຈົບງາມ ແລະ ສະແດງຄວາມເຊື່ອໝັ້ນວ່າ: ພາຍໃຕ້ການນໍາພາຂອງທ່ານ ສີຈິ້ນຜິງ, ປະເທດຈີນຈະສືບຕໍ່ປະສົບຜົນສໍາເລັດໃໝ່ໃຫຍ່ຫລວງກວ່າເກົ່າໃນການພັດທະນາເສດຖະກິດ-ສັງຄົມຂອງປະເທດ.
Source: https://english.news.cn/…/a7009b471511441886a246…/c.html
