ວຽກງານຮັບປະກັນຊີວິດການເປັນຢູ່ແມ່ນວຽກງານທີ່ສໍາຄັນໃນການຄຸ້ມຄອງທັບ-ລ້ຽງດູທັບ ເຊິ່ງນອນຢູ່ໃນ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດວາງອອກ ດັ່ງນັ້ນເພື່ອຮັບປະກັນໃຫ້ກໍາລັງທີ່ເຂົ້າຮ່ວມຮັບໃຊ້ບັ້ນຝຶກຊ້ອມກອບກູ້ໄພພິບັດ ຮ່ວມ 3 ກອງທັບ ( ກໍາປູເຈຍ, ລາວ, ຫວຽດນາມ ) ໄດ້ກິນອີ່ມນຸ່ງອຸ່ນ, ມີສຸຂະພາບແຂງແຮງ, ກຽມພ້ອມປະຕິບັດໜ້າທີ່ວຽກງານຕາມການມອບໝາຍຂອງຂັ້ນເທິງນັ້ນ ສະຫາຍພັນໂທ ສູນທະລາ ພັນທະວົງ, ຮອງພະແນກອຸປະໂພກ – ບໍລິໂພກກົມໃຫຍ່ພາລະທິການກອງທັບ, ຜູ້ຊ່ວຍວຽກງານພະລາທິການພາກສະຫນາມ ຮັບໃຊ້ບັ້ນຝຶກຊ້ອມກອບກູ້ໄພພິບັດ ຮ່ວມ 3 ກອງທັບ ໄດ້ໃຫ້ຮູ້ວ່່າ: ໂດຍປະຕິບັດຕາມທິດຊີ້ນຳຂອງກົມໃຫຍ່ພະລາທິການກອງທັບ ກໍ່ຄືກະຊວງປ້ອງກັນປະເທດ, ວ່າດ້ວຍການເບິກຈ່າຍເຄື່ອງອຸປະໂພກ ຕາມອັດຕາ ແລະ ຈໍານວນທີ່ຂັ້ນເທິງຕົກລົງ ຜ່ານການຈັດຕັ້ງປະຕິບັດຕົວຈິງ ສາມາດຮັບປະກັນການເບີກຈ່າຍໄດ້ 100%, ພ້ອມດຽວກັນນີ້ກໍເອົາໃຈໃສ່ໃນການປັບປຸງສະຖານທີ່ພັກເຊົ່າ ໃຫ້ແກ່ກຳລັງທີ່ເຂົ້າຮ່ວມບັ້ນຝຶກຊ້ອມໃຫ້ມີຄວາມເປັນລະບຽບຮຽບຮ້ອຍ, ສະອາດຈົບງາມ, ໄປຄຽງຄູ່ກັນນີ້ກໍ່ໄດ້ຈັດຕັ້ງຊີ້ນໍາເອື້ອຍລ້ຽງຈໍານວນໜຶ່ງຮັບປະກັນໃຫ້ແກ່ວຽກງານບໍລິໂພກ, ປຸງແຕ່ງອາຫານ 3 ຄາບຕໍ່ມື້ (ເຊົ້າ,ສວຍ, ແລງ ) ເພື່ອຮັບປະກັນໃຫ້ອ້າຍນ້ອງໄດ້ກິນ, ດື່ມ ຖືກຕ້ອງຕາມໂມງເວລາ ແລະ ຫລັກອະນາໄມ ໃນແຕ່ລະວັນຢ່າງເປັນປົກກະຕິ ເພື່ອຮັບປະກັນໃຫ້ບັ້ນຝຶກຊ້ອມກອບກູ້ໄພພິບັດ ຮ່ວມ 3 ກອງທັບ ບັນລຸຕາມລະດັບຄາດໝາຍທີ່ວາງໄວ້.
