ສະມາຊິກສະພາແຫ່ງຊາດ(ສສຊ) ຊຸດທີ IX ປະຈຳເຂດເລືອກຕັ້ງທີ 1 ນະ ຄອນຫລວງວຽງຈັນ ນຳໂດຍ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ຊຸດທີ IX, ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນະຄອນຫລວງວຽງຈັນ ພ້ອມຄະນະ ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ເອກະສານຜົນສຳເລັດກອງປະຊຸມສະໄໝສາມັນເທືື່ອທີ 3 ຂອງສະພາແຫ່ງຊາດ (ສພຊ) ຊຸດທີ IX ຢູ່ຫ້ອງປະຊຸມກະຊວງເຕັກໂນໂລຊີ ແລະ ການສື່ສານ (ຫລັກ 14 ບ້ານດອນຕິ້ວ) ໃນວັນທີ 7 ກັນຍາ 2022 ໂດຍການຕ້ອນຮັບຈາກ ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ(ກຕສ), ມີພະນັກງານຫລັກແຫລ່ງ ອ້ອມຂ້າງກະຊວງດັ່ງກ່າວ ເຂົ້າຮ່ວມຮັບຟັງ.
ໂອກາດນີ້, ສສຊ ກໍໄດ້ພັດປ່ຽນກັນຂຶ້ນເຜີຍແຜ່ເອກະສານຜົນສຳເລັດກອງປະຊຸມສະໄໝສາມັນເທືື່ອທີ 3 ຂອງສະພາແຫ່ງຊາດ (ສພຊ) ຊຸດທີ IX ພ້ອມທັງຍົກໃຫ້ເຫັນບາງເນື້ອໃນສຳຄັນ ເພື່ອສ້າງຄວາມເຂົ້າໃຈໃຫ້ແກ່ພະນັກງານຫລັກແຫລ່ງແຕ່ລະຂັ້ນ ເປັນຕົ້ນແມ່ນການພິຈາລະນາຮັບຮອງ ເອົາບັນຫາສຳຄັນຕ່າງໆຂອງລັດຖະບານ, ການຈັດຕັ້ງປະ ຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ການຈັດຕັ້ງປະຕິບັດລັດຖະທຳມະນູນ-ກົດໝາຍ ແລະ ບັນຫາສໍາຄັນອັນພົ້ນເດັ່ນຕ່າງໆ ທີ່ຕິດພັນກັບການພັດ ທະນາປະເທດຊາດ ກໍຄື ການດຳລົງຊີວິດປະຊາຊົນທົ່ວປະເທດ.
ພ້ອມນັ້ນ, ຍັງໄດ້ເປີດໂອກາດໃຫ້ຜູ້ເຂົ້າຮ່ວມ ປະກອບຄໍາເຫັນ ແລະ ສະເໜີແລກ ປ່ຽນບັນຫາຄວາມຂັດຂ້ອງ ໝອງໃຈດ້ານຕ່າງໆ ເພື່ອໃຫ້ ສສຊ ນຳໄປສະເໜີຕໍ່ພາກ ສ່ວນກ່ຽວຂ້ອງພິຈາລະນາແກ້ໄຂໃຫ້ຖືກຕ້ອງ ສອດຄ່ອງ ເປັນຕົ້ນ ສະເໜີໃຫ້ກະຊວງສຶກສາທິການ ແລະ ກິລາ ຊຸກຍູ້ລະ ບົບການນຳໃຊ້ຄອມພິວເຕີ ເຂົ້າສູ່ຊົນນະບົດໃຫ້ຫລາຍຂຶ້ນ, ໃຫ້ຫລຸດພາສີນຳເຂົ້າ ເພື່ອການສະໜອງຄອມພິວເຕີ ທີ່ນຳເຂົ້າເພື່ອການສຶກສາໃຫ້ຫລຸດລົງ, ໃຫ້ເອົາໃຈໃສ່ຊຸກຍູ້ສົ່ງເສີມບຸກຄະລະກອນດ້ານດີຈິຕອນຂອງປະເທດຫລາຍຂຶ້ນ ເພື່ອປະກອບສ່ວນເຂົ້າໃນການພັດທະນາປະເທດຊາດ, ສະໜີລັດຖະບານ ກໍຄື ພາກສ່ວນທີ່ກ່ຽວຂ້ອງເອົາໃຈໃສ່ໃນການຄວບຄຸມ ອັດຕາການແລກປ່ຽນເງິນຕາ ໃຫ້ຖືກຕ້ອງຕາມລະບຽບທະນາຄານກາງວາງອອກ, ຊຸກຍູ້ສົ່ງເສີມການນຳໃຊ້ບັນດາບົດຮຽນ ແລະ ບັນດາເຕັກໂນໂລຊີ ທີ່ທັນສະໄໝຂອງຕ່າງປະເທດ ເພື່ອນຳມາຊຸກຍູ້ສົ່ງເສີມການຜະລິດ ຢູ່ປະ ເທດເຮົາໃຫ້ມີການພັດທະນາຫລາຍຂຶ້ນ.
ຂ່າວ-ພາບ: ພະແນກປະຊາສໍາພັນ ກຕສ
Medialaos MMD
