ແຫລ່ງຂ່າວຈາກແຂວງຈໍາປາສັກ ໃຫ້ຮູ້ວ່າ: ຕອນຄໍ່າວັນທີ 1 ກັນຍາ 2022 ຜ່ານມາ, ກົງສູນໃຫຍ່ ສສ ຫວຽດນາມປະຈຳພາກໃຕ້ລາວ ທີ່ປາກເຊ ຈັດງານລ້ຽງ ສະ ເຫລີມສະຫລອງວັນຊາດ ສສ ຫວຽດນາມ ຄົບຮອບ 77 ປີ (2/9/1945-2/9/2022) ໂດຍມີ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານເຈົ້າແຂວງສາລະວັນ, ແຂວງເຊກອງ, ແຂວງອັດຕະປື, ມີບັນດາການນໍາຈາກ 6 ແຂວງຂອງຫວຽດນາມຄື: ແຂວງກວາງນາມ, ກວາງບິ່ງ, ບິ່ງເຢືອງ, ກວາງຈິ, ກອນຕູມ ແລະ ເລີ່ມດົງ, ພ້ອມດ້ວຍຕາງໜ້າອົງການຈັດຕັ້ງຕ່າງໆຂອງລາວ ແລະ ຫວຽດນາມ, ນັກທຸລະກິດ, ຊາວຄ້າຂາຍ ຕະຫລອດຮອດປະຊາຊົນຊາວຫວຽດນາມ ທີ່ດຳລົງຊີວິດຢູ່ແຂວງຈຳປາສັກ ເຂົ້າຮ່ວມຢ່າງຫລວງຫລາຍ.
ໃນພິທີ, ທ່ານ ຫງວຽນ ວັນ ຈຸງ ກົງສູນໃຫຍ່ ສສ ຫວຽດນາມ ປະຈຳພາກໃຕ້ ທີ່ປາກເຊ ໄດ້ກ່າວປາໄສ ຫວນຄືນມູນເຊື້ອວັນຊາດ ທີ 2 ກັນຍາ ຕະຫລອດໄລນະ 77 ປີ,ຍົກໃຫ້ເຫັນຄວາມອົງອາດກ້າຫານ, ສູ້ຮົບມີໄຊ ຄຽງບ່າຄຽງໄລ່ຮ່ວມຂຸມຄອງດຽວກັນ ລະ ຫວ່າງ ກອງທັບປະຊາຊົນຫວຽດນາມ ແລະ ກອງທັບປະຊາຊົນລາວ ໃນການຕໍ່ສູ້ຕ້ານຈັກກະພັດລ່າເມືອງຂຶ້ນທັງເກົ່າ ແລະ ໃໝ່ ພາຍໃຕ້ການນຳພາອັນສະຫລາດສ່ອງໃສຂອງພັກກອມມູນິດຫວຽດນາມ ທີ່ມີປະທານ ໂຮ່ຈີ່ມິງ ຜູ້ນຳທີ່ຍິ່ງໃຫຍ່ເປັນຜູ້ກໍ່ຕັ້ງ ແລະ ນຳພາ ສາມາດປົດປ່ອຍປະເທດຊາດ ຫວຽດນາມ ໃນວັນທີ 2 ກັນຍາ ປີ 1945, ປະທານ ໂຮ່ຈີ່ມິງ ໄດ້ອ່ານຖະແຫລງການເອກະລາດ ໃນລະດູໃບໄມ້ຫລົ່ນ ປີ 1945 ເຊິ່ງໄດ້ຖືກຳເນີດ ປະເທດ ສສ ຫວຽດນາມ ພາຍໃຕ້ການນຳພາຂອງພັກພອມມູນິດຫວຽດນາມ ເຊິ່ງປະຊາ ຊົນຫວຽດນາມ ໄດ້ຈາລຶກໄວ້ວ່າ ບໍ່ມີສິ່ງໃດປະເສີດກວ່າເອກະລາດ ແລະ ເສລີພາບ, ໄດ້ເຕົ້າໂຮມຄວາມສາມັກຄີ ເປັນຈິດໜຶ່ງໃຈດຽວ, ເດັດດ່ຽວຜ່ານຜ່າຄວາມຫຍຸ້ງຍາກ ເພື່ອປົກປັກຮັກສາປະເທດຊາດ, ປົກປັກຮັກສາຄວາມເປັນເອກະລາດ ແລະ ເສລີພາບ ຂອງ ປະ ເທດຊາດ ໄວ້ຢ່າງໜຽວແໜ້ນ, ສ້າງສາ ແລະ ພັດທະນາປະເທດ ນັບມື້ນັບສະຫງ່າຜ່າເຜີຍ, ຍິ່ງໃຫຍ່ ແລະ ສວຍງາມ, ຄຽງຄູ່ກັບການປະກອບສ່ວນຢ່າງຕັ້ງໜ້າ, ເຂົ້າໃນການຮັກສາສັນຕິພາບ, ການຮ່ວມມື ແລະ ການພັດທະນາໃນພາກພື້ນ ແລະ ສາກົນ.
ໃນໂອກາດນີ້, ທ່ານ ວິໄລວົງ ບຸດດາຄຳ ໄດ້ມີຄຳເຫັນ ໂດຍກ່າວວ່າ: ຕະຫລອດໄລຍະ 77 ປີ ຜ່ານມາ, ພວກຂ້າພະເຈົ້າ ສຸດທີ່ມີຄວາມຮູ້ສຶກເບີກບານມ່ວນຊື່ນ ແລະ ມີຄວາມເອກອ້າງທະນົງໃຈ ທີ່ໄດ້ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ລະຫ່ວາງ ສອງຊາດ ລາວ-ຫວຽດນາມ, ຫວຽດນາມ-ລາວ ຍາມໃດກໍສວຍສົດງົດງາມ, ມີຄວາມບໍລິສຸດສັດຊື່, ສະໜິດສະໜົມ ຈິງໃຈ ແລະ ຫາຍາກ ໃນການພົວພັນສາກົນໃນໂລກ ມີໜຶ່ງບໍ່ມີສອງ ນອກຈາກສອງຊາດ ລາວ-ຫວຽດນາມ ຂອງພວກເຮົາ ທີ່ມີມາແຕ່ຄັ້ງປະຫັວດສາດ ເຊິ່ງໄດ້ຮັບການລິເລີ່ມກໍ່ສ້າງໂດຍ ປະທານ ໂຮ່ຈີ່ມິງ ທີ່ຍິ່ງໃຫຍ່ ແລະ ປະທານ ໄກສອນ ພົມວິຫານ ທີ່ແສນເຄົາລົບຮັກ ທີ່ໄດ້ຮ່ວມສ້າງເປັນພື້ນຖານໜັກ ແໜ້ນ, ແບບຢ່າງ ທີ່ດີ ແລະ ໄດ້ຮັບການສືບທອດ, ຮັກສາ, ຖະນຸຖະໜອມ ຈາກບັນດາຮຸ່ນການນໍາ ກາຍເປັນຊັບສົມບັດອັນລ້ຳຄ່າມາເຖິງປັດຈຸບັນນີ້.
ຂ່າວ: ເກດສະໜາ
